1Sam 30 - ÎVUKU RÎA ÛVORO MWARO

Daudi nîwarûire na Amaleki

¹ Vuva wa mîthenya îthatû, Daudi marî na andû ake nîmaacokire Zikilagi. Nao Amaleki nîmaatharîkîrîte mwena wa îveti wa Juda na makavoota îtûûra rîa Zikilagi na nîmaarîvîvîtie

² na nîmaatavîte aka na andû onthe arîa maarî îtûûrarî rîu. Matiaûragîte wanarî mûndû, nwatî nîmaathiîte na andû onthe, mûnini na mûnene.

³ Rîrîa Daudi na andû ake maakinyire îtûûrarî, nîmeethîrîrie îtûûra rîrî rîvîvie na aka, anake na erîtu ao maarî atave na makathiîwa nao.

⁴ Daudi na andû ake nîmaambîrîrie kûrîra nginya makathirîrwa nî vinya.

⁵ Aka a Daudi, Ahinoamu na Abigaeli wanao nîmaatavîtwe.

⁶ Vîndî îo Daudi aarî na thîna nyîngî, nîûndû andû ake maarî na marûrû meengî mûno nîûndû wa kûûrîrwa nî ciana ciao. Nao nîmeendaga kûriva Daudi na mathiga, nwatî nîweyûmîrîrie nîûndû wa kwîvoka Ngai-Mûnene, Ngai wake.

⁷ Nake Daudi nîwerire mûthînjîri-Ngai Abiatharu mûvîcî wa Ahimeleku atîrî, “Ta ndetera efodi.” Nake Abiatharu nîwavirîre Daudi efodi.

⁸ Nake Daudi nîwaûririe Ngai-Mûnene atîrî, “Nthiî nûmîrîre gîkundi gîkî? Nîngûgîkinyîra?” Nake Ngai-Mûnene nîwacokirie atîrî, “Îî kîrûmîrîre nîûgûgîkinyîrîra na ûvonokie andû arîa atave.”

⁹ Kwoguo Daudi na andû ake magana matandatû nîmaathiîre. Rîrîa maakinyire karûnjîrî ka Besori, andû amwe nîmaatigirwe vau.

¹⁰ Nwatî Daudi nîwathiîre na mbere kûmarûmîrîria marî na andû magana mana. Andû acio engî nîmaatigirwe nîûndû maarî anogu mûno matingîavotire kûringa karûnjî kau.

¹¹ Andû arîa maarî na Daudi nîmeethîrîrie Mûmisiri kûu werûrî. Nao nîmaamûvirire kûrî Daudi na makîmûva irio na manjî,

¹² kîenyûa Kîam ngûû irî nyûmithie, na icunjî igîrî cia thavibu. Na rîrîa aarîkirie kûrîa, ke nîwacokirwe nî vinya nîûndû ndaarîte irio kana anyua manjî kwa îvinda rîa mîthenya îthatû.

¹³ Daudi nîwamûûririe atîrî, “Mwathi waku nû, na umîte kû?” Nake nîwacokirie atîrî, “Nie nîrî mwanake Mûmisiri na nîrî ndungata ya Mûamaleki. Mwathi wakwa aandigire ava mîthenya îthatû mîthiru narwara.

¹⁴ Nîtwatharîkîrîte vûrûri wa Akerethi ûrîa ûrî mwena wa îveti wa Juda, wana vûrûri wa mûvîrîga wa Kalebu, na tûkîvîvia Zikilagi na mwaki.”

¹⁵ Daudi nîwamûririe atîrî, “Nîûkûmvira kûrî gîkundi kîu?” Nake Mûmisiri nîwacokirie atîrî, “nîngûmûvira ethîrwa nîkûmbîrîra na rîîtwa rîa Ngai atî ndûkûmbûraga kana ûnenganîra kûrî mwathi wakwa.”

¹⁶ Nake nîwavirire Daudi kûrîa gîkundi kîu Kîamrî. Nao athigari acio a Amaleki maanyagarûkîte kûu kuonthe, makîrîcaga, makînyunyaga na makinaga, nîûndû indo irîa maatavîte kuuma vûrûrirî wa Afilisiti na wa Juda ciarî nyîngî mûno.

¹⁷ Nake Daudi nîwamatharîkîre kîraûko tene mûthenya ûcio wîngî na nîwarûire nao nginya kîvwaî. Gûtirî mûndû wanarî ûmwe wao wavonokirie, tiga anake magana mana arîa maatwîre ngamîîra na makîûra.

¹⁸ Daudi nîwavonokirie andû onthe na indo cionthe irîa Amaleki maatavîte vamwe na aka ake oîrî.

¹⁹ Gûtirî kîndû wanarî kîmwe Kîamûrire. Daudi nîwacokithirie anake na erîtu onthe a andû ake wa vamwe na indo cionthe irîa ciatavîtwe nî Amaleki.

²⁰ Nîwacokire agîcokithia ng'ombe na ng'ondu. Nao andû ake nîmaavirire ndîthia icio mbere na ikîmatongoreria na nîmaathiîre makiuga atîrî, “Ino nî indo irîa Daudi atavîte.”

²¹ Daudi nîwacokire akîthiî kûrî andû arîa magana maîrî arîa maarî anogu na maaremirwe nî kûmûrûmîrîra na maatigîtwe karûnjîrî ka Besori. Andû acio nîmaathiîre gûtûnga Daudi na andû ake, nake Daudi nîwamakuvîvîrie na akîmakethia akenete mûno.

²² Nwatî andû amwe maarî athunu na mataarî na vata gatagatîrî ka andû arîa maathiîte na Daudi nîmaaugire atîrî, “Tûtiathiî nao, kwoguo tûtikûmava kîndû wanarî kîmwe Kîam irîa tûtavîte. Nîmoce aka ao na ciana na menûke.”

²³ Nwatî Daudi nîwaugire atîrî, “Ariû a vava, mûtingîvota gwîka ûguo na kîrîa Ngai-Mûnene atûvete! Ke nîwatûvonokirie na agîtûma tûvoote athigari arîa twarûaga nao.

²⁴ Gûtirî mûndû ûngîtîkania na ûguo mûrauga! Andû onthe nwanginya magaane indo megananîte. Mûndû ûrîa wathiîre mbaararî na ûrîa watigirwe ekarîtie mîrigo nîmavewe indo ûndû ûmwe.”

²⁵ Daudi nîwatuire ûndû ûcio watho wa kûrûmîrîrwa kûu Isiraeli kuuma mûthenya ûcio.

²⁶ Rîrîa Daudi aacokire Zikilagi, nîwavecanire indo imwe cia irîa ciatavîtwe kûrî arata ake arîa maarî atongoria a Juda, na akîmeera atîrî, “Gîkî nîkîo kîveo kîenyu kîrîa kiumîte kûrî indo irîa itavîtwe kuuma kûrî nthû cia Ngai-Mûnene.”

²⁷ Nîwavecanire indo imwe kûrî andû a Betheli, kûrî andû a Ramothu arîa marî mwena wa îveti wa Juda, kûrî andû a Jatiru,

²⁸ Aroeri, Sifimothu, Eshitemo,

²⁹ Rakali, matûûrarî ma Ajerameeli, matûûrarî ma Aakeni,

³⁰ andû a Horima, Borashani, Athaki,

³¹ Heburoni, na kûndû kuonthe kûrîa Daudi na andû ake maaûrûraga.