1Sam 31 - ÎVUKU RÎA ÛVORO MWARO

Gûkua gwa Saûlo na Avîcî ake

¹ Afilisiti nîmaarûîre na Aisiraeli Kîrîmarî Kîam Giliboa. Andû eengî mûno a Isiraeli nîmaaûragîrwe kuo. Nao andû acio engî wa vamwe na mûthamaki Saûlo na anake ake nîmaaûrire.

² Nwatî Afilisiti nîmaamarûmîrîrie na makîmakinyîra na makîûraga anake athatû a Saûlo, Jonathani, Abinadabu na Malikishua.

³ Nayo mbaara nîyaûmîre Saûlo mûno, nake ke mwene nîwarathirwe na mîguî nî nthû ciake na nîwativirue mûno.

⁴ Saûlo nîwacokire akîra mwanake ûrîa wamûkuuagîra indo cia mbaara atîrî, “Comora rûviû rwaku na ûmbûrage nîguo Afilisiti aya matetigîrîte Ngai matigaûke kûnthekerera na mambûrage.” Nwatî mwanake ûcio nîwegwire guoya nyîngî mûno na ndangîavotire gwîka ûguo. Kwoguo Saûlo nîwocire rûviû rwake na akîîgwîthia îgûrû rîa ruo.

⁵ Rîrîa mwanake ûcio wamûkuuagîra indo cia mbaara oonire atî Saûlo nîwakua, wanake nîwegwîthirie îgûrû rîa rûviû rwake na agîkua vamwe na Saûlo.

⁶ Ûguo nîguo Saûlo, anake ake athatû, mwanake ûrîa wamûkuuagîra indo cia mbaara na athigari onthe a Saûlo maakwire mûthenya wa ûcio.

⁷ Rîrîa Aisiraeli arîa maarî mwena ûcio wîngî wa Kîamnda Kîam Jezireeli na arîa maarî mwena wa îrathîro wa rûnjî rwa Jorodani meegwire atî andû a Isiraeli nîmaûra, na atî Saûlo na anake ake maarî akuû, nîmaatiganîrie matûûra mao na makîûra. Nao Afilisiti nîmaathiîre na magîtûûra matûûrarî mau.

⁸ Naguo mûthenya ûcio warûmîrîrîte rîrîa Afilisiti maathiîre kwîa indo irîa ciarî na andû arîa maaûragîtwe, nîmoonire ciimba cia Saûlo na anake ake athatû igwîte kûu kîrîmarî Kîam Giliboa.

⁹ Nîmaatinirie kîongo gîa Saûlo na makîmûruta nguo ciake cia mbaara. Nîmaacokire magîtûma anjaama vûrûrirî wonthe wa Afilisiti makamenyithanie ûvoro ûcio mwaro kûrî ngai ciao cia mîvuanano, na kûrî andû ao.

¹⁰ Nîmaacokire makiga nguo ciake cia mbaara hekarûrî ya Ashitorathu, ngai yao na makîvûrîra kimba gîake na mîcumarî rûthingorî rwa îtûûra rîa Bethi Shani.

¹¹ Nwatî rîrîa andû a Jabeshi îrîa îrî Gileadi meegwire ûrîa Afilisiti meekîte Saûlo,

¹² andû onthe arîa aûmîrîru mûno nîmaathiîre ûtukû mûgima nginya magîkinya Bethi Shani. Nîmaacurûkirie mwîrî wa Saûlo na mîîrî ya anake ake kuuma rûthingorî, makîmîvira Jabeshi na makîmîvîvîria kuo.

¹³ Nîmaacokire magîoca mavîndî ma andû acio na makîmathika rungu rwa mûtî ûrîa wîtagwa mûkarakaba ûrîa warî îtûûrarî rîu rîa Jabeshi na makîînyerekia mîthenya mûgwanja.