1Sam 4 - ÎVUKU RÎA ÛVORO MWARO

Îthandûkû rîa kîrîkanîro nî rîatavirwe

¹ Vîndî îo Aisiraeli nîmaaumagarire na makîthiî kûrûa na Afilisiti; Kwoguo Aisiraeli nîmaambire magema mao kûu Ebeneza, nao Afilisiti makîamba magema mao kûu Afeku.

² Nao Afilisiti nîmaathithûkîre Aisiraeli na makîambîrîria kûrûa nao. Na vuva wa kûrûa mbaara ndito Afilisiti nîmaavootire Aisiraeli na makîûragîra Aisiraeli ta ngiri inya kûu mbaararî îo.

³ Na rîrîa andû arîa maatigarire maacokire varîa maambîte magema mao, athuuri a Isiraeli nîmaaûranirie atîrî, “Nî ndûî gîatûma Ngai-Mûnene atûrekereria tûvootwe nî Afilisiti ûmûnthî? Tûthiîni tûoce îthandûkû rîa kîrîkanîro rîa Ngai-Mûnene kuuma Shilo tûke narîo gûkû, nîguo tûthiî nake agatûvonokie kuuma kûrî nthû cietû.”

⁴ Kwoguo athuuri acio nîmaatûmire anjaama mathiî Shilo makagîre îthandûkû rîa kîrîkanîro rîa Ngai-Mûnene mwene vinya wonthe, ûrîa wîkaraga gatagatîrî ga Akerubi. Nao anake aîrî a Eli, Hofini na Finehasi wanao nîmaaûkire vamwe na îthandûkû rîa kîrîkanîro.

⁵ Vîndî îrîa îthandûkû rîa kîrîkanîro rîa Ngai-Mûnene rîakinyire kûrîa Aisiraeli maambîte magema mao, andû onthe a Isiraeli nîmaakenire na makiugîrîria na mûgambo mûnene mûno nginya ûgîtûma nthî îrurume.

⁶ Nao Afilisiti megua ûrîa Aisiraeli maaugîrîrîtie, nîmaaugire atîrî, “Ta Thikîrîriani ûrîa înegene rîngîvîîte kûrîa Ahibirania matûûraga! Înegene rîu nîrîandûî?” Na rîrîa maamenyire atî îthandûkû rîa Kîrîkanîro rîa Ngai-Mûnene nîrîakinyîte kûrî Ahibirania,

⁷ Afilisiti nîmeetigîrire na makiuga atîrî, “Ngai nî nginyu kûrîa andû a Isiraeli matûûraga! Na kaî tue tûrî arume-î! Nîûndû ûndû ta ûyû ndwanonekana gatagatîrî getû mbererî!

⁸ Na kaî tue tûrî arume-î! Nî ûrîkû ûngîtûvonokia kuuma kûrî ngai icio irî vinya ûguo? Nacio ngai icio nîcio ciaûragîîre Amisiri werûrî na mîrimû ya mîthemba yonthe!

⁹ Mwîyûmîrîrieni Afilisiti aya na mûrûe ta arûme, nîguo tûtigatuîke ngombo cia Ahibirania ta ûrîa maarî ngombo cietû. Kwoguo rûani ta arûme.”

¹⁰ Kwoguo Afilisiti nîmaarûire na kîîo na makîvoota Aisiraeli. Nao Aisiraeli nîmaathiîre mîciî kwao mavinyûrîte. Nakuo nîkwarî na ûûragani mwîngî mûno, na athigari ngiri mîrongo îthatû a Isiraeli nîmaaûragirwe.

¹¹ Narîo îthandûkû rîa Kîrîkanîro rîa Ngai nîrîatavîrûe; nao anake a Eli oîrî, Hofini na Finehasi makîûragwa.

Gûkua kwa Eli

¹² Nake mûthuuri ûmwe wa kuuma mûvîrîgarî wa Benjamini, nîwaumire kûrîa mbaara yarî, akîthiî avinyûrîte na agîkinya Shilo mûthenya wa ûcio. Mûthuuri ûcio nîwatembûrangîte nguo ciake na ageîtîrîria mûthetu kîongo, rûrî rûûri rwa kwonania ûrîa aarî na kîeva.

¹³ Rîrîa mûthuuri ûcio aakinyire, Eli aaroretie ekarîrîte gîtî rûtere rwa njîra. Ngoro ya Eli nîyatangîkîte mûno nîûndû wa îthandûkû rîa Kîrîkanîro rîa Ngai. Na rîrîa mûthuuri ûcio aatonyire na akîvecana ûvoro îtûûrarî rîu, andû onthe a îtûûra nîmaarîrire mecûrîtwe nî guoya mûno.

¹⁴ Na vîndî îrîa Eli eegwire înegene rîu nîwaûririe atîrî, “Înegene rîu rîonthe nî rîa ndûî?” Nake mûthuuri ûcio nîwathiîre kûrî Eli na îvenya na akîmûmenyithia ûvoro ûcio.

¹⁵ (Vîndî îo Eli aarî na ûkûrû wa mîaka mîrongo kenda na înana na aarî vakuvî gûtuîka ndumumu viû).

¹⁶ Nake mûthuuri ûcio nîwerîre Eli atîrî “Nie nîkwa natoroka nauma mbaararî ûmûnthî na naûka mvinyûrîte nginya gûkû.” Nake Eli nîwaûririe mûthuuri ûcio atîrî, “Nîkwa gwekara atîa, mûûriû wakwa?”

¹⁷ Nake mûnjaama nîwacokirie na akiuga atîrî, “Aisiraeli nîmaaûrire nî Afilisiti; na andû etû eengî mûno maûragwa! Makîria ya ûguo, anake aku Hofini na Finehasi wanao nîmaûragirwe, na îthandûkû rîa Kîrîkanîro rîa Ngai rîatavwa!”

¹⁸ Nake mûnjaama agweta îthandûkû rîa Kîrîkanîro rîa Ngai, Eli agîturûkana nthî na ngara vau mwenarî wa kîvingo. Nake agwa nîwaunîkire ngingo na agîkua, nîûndû aarî mûkûrû na aarî mûrito. Nake eethîrîtwe arî mûtucanîri wa andû a Isiraeli vandû va îtîîna rîa mîaka mîrongo îna.

Gûkua kwa Mûndûmûka wa ndigwa wa Finehasi

¹⁹ Nake mûka wa mûvîcî wa Eli, ûrîa warî mûka wa Finehasi aarî îvu na îvinda rîake rîa gûciara rîarî vakuvî gûkinya. Rîrîa eegwire atî îthandûkû rîa Kîrîkanîro rîa Ngai nîrîtave, na atî îthe wa mûthuuriwe vamwe na mûthuuriwe maarî akuû, nîwambîrîrie wa rîmwe kwîgua ûrûrû rwa kûgîa mwana na nîwaciarire.

²⁰ Na rîrîa aakuvîvîrie gûkua, aka arîa maamûtethagîrîria nîmaamwîrire atîrî, “Îyûmîrîrie! Nîûndû nîwagîa kavîcî!” Nwatî ke ndaamacokeria wanarî ûndû wana kana arûmbûyania na ûvoro ûcio.

²¹ Nake nîwatuîrîre kaana kau rîîtwa Ikabodi. Vîndî wa îo nîwataarîrie na akiuga atîrî, “Riiri wa Ngai nîûthengutîte Isiraeli.” Oorotaga gûtavwa kwa îthandûkû rîa Kîrîkanîro rîa Ngai vamwe na gîkuû Kîam îthe wa mûthuuriwe marî na mûthuuriwe.

²² Nîwaugire atîrî, “Riiri wa Ngai nîûthengutîte Isiraeli, nîûndû îthandûkû rîa Kîrîkanîro rîa Ngai nî rîtave.”