1Tim 2 - ÎVUKU RÎA ÛVORO MWARO

Kûgooca tûrî kanitharî

¹ Mbere ya maûndû monthe nîramûthaitha mûvoyage mavoya ma kûthaithanîra andû, gwîtia Ngai kîrîa mûrenda na gûcokia Ngatho kûrî Ngai nîûndû wa andû onthe.

² Voyagîrani athamaki na anene onthe nîguo twîkarage tûkirîrîtie, tûrî na thayû, twînyivîtie mbere ya Ngai na tûrî na mîtugo mîaro.

³ Ûndû ûyû nî mwaro na nîûkenagia Ngai Mûvonokia wetû,

⁴ ûrîa wendaga andû onthe mavonoke na mamenye ûvoro wa ma.

⁵ Nîûndû Ngai nî ûmwe, nake ûrîa wîgwithanagia andû na Ngai nî ûmwe na mûndû ûcio nî Jesû Kristû.

⁶ Ke nîke wevecanire nîguo akûûre andû onthe kuuma meviarî. Ûndû ûcio nîwonanirie na ma kavinda karîa kaagîrîrîte atî Ngai nîwendaga andû onthe mavonoke,

⁷ na nîwatûmire nduîke mûtûmwa kûrî andû a ndûrîrî, nîguo mvunjie na nîmathomithie maûndû megiî wîtîkio na ûma. Ûndû ûrîa narîkia kwaria nî wa ma ndirathaana.

⁸ Nîngîenda kûndû kuonthe kûrîa andû magoocagîra Ngai, arûme arîa meyamûrîrîte Ngai mavoyage maûkîrîrîtie njara ciao na îgûrû matarî arakaru na matagûkararania.

⁹ Nîngîenda aka wanao mekagîre nguo irîa ciagîrîrîte na ikwonania gîtîîo. Matikegemie na njîra ya kûvînda njuîrî, matikegemie na thaavu, ciûma cia goro kana nguo cia goro.

¹⁰ Nwatî nîmekage ciîko mbaro irîa ciagîrîrwe nî gwîkwa nî aka arîa maugaga nîmagoocaga Ngai.

¹¹ Aka magîrîrwe nîkwîthîrwa makirîte na menyivîtie rîrîa makûthomithua.

¹² Nie ndiîtîkîrîtie aka mathomithie kana maathe arûme. Aka magîrîrwe nî gûkira.

¹³ Nîûndû Adamu nîke waûmbirwe mbere, nake Awa agîcoka akîûmbwa.

¹⁴ Adamu ndaaveenua nî mûndûmûka waveenirue na akîvia.

¹⁵ Nwatî Ngai nîakaavonokia aka na njîra ya gûciara ethîrwa nîmakûthiî na mbere gwîtîkia, kwendana, gûtuîka atheru, na kwîthîrwa marî na mîtugo yagîrîrîte.