1Sam 6 - ÎVUKU RÎA ÛVORO MWARO

Îthandûkû rîa kîrîkanîro nîrîacokirue

¹ Vuva wa îthandûkû rîa Kîrîkanîro rîa Ngai-Mûnene gwîkara vûrûrirî wa Filisiti îvinda rîa mîeri mûgwanja,

² Afilisiti nîmeetire athînjîri-ngai ciao na aragûri na makîmaûria atîrî, “Nîtwîka atîa na îthandûkû rîa Kîrîkanîro rîa Ngai-Mûnene? Ta twîreni nîtûrîcokia kûrîa riumîte na ndûî?”

³ Nao athînjîri-ngai na aragûri nîmaacokirie makiuga atîrî, “Ethîrwa nîmûgûcokia îthandûkû rîa Kîrîkanîro rîa Ngai wa Isiraeli-rî, mûtikarîcokie mûtarî na kîveo. Nwanginya mûthiî mûrî na kîveo gîa kûrutîra Ngai kîgongoona nîûndû wa wîvia wenyu. Îo nîyo njîra îrîa mûkaavonua nayo mûmenye gîtûmi kîrîa kîratûmaga ekare akîmûverithagia.”

⁴ Nao Afilisiti nîmaaûririe atîrî, “Nî kîveo kîrîkû tûngîmûvirîra gîa kûruta kîgongoona nîûndû wa mevia metû?” Na magîcokia makîmeera atîrî, “Tûnyamû tûtano twa thaavu tûviana nyimba na ngaara ithano îthondeketwe na thaavu, wa îmwe yacio îrî ya mûthamaki ûmwe wa Filisiti. Nîûndû mue muonthe wana athamaki enyu atano mwaverithirue na mûthiro wa mîrimû wata îo.

⁵ Kwoguo nwanginya mue mûthondeke mîvuanano îno ya nyimba na ngaara cienyu irîa icûkagia vûrûri wenyu, na mûgoocithie Ngai wa Isiraeli. Ke avota gûtiga kûmûverithia, ngai cienyu wana vûrûri wenyu.

⁶ Mûngîûmia ngoro cienyu ta ûrîa Amisiri na mûthamaki wao maûmirie ciao nîkî? Ngai averithia Amisiri na mûthamaki wa Misiri mûno-î, kinthî matiarekererie Aisiraeli makiuma Misiri na makîthiî?

⁷ Kwoguo rîu thondekani gîkaari gîcerû Kîam ng'ombe na mwoce ng'ombe igîrî cia gûkamwa ino itarî cianovererwa gîkaarirî rîngî; mwoverere ng'ombe icio gîkaarirî kîu na mwoce tûcaû twacio mûtûvire mûciî na mûtûvingîre rwagarî.

⁸ Na mwoce îthandûkû rîa kîrîkanîro rîa Ngai-Mûnene na mûrîîkîre gîkaarirî kîu na mwîkîre tûnyamû twa thaavu kathandûkûrî na mûkaigîrîre mwenarî warîo. Tûnyamû tûu nîtuo tûrîa mûkûvirîra Ngai-Mûnene kîrî kîveo nîûndû wa mevia menyu. Na mûrekererie gîkaari kîthiî kîrî wa kîo kîene.

⁹ Namue mwîkare mûkîroretie ûrîa gîkûthiî. Ethîrwa nîkîthiî kîerekerete îtûûra rîa Bethi-shemeshu, ûguo nî kuga atî Ngai wa Aisiraeli. Nî ûtûmîte twîthîrwe tûrî na mathîna mana. Nwatî ethîrwa tî kîthiî kîerekerete îtûûra rîu, nîtûkûmenya atî tîke watûretere mûthiro, nwatî nî ûndû wa gûka wa ûguo tu.”

¹⁰ Nao andû acio nîmeekire wa ûguo meerirwe: nîmaanyitire ng'ombe igîrî ciakamagwa, magîcioverera gîkaarirî na makîvingîra tûcaû twacio rwagarî.

¹¹ Nao nîmeekîrire îthandûkû rîa Kîrîkanîro rîa Ngai-Mûnene gîkaarirî wa vamwe na kathandûkû karîa geekîrîtwe mîviano ya ngaara cia thaavu na cia nyimba.

¹² Nacio ng'ombe icio ikîambîrîria kûthiî irûngîrîrîtie njîra îo yathiîte nginya Bethishemeshi. Nacio ciathiîre ikîanagia itakwîvûgûra mwena wa ûrîo kana wa ûmotho. Nao athamaki a Filisiti nîmaathiîre maciumîte vuva nginya magîkinya mûvakarî wa Bethishemeshi.

¹³ Nao andû a kûu Bethishemeshi maakethaga ngano Kîamndarî Kîam mûgûnda. Nao rîrîa maaroririe kîvarirî îgûrû wa rîmwe nîmoonire îthandûkû rîa Kîrîkanîro na magîkena mûno.

¹⁴ Nakîo gîkaari gîkîthiî na gîgîtonya mûgûndarî wa mûthuuri wetagwa Joshua na gîkîrûngama kuo vandû vaarî vakuvî na îthiga înene. Joshua aatûûraga Bethishemeshi. Nao andû magîatûranga mîtî îo yathondekete gîkaari kîu, makîûraga ng'ombe icio na magîitegera Ngai-Mûnene rîrî kîgongoona gîa kûvîvua.

¹⁵ Nao Alawi nîmaarutire îthandûkû rîa kîrîkanîro rîa Ngai-Mûnene gîkaarirî, vamwe na kathandûkû karîa kaarî na tûnyamû twa thaavu ndaarî na makîmaigîrîra îgûrû rîa îthiga rîu înene. Naguo mûthenya ûcio, andû a Bethishemeshi nîmaategere Ngai-Mûnene kîgongoona gîa kûvîvua wana magongoona marîa mengî.

¹⁶ Nao athamaki acio atano a Filisiti moona ûguo, nîmaacokire Ekironi mûthenya wa ûcio.

¹⁷ Nao Afilisiti maavirîre Ngai-Mûnene nyimba ithano cia thaavu irî iveo nîûndû wa mevia mao. Wa îmwe yarutagîrwa îtûûra rîayo; îmwe îkîrutwa nîûndû wa îtûûra rîa Ashidodi, nayo îngî nîûndû wa îtûûra rîa Gaza, nacio icio ciîngî nîûndû wa matûûra ma Ashikeloni, Gathu, na Ekironi.

¹⁸ Wanacio ngaara cia thaavu nîciavirirwe matûûrarî monthe matano marîa maathagwa nî athamaki atano a Filisiti. Wa ngaara îmwe ya thaavu îkîvirwa îtûûrarî rîmwe. Nacio ciavirirwe matûûrarî marîa maarî mairigîre, wana icagirî kûrîa gûtaarî na nthingo. Narîo îthiga rîu înene rîrîa maaigîrîre îthandûkû rîa kîrîkanîro rîa Ngai-Mûnene mûgûndarî wa Joshua kûu Bethi-shemeshu, rîrîvo nginya ûmûnthî na nîrîonanagia ûrîa gwekîkire.

¹⁹ Nake Ngai-Mûnene akîûraga andû mîrongo mûgwanja a kûu Bethi-shemeshu nîûndû nîmaaroririe ndaarî ya îthandûkû rîa Kîrîkanîro rîa Ngai-Mûnene. Nao andû acio engî makîgua kîeva nîûndû wa ûrîa Ngai-Mûnene aaûragîte andû eengî gatagatîrî kao.

Îthandûkû rîa kîrîkanîro nîrîavirirwe Kiriathi-jearimu

²⁰ Kwoguo andû a Bethi-shemeshu nîmaaûririe atîrî, “Nî ûrîkû ûngîvota kûrûngama mbere ya Ngai-Mûnene. Ngai ûyû mûtheru? Nîtûmûvira kû nîguo atûthengutîre?”

²¹ Kwoguo nîmaatûmire anjaama kûrî andû arîa matûûraga Kiriathi Jearimu makameere atîrî, “Afilisiti nîmaracokirie îthandûkû rîa kîrîkanîro rîa Ngai-Mûnene. Nyûrûrûkani mûrîîcîre mûthiî narîo na kûu kwenyu.”