1Sam 5 - ÎVUKU RÎA ÛVORO MWARO

Îthandûkû rîa kîrîkanîro rîrî gatagatîrî ka Afilisiti

¹ Afilisiti maatava îthandûkû rîa kîrîkanîro rîa Ngai, nîmaarîkuuire makîrîruta kûu Ebeneza na makîrîvira îtûûrarî rîao, rîrîa rîetagwa Ashidodi.

² Nao nîmaacokire makîrîoca na makîrîvira hekarûrî ya ngai yao îrîa yetagwa Dagoni, na makîriigîrîra vakuvî na mûvuanano wa ngai îo.

³ Nao andû a Ashidodi maramûka kîraûko tene mûthenya ûcio wîngî, makîthîra mûvuanano ûcio wa Dagoni ûmamîte nthî na îvu namo metho mayo maturumîte nthî vau mbere ya Îthandûkû rîa Kîrîkanîro rîa Ngai-Mûnene. Kwoguo nîmaamîocire na makîmîrûngamia varîa yethagîrwa îrî.

⁴ Nwarî rîrîa maaramûkire kîraûko tene mûthenya ûcio warûmîrîrîte, nîmeethîrîrie mûvuanano ûcio ûmamîte nthî na îvu rîngî mbere ya îthandûkû rîa Kîrîkanîro rîa Ngai-Mûnene. Vîndî îno, kîongo Kîam Dagoni vamwe na njara ciayo cioîrî ciarî vakuvî na mûrango irî munîkangu; mûvuanano ûcio wa Dagoni watigarîte gîcunjî kîu kîngî Kîam mwîrî wayo tu.

⁵ (Kîu nîkîo gîtûmaga athînjîri-Ngai a Dagoni na andû onthe arîa mamîgoocaga kû Ashidodi mathiî kuo na matingîkinya mûrangorî ûcio nginya ûmûnthî.)

⁶ Nake Ngai-Mûnene nîwavere andû a Ashidodi wa vamwe na andû a ndûrîrî irîa ciavakanîte nao îvera înene mûno na akîmeguithia guoya. Narîo îvera rîu rîarî rîa gûtûma andû a Ashidodi vamwe na andû acio engî magîe na nyimba mîîrîrî yao.

⁷ Na rîrîa andû a Ashidodi moonire ûrîa maûndû maathiîre na mbere magîkîkaga nîmaaugire atîrî, “Ngai wa Aisiraeli nîkwa aratûverithia vamwe na Dagoni, ngai yetû. Na nîûndû wa ûguo, tue tûtingîtîkîra îthandûkû rîa Kîrîkanîro rîa Ngai wa Isiraeli rîîkare gwetû rîngî.”

⁸ Kwoguo nîmaatûmire anjaama mathiî magete athamaki onthe atano a Afilisiti maûke vamwe. Nao nîmaaûririe athamaki acio atîrî, “Rîu nîtwîka atîa na îthandûkû rîrî rîa Kîrîkanîro rîa Ngai wa Isiraeli?” Nao athamaki makiuga atîrî, “Ocani Îthandûkû rîa Ngai wa Isiraeli na mûrîvire Gathu.” Kwoguo nîmaakuire îthandûkû rîa Ngai wa Isiraeli na makîrîvira Gathu; Gathu rîarî îtûûra rîngî rîa kûu Filisiti.

⁹ Nwatî vuva wa kûrîkinyia kuo, Ngai-Mûnene nîwaverithirie andû a îtûûra rîu wanao na agîtûma mamake mûno. Ngai-Mûnene aamaverithirie onthe kwambîrîria mwana nginya mûndû mûgima na njîra ya gûtûma magîe na nyimba mîîrîrî yao.

¹⁰ Kwoguo nîmaakuire îthandûkû rîa kîrîkanîro rîa Ngai na makîrîvira îtûûrarî rîngî rîa kûu Filisiti rîetagwa Ekironi. Nwatî rîrîa rîakinyire kuo, andû a Ekironi nîmaanegenire mûno makiugaga atîrî, “Taroriani! Nîmarete îthandûkû rîa Kîrîkanîro rîa Ngai wa Isiraeli gûkû nîguo tûûragwe tuonthe vamwe na andû etû!”

¹¹ Nakuo kûu îtûûrarî rîu rîonthe kwarî na kîmako kînene mûno nîûndû Ngai nîwamaverithagia mûno. Kwoguo nîmaatûmanire na makiuga athamaki onthe a Filisiti metwe maûke vamwe rîngî. Nao nîmeerire athamaki atîrî, “Rutani Îthandûkû rîrî rîa Kîrîkanîro rîa Ngai wa Isiraeli gûkû na mûrîcokie varîa rîagîrîrwe nî kwîthîrwa rîrî, nîguo rîtigatûûrage vamwe na andû a mîciî yetû.”

¹² Nao andû arîa mataakua nîmaanyitirwe nî mûrimû wa nyimba nao andû a îtûûra rîu makûvoya Ngai na Ngai akîgua mavoya mao.