1Sam 7 - ÎVUKU RÎA ÛVORO MWARO

¹ Nao athuuri a Kiriathu Jearimu nîmaanyûrûrûkire na magîoca îthandûkû rîa Kîrîkanîro rîa Ngai-Mûnene na makîrîvira mûciî kwa mûndû wetagwa Abinadabu. Nao nîmaatheririe mûûriû wake, Eleazaru nîguo atuîke mûmenyereri wa îthandûkû rîu rîa Ngai-Mûnene.

Samueli nîwathanire Isiraeli

² Narîo îthandûkû rîa Kîrîkanîro rîa Ngai-Mûnene nîrîekarire kûu Kiriathu Jearimu kwa îvinda rîa mîaka mîrongo îîrî. Narîo îvinda rîu rîarî îraca. Nao andû onthe a Isiraeli nîmaarîrîre Ngai-Mûnene nîguo amatethie.

³ Nake Samueli nîwerire andû a Isiraeli atîrî, “Ethîrwa nîmûkwenda gûcokerera Ngai-Mûnene na ngoro yonthe, nwanginya mûthengutie ngai cia kûndû kwîngî wana mûvuanano wa ngai îrîa îtagwa Ashitorathu. Îîvecaneni viû kûrî Ngai-Mûnene na mûmûgooce ke wenga, nake nîakûmûvonokia kuuma kûrî Afilisiti.”

⁴ Kwoguo andû a Isiraeli nîmaathengutirie mîvuanano ya Baali na Ashitarothu na makîgooca Ngai-Mûnene wenga.

⁵ Nake Samueli agîtûmanîra andû onthe a Isiraeli mathiî macemanie Mizipa. Nake nîwamerire atîrî, “Nie nîngaamûvoera kûrî Ngai-Mûnene nîrî Mizipa.”

⁶ Kwoguo nîmaacemanirie kûu Mizipa. O nîmaatavire manjî na makîmetûrûra kîrî ta kîveo kûrî Ngai-Mûnene na makîînyerekia mûthenya ûcio wonthe. Nao nîmaaugire atîrî, “Tue nîtwîvîrîtie Ngai-Mûnene.” (Nake Samueli aacirithagîria andû a Isiraeli kûu Mizipa.)

⁷ Na rîrîa Afilisiti megwire atî andû a Isiraeli nîmaacemanîtie kûu Mizipa, athamaki acio atano a Filisiti nîmaathiîre marî na mbûtû yao ya mbaara nîguo makarûe na Aisiraeli. Rîrîa Aisiraeli meegwire ûguo, nîmeetigîre.

⁸ Nao andû a Isiraeli nîmeerire Samueli atîrî, “Thiî na mbere gûtûvoera kûrî Ngai-Mûnene Ngai wetû nîguo atûvonokie kuuma kûrî Afilisiti.”

⁹ Samueli nîwocire kagondu kanini gakîongaga na agîkaruta karî îtega rîa kûvîvua kûrî Ngai-Mûnene karî kagima. Nîwacokire akîvoera Aisiraeli kûrî Ngai-Mûnene, na Ngai-Mûnene agîcokia mavoya make.

¹⁰ Vîndî îrîa Samueli aarutaga îtega, Afilisiti nîmaakuvîvîrie Aisiraeli nîguo mamatharîkîre; nwatî Ngai-Mûnene nîwarurumîre Afilisiti na mûgambo mûnene kuuma îgûrû, na makîvîngîcîka; nao Aisiraeli makîmariva mûno.

¹¹ Aisiraeli nîmaarûmîrîrie Afilisiti makîmaûragaga kuuma kûu Mizipa nginya vakuvî na îtûûra rîa Bethi-kari.

¹² Samueli nîwacokire agîoca îthiga, na akîrîvanda vau gatagatî ka Mizipa na Sheni, na akîrîtuîra rîîtwa akîrîta “Îthiga rîa Ûtethio,” na akiuga atîrî, “Ngai-Mûnene nîatûtethetie nginya ûmûnthî.”

¹³ Nao Afilisiti makîvootwa viû na matiacoka kûvîtûka mîvaka ya Isiraeli rîngî ûtûûrorî wonthe wa Samueli.

¹⁴ Namo matûûra monthe ma Isiraeli marîa maatavîtwe nî Afilisiti, kwambîrîria Ekironi nginya Gathu magîcokerua Aisiraeli. Kwoguo Aisiraeli nîmoocire rîngî mavûrûri marîa maatavîtwe nî Afilisiti. Nakuo gûkîthîrwa kûrî na thayû gatagatîrî ka Aisiraeli na Aamori.

¹⁵ Nake Samueli nîwathanire kûu Isiraeli ûtûûrorî wake wonthe.

¹⁶ Ke nîwathiûrûrûkaga na akathiî Betheli, Giligali, na Mizipa wa mwaka wa mwaka. Ke aathiîcaga agîtuithanagia maciira ma Aisiraeli kûndû kûu kuonthe.

¹⁷ Nake nîwacokaga akenûka mûciî gwake kûu Rama. Na arî kûu Rama, nîwatucagîra andû a Aisiraeli ciira arî na waragania na agîtumîra Ngai-Mûnene metha ya kûrutîra kîgongoona kuo.