1Sam 3 - ÎVUKU RÎA ÛVORO MWARO

Ngai-Mûnene nîwaumîrîre Samueli

¹ Nake mwanake ûcio wetagwa Samueli nîwathiîre na mbere gûtungatîra Ngai-Mûnene akîonagîrîrua nî Eli. Vîndî îo ndûmîrîri ciumîte kûrî Ngai-Mûnene vamwe na cioneki itiethagîrwa irî nyîngî.

² Mûthenya ûmwe Eli, (ûrîa kavindarî kau aarî vakuvî gûtuîka ndumumu), nîwamamîte nyombarî yake.

³ Nake Samueli aamamîte hekarûrî ya Ngai-Mûnene kûrîa îthandûkû rîa Ngai-Mûnene rîaigîtwe. Mbere ya gûkîe, wa taa îgîakanaga,

⁴ Ngai-Mûnene nîwetanire akiuga atîrî, “Samueli! Samueli!” Nake Samueli agîcokia atîrî, “Îî nîrî ava.”

⁵ Nake nîwathiîre avinyûrîte kûrî Eli na akîmwîra atîrî, “Nie nîrî ava, nîûndû we nîwambîta.” Nwatî Eli nîwerire Samueli atîrî, “Nie ndirî mûgwîtu, coka ûkamame.” Kwoguo Samueli nîwacokire na akîmama.

⁶ Nake Ngai-Mûnene nîwetanire rîngî akiuga atîrî, “Samueli!” Nake Samueli nîwaûkîrire na akîthiî kûrî Eli na akîmwîra atîrî, “Nie nîrî ava, nîûndû nîwambîta.” Nwatî Eli nîwamûcokerie atîrî, “Nie ndirî mûgwîtu mûrîcîwa, thiî ûkamame rîngî.”

⁷ Samueli ndaamenyaga atî nî Ngai-Mûnene wamwîtaga na ndaarî mûguûrîrie mûgambo wa Ngai-mûnene.

⁸ Nake Ngai-Mûnene nîwetire Samueli rîngî riita rîa kathatû; Samueli nîwaramûkire na akîthiî kûrî Eli, na akîmwîra atîrî, “Nie nîrî ava, nîûndû we nîwambîta.” Nake Eli nîwamenyire atî, nî Ngai-Mûnene wetaga mwana ûcio.

⁹ Kwoguo Eli nîwerire Samueli atîrî, “Coka ûkamame; na ethîrwa nîagûgwîta rîngî, uuge atîrî, ‘Aria Ngai-Mûnene, nîûndû ndungata yaku nîîthikîrîrîtie.’ ” Kwoguo Samueli nîwacokire akîthiî kûmama.

¹⁰ Nake Ngai-Mûnene nîwaûkire na akîrûngama vakuvî na varîa Samueli aamamîte na agîtana wata ûrîa eetanaga mbererî, na akiuga atîrî, “Samueli! Samueli!” Nake Samueli agîcokia na akiuga atîrî, “Aria, nîûndû ndungata yaku nîîthikîrîrîtie.”

¹¹ Nake Ngai-Mûnene nîwerire Samueli atîrî, “Ta roria, nîrî vakuvî gwîka ûndû mûcûku kûrî andû a Isiraeli na mûndû wonthe ûrîa ûkaawîgua nîakaamaka.

¹² Mûthenya ûcio nîrîo ngaavingia maûndû monthe marîa naririe megiî Eli na andû a mûciî wake, kuuma Kîammbîrîria nginya mûthiia.

¹³ Nie nîmbîrîte Eli atî, nîngaaverithia andû a mûciî wake tene na tene nîûndû wa mîtugo mîcûku ya kûnuma îrîa îthîrîtwe îrî na anake ake. Eli ke mwene nîwaicî atî avîcî ake nîmeekaga maûndû macûku, nwatî ndaamakaania.

¹⁴ Kwoguo nie nînîîvîtîte nîûndû wa andû a mûciî wa Eli ngauga, atî wîvia ûyû wîkîtwe nî andû a mûciî wa Eli ndûkaavota kûtherua nî kîgongoona wana kana îtega tene na tene.”

¹⁵ Samueli nîwathiîre na mbere kûmama nginya kîraûko; agîcoka akîramûka na akîvingûra mîrango ya nyomba ya Ngai-Mûnene. Nake nîwetigagîra kûmenyithia Eli ûvoro wîgiî kîoneki kîu.

¹⁶ Nwatî Eli nîwetire Samueli na akiuga atîrî, “Samueli, mûûriû wakwa!” Nake Samueli agîcokia na akiuga atîrî, “Îî nie nîrî ava.”

¹⁷ Nake Eli nîwaûririe Samueli atîrî, “Ngai-Mûnene arakwîrire atîa? Mbîra maûndû monthe. Ngai nîagaakûverithia mûno ethîrwa tî ûmbîra maûndû monthe marîa arakwîrire.”

¹⁸ Kwoguo Samueli nîwamwîrire maûndû monthe atakûmûthitha wanarî ûndû. Nake Eli akiuga atîrî, “Ke nîke Ngai-Mûnene, tiga eke ûndû wa wonthe ûrîa ke akwona ûrî mwaro.”

¹⁹ Nake Samueli nîwakûrire arî ûrûmwe na Ngai-Mûnene; nake Ngai-Mûnene agîtûma maûndû monthe marîa Samueli aarîtie mavinge.

²⁰ Nao andû a Isiraeli, kuuma Dani nginya Berishiba nîmaamenyire atî, na ma Samueli aarî mûrathi wa Ngai-Mûnene.

²¹ Nake Ngai-Mûnene nîwathiîre na mbere kwîyonithania kûu Shilo. Kûu nîkuo Samueli aarî vîndî îrîa Ngai-Mûnene aamumîrîrîte na akîmwarîria. Nake Samueli nîwavecanire ndûmîrîri ya Ngai-Mûnene kûrî andû onthe a Isiraeli na makîmîamûkîra.