1Sam 9 - ÎVUKU RÎA ÛVORO MWARO

Saûlo na Samueli nîmaacemanirie

¹ Nakuo kwarî na mûndû mûrûme ûmwe gîtonga wetagwa Kishu wa kuuma mûvîrîgarî wa Benjamini Kishu aarî mûvîcî wa Abieli, nake Abieli aarî mûvîcî wa Zeroru. Kishu aarî wa mûciî wa Bekorathu, naguo mûciî ûcio warî gacunjî ka mûvîrîga wa Avia.

² Kishu aarî na mûvîcî wake wetagwa Saûlo. Saûlo aarî mwanake mûthaka mûno. Gûtiarî na mûndû mûrûme wîngî gatagatîrî ka andû a Isiraeli warî mûthaka gûkîra Saûlo. Kuuma cianderî ciake kûthiî mwena wa îgûrû, ke aarî mûraca gûkîra mûndû wîngî wa wonthe kûu Isiraeli.

³ Nacio mvunda imwe cia Kishu, îthe wa Saûlo nîciaûrire. Kwoguo Kishu nîwerire mûvîcî wake, Saûlo atîrî, “Oca mûndû ûmwe wa ndungata ino mûthiî mûgacarie mvunda.”

⁴ Nao nîmaavîtûkanîrie vûrûrirî ûrîa ûrî irîma wa Efiraimu wana gîcunjîrî gîa Shalisha na matiaciona; Kwoguo nîmaathire na mbere na makîvîtûkanîria gîcunjîrî gîa Shalimu wa magîcaragia mvunda, nwatî itiarî kuo. Magîcoka makîvîtûkanîria vûrûrirî wa Benjamini, nwatî matiaciona.

⁵ Nao rîrîa maakinyire vûrûrirî wa Zufu, Saûlo nîwerire ndungata yake îrîa maarî nayo atîrî, “Ûka, tiga tûcoke mûciî nîûndû vava avota gûtiga kûmaka nîûndû wa mvunda, na ambîrîrie gûtangîka nîûndû wetû.”

⁶ Nwatî ndungata îo nîyerire Saûlo atîrî, “Tamba ûtige! Gûkû îtûûrarî rîîrî kwîthagîrwa kûrî na mûndû wa Ngai. Mûndû ûcio ethagîrwa arî mûtîîku mûno nîûndû maûndû monthe marîa augaga nîmatuîkîkaga. Tiga tûthiî kûrî ke, na avota gûtwîra kûrîa tûngîona mvunda icio.”

⁷ Nake Saûlo nîwaûririe ndungata îo yake atîrî, “Nwatî ethîrwa nîtûkûthiî kûrî mûndû ûcio-rî, nîtûmûvirîra ndûî? Gûtirî na irio ndigaru ciondorî cietû, na tûtirî wanarî kîndû tûngîmûvirîra.”

⁸ Nayo ndungata nîyacokerie Saûlo rîngî, na îkîmwîra atîrî, “Ava, nie nîrî na gîcunjî Kîam inya gîa ciringi ya sîlûva. Kîu nîkîo ngûthiî kûva mûndû ûcio wa Ngai nîguo nake atwîre kûrîa mvunda icio irî.”

⁹ Mbererî vûrûrirî wa Isiraeli mûndû akîthiî kûria ûndû kûrî Ngai augaga atîrî, “Ûka tûthiî tûkone mwoni maûndû” nîûndû mûndû ûrîa wîtagwa mûrathi, tene etagwo mwoni maûndû.

¹⁰ Nake Saulo nîwerire ndungata îo yake atîrî, “Rîu nî rîciria rîaro tiga tûthiî.” Kwoguo nîmathiire îtûûrarî kûrîa mûndû ûcio wa Ngai atûûraga.

¹¹ Rîrîa maunûkagia karîma mathiîte îtûrarî rîu, nîmaacemanirie na erîtu aîrî mathiîte gûtava manjî. Nîmaûririe erîtu acio atîrî, “Mwoni maûndû arî îtûûrarî?”

¹² Nao erîtu acio nîmaacokirie, “Ii, arî kuo, arî vau mbere yenyu thiîcangani. Ke aukîte îtûûrarî wa rîu, nîûndû andû nîmaûkîte ûmûnthî kûruta îgongona kûndû kûrîa gûtûgîru.

¹³ Mwatonya îtûûrarî wa rîo, nîmûkûmwona mbere ya athiî kûndû kûrîa gûtûgîru kûrîa, nîûndû andû matingîrîa irio atarî mûkinyu, nîûndû nwa nginya arathime îgongona. Nao acio engî metîtwe macoke marîe. Unûkiani wa rîu na nî mûkûmwona.”

¹⁴ Kwoguo Saûlo marî na ndungata yake nîmaaunûkirie mathiîte îtûûrarî rîu. Na rîrîa maakuvîvîrie gûtonya kuo, nîmoonire Samueli aûkîte na kûrîa maarî aunûkîtie athiîte vandû vau vaagoocagîrwa nî andû.

¹⁵ Naguo mûthenya ûmwe mbere ya Saûlo aûke, Ngai-Mûnene nîwarîrîtie Samueli na akamwîra atîrî,

¹⁶ “Rûciû îthaarî wata rîrî, nie nîngaatûma mûndûmûrûme kuuma mûvîrîgarî wa Benjamini aûke kûrî we; we nîûkaamwîtîrîria maguta nîguo atuîke mûthamaki wa andû akwa a Isiraeli, na nîke ûkaavonokia andû akwa kuuma kûrî Afilisiti. Nie nîmonete ûrîa andû akwa marî na ruuo na nîmbîguîte makîmvoya ûtethio.”

¹⁷ Vîndî îrîa Samueli oonire Saûlo, Ngai-Mûnene nîwamwîrire atîrî, “Ûyû nîke mûndûmûrûme ûrîa nie naakwîrire ûvoro wake. Ke nîke ûgaatuîka mûthamaki wa andû akwa.”

¹⁸ Samueli aarî vakuvî na kîvingo. Nake Saûlo nîwathiîre varî ke na akîmwîra atîrî, “Ta mbîra kûrîa nyomba ya mûndû ûrîa wonaga maûndû îthagîrwa îrî.”

¹⁹ Nake Samueli agîcokeria Saûlo na akîmwîra atîrî, “Nie nînie mûndû ûrîa wonaga maûndû. Ndongoreria tûthiî vandû varîa vagoocagîrwa. Ûmûnthî nîtûkûrîcanîra namue na rûyû kîraûko nîrîo ngaakwîra maûndû monthe marîa marî ngororî yaku na ngînagwîtîkîria ûthiî.

²⁰ Tiga kûmakua nî ûvoro wîgiî mvunda irîa ciaûrire mîthenya îthatû mîvîtûku, nîûndû rîu nîmoneku. Nao andû a Isiraeli mavatarîtue mûno nîwe mûrî na andû a mûciî wa aguo.”

²¹ Nake Saûlo nîwacokirie na akiuga atîrî, “Nie nîrî wa mûvîrîga wa Benjamini. Mûvîrîga wa Benjamini nîguo mûnini viû kûu Isiraeli. Nao andû a mûciî wakwa nîo methagîrwa marî anini mûno gûkîra andû arîa engî kûu mûvîrîgarî ûcio. Nîndûî vi kîratûma ûmbîre ûguo?”

²² Nake Samueli nîwavirire Saûlo marî na ndungata yake nyombarî nene kûrîa andû arîa meetîtwe maarî, meekarîte itîîrî cia mbere irîa ciarî cia gwîkarîrwa nî andû a gîtîîo. Nakuo kwarî na andû ta mîrongo îthatû.

²³ Nake Samueli nîwerire mûndû ûrîa warugaga irio atîrî, “Ta rete rwîga rûrîa nîrakûnengerire na ngîkwîra ûruige mwanya.”

²⁴ Nake mûrugi nîwocire mûgwanja wa nyama na akîmigîrîra mbere ya Saûlo. Nake Samueli akîîra Saûlo atîrî, “Ta roria, gaka nîko gacunjî karîa ûraigîrîtwe. Gooce ûkarîe. Nîrakwigîrîte ko nîguo ûrîe îvinda rîîrî mûrî na ageni arîa engî.” Kwoguo Saûlo nîmaarîcanîre na Samueli mûthenya ûcio.

²⁵ Na rîrîa maanyûrûrûkire makiuma vandû varîa vagoocagîrwa na makîthiî îtûûrarî, Saûlo nîwathondekerûe vandû va kûmama îgûrû rîa nyomba,

²⁶ na akîmama vo. Na rîrîa gwakeere, Samueli nîwetire Saûlo arî kûu îgûrû rîa nyomba akîmwîra atîrî, “Ûkîra nîguo ngumagarie ûthiî.” Kwoguo Saûlo nîwaûkîrire, akîîvarîria nao oîrî, ke mwene marî na Samueli makiumîra na makîthiî njîrarî.

Samueli nîwetîrîrie Saûlo maguta nîguo atuîke Mûthamaki

²⁷ Na rîrîa maanyûrûkire magîkinya mûthiia wa îtûûra, Samueli nîwerire Saûlo atîrî, “Îra ndungata yaku îvîtûke îthiî îrî mbere yetû.” Rîrîa ndungata yavîtûkire, Samueli nîwerire Saûlo atîrî, “We tamba ûrûngame vanini, nîguo ngûmenyithie ûrîa Ngai augîte.”