1Sam 8 - ÎVUKU RÎA ÛVORO MWARO

Andû nîmaaugire mavewe mûthamaki

¹ Na rîrîa Samueli aakûrire nîwatwire anake ake atucanîri ciira a Isiraeli.

² Mûriû wake ûrîa warî îrikithathi eetagwa Joeli, na wa kaîrî eetagwa Abija. Nao oîrî maarî atucanîri ciira kûu Beerisheba.

³ Nwatî anake acio a Samueli matiarûmîrîra maûndû marîa îthe eekaga; maacaragia ûtonga tu; kwoguo nîmeetagia mavaki na matiatucaga ciira na kîvooto.

⁴ Nao athuuri onthe a Isiraeli nîmaaûnganire vamwe na makîthiî kûrî Samueli kûu Rama,

⁵ na makîmwîra atîrî, “Taroria, we ûrî mûkûrû nao anake aku matirûmagîrîra maûndû marîa wekaga. Rîu tûthuurîre mûthamaki wa gûtwathaga wata ûrîa ndûrîrî irîa ciîngî ciîthagîrwa irî na athamaki a cio.”

⁶ Nwatî Samueli ndaakena egua andû acio makîmûûria amathuurîre mûthamaki wa kûmathaga; kwoguo Samueli nîwavoire kûrî Ngai-Mûnene,

⁷ nake Ngai-Mûnene akîîra Samueli atîrî, “Îtîkîra maûndû monthe marîa andû magûkwîra, nîûndû we tîwe maregete. Nie nînie maregete nduîke mûthamaki wao.

⁸ Ciîko irîa o matûîre mambîkaga kuuma mûthenya ûrîa naamatongoririe na ngîmaruta Misiri nwacio wanawe magûgwîka. O nîmaandiganîrie na makîambîrîria gûtungatîra ngai ciîngî.

⁹ Kwoguo îtîkîra ûrîa magûkwîra, nwatî ûmataare mûno na ûmonererie maûndû megiî ûrîa mûthamaki ûcio wao akaamatha.”

¹⁰ Nake Samueli nîwerire andû acio mamwîra amathuurîre mûthamaki maûndû monthe marîa Ngai-Mûnene aamwîrîte.

¹¹ Ke nîwamataarîrie na akîmera atîrî, “Mûthamaki ûcio nîagecukia anake enyu na athiî nao; amwe ao nîakaamatua ndereva cia ikaari ciake cia mbaara, nao engî amatue a kûthiîcaga matûîte mbarathi ciake, nao makathiîcaga mavinyûrîte matongoreretie ikaari ciake cia mbaara.

¹² Amwe ao nîakaamatua athani a athigari ngiri îmwe, nao engî amatue athani a athigari mîrongo îtano. Nao arîa engî nîakaamatua arîmi a mîgûnda yake, magîkethaga maketha make. Nî gûkethîrwa kûrî na anake engî arîa makethîrwa marî a kûthondekagîra mûthamaki indo ciake cia mbaara, na cia ikaari ciake cia mbaara.

¹³ Mûthamaki ûcio nîagecukia ciana cienyu cia erîtu athiî nacio. Amwe ao nîmagaatuîka a kûmûthondekagîra manungato, nao engî amatue arugi, na arîa engî matuîke athondeki ake a mîgate.

¹⁴ Ke nîakaamûcuna mîgûnda yenyu îrîa mîaro mûno ya mîthavibu na mîtamaiyû na amîvecane kûrî ndungata ciake.

¹⁵ Ke nîagecûkia gîcunjî gîa îkûmi gîa mbeû cienyu wana cia mîgûnda yenyu ya mîthavibu na aivecane kûrî anene a athigari ake na kûrî ndungata ciake.

¹⁶ Ke nîagooca ndungata cienyu cia athuuri na cia aka, vamwe na mvunda cienyu mathiî makarutage wîra wake.

¹⁷ Ke nîagecukagia gîcunjî gîa îkûmi Kîam ndîthia ya ng'ondu cienyu, namue mûtuîke ngombo ciake.

¹⁸ Na rîrîa vîndî îo îgaakinya, mue nîmûkaathaithana mugîrîrîtie nîûndû wa mûthamaki wenyu ûcio mûkethîrwa mwîthuurîrîte, nwatî Ngai-Mûnene ndakaamûthikîrîria.”

¹⁹ Nao andû nîmaaregire kûthikîrîria ûrîa Samueli aameeraga, na makiuga atîrî, “Naarî! Tue tûrenda mûthamaki,

²⁰ nîguo twîthagîrwe tûrî na mûthamaki wetû ta ndûrîrî irîa ciîngî cionthe; Nake mûthamaki wetû agaatûtongoragîria tûkîthiî mbaararî na nîagaatûrûagîrîra.”

²¹ Nake Samueli nîwathikîrîrie na akîgua maûndû monthe marîa andû acio maaugire na agîcoka akîthiî na akîîra Ngai-Mûnene.

²² Nake Ngai-Mûnene nîwerire Samueli atîrî, “Îka kûringana na ûrîa marakwîra na ûmathuurîre mûthamaki.” Nake Samueli akîîra andû a Isiraeli macoke na mathiî wa mûndû îtûûrarî rîake.