1Sam 28 - ÎVUKU RÎA ÛVORO MWARO

¹ Vuva wa ûguo, Afilisiti nîmaaûnganirie athigari ao a mbaara nîguo makarûe na Aisiraeli. Nake Akishi nîwerire Daudi atîrî, “We nîwicî waro atî, we mûrî na andû aku nîmûrûa mûrî mwena wakwa.”

² Nake Daudi nîwerire Akishi atîrî, “Îî nîguo. Nie nîrî ndungata yaku na nîûkwîyonera we mwene ûrîa nîngîka.” Nake Akishi nîwerire Daudi atîrî, “Nî waro mûno! Nîngûgûtua mûthigari wa kûnangagîra vîndî cionthe.”

Saûlo nîwatuîririe ûvoro kûrî mûndû mûgo.

³ Vîndî îo Samueli aarî mûkuû, na andû onthe a Isiraeli makamûrîrîre na makamûthika îtûûrarî rîake rîa Rama. Nake Saûlo nîwavinyûrîtie ago onthe na oni maûndû makauma Isiraeli.

⁴ Athigari a Afilisiti nîmaûnganire na makîamba magema mao îtûûrarî rîa Shunemu. Nake Saûlo nîwaûnganirie Aisiraeli na makîamba magema mao kîrîmarî Kîam Giliboa.

⁵ Rîrîa Saûlo oonire athigari a mbaara a Afilisiti, nîwetigîre na akîmaka mûno.

⁶ Kwoguo nîwaûririe ûtaaro kuuma kûrî Ngai-Mûnene, nwatî ndaamûcokeria wanarî vanini na njîra ya iroto kana na njîra ya Urimu na Thumimu kana na njîra ya arathi.

⁷ Saûlo nîwacokire akîra ndungata ciake atîrî, “Njarîriani mûndûmûka mûndûmûgo, nîguo nthiî ngatuîrie ûvoro kuuma kûrî ke.” Nacio ndungata ciake nîciamwîrire atîrî, “Nî varî mûndûmûka ûmwe mûndû mûgo ûrî Endori.”

⁸ Kwoguo Saûlo nîwegarûrire nîguo ndakamenyeke na nîwekîrire nguo ciîngî na makîthiî marî na andû engî aîrî kwona mûndûmûka ûcio ûtukû. Nake Saûlo nîwerire mûndûmûka ûcio atîrî, “Ta ragûra na njîra ya roho na ûndetere mûndû ûrîa ngûgweta.”

⁹ Nake mûndûmûka ûcio nîwaugire atîrî, “Nama we nîwîcî ûrîa mûthamaki Saûlo ekîte, ûrîa avinyûrîtie ago na arogi makauma Isiraeli. Ûrageria kûnyitithia nîkî nîguo mbûragwe?”

¹⁰ Nake Saûlo nîwevîtire na akîîra mûndûmûka ûcio atîrî, “Nie nînîîvîta na Ngai-Mûnene ûrîa ûtûûraga mwoyo atî, we ndûkaaverithua nîûndû wa gwîka ûguo.”

¹¹ Nake mûndûmûka ûcio nîwaûririe Saûlo atîrî, “Ûrenda ngwîtîre û?” Nake Saûlo nîwacokirie atîrî, “Mbîtîra Samueli.”

¹² Rîrîa mûndûmûka ûcio oonire Samueli, nîwaririe na mûgambo mûnene na akîûria Saûlo atîrî, “Wamveenia nîkî? We nîwe Saûlo!”

¹³ Nake mûthamaki nîwerire mûndûmûka ûcio atîrî, “Tiga kûmaka, nî ndûî ûrona?” Nake mûndûmûka nîwerire Saûlo atîrî, “Nîrona ngai îkiuma nthî.”

¹⁴ Saûlo nîwaûririe mûndûmûka atîrî, “Ûrona îkariî ta ndûî?” Nake mûndûmûka ûcio nîwacokirie atîrî, “Nî mûthuuri mûkûrû aunûkîtie na ekîrîte nguo ndaca.” Nake Saûlo nîwamenyire atî mûthuuri ûcio aarî Samueli na nîwenamîrîrie ûthiû wake nthî arî na gîtîîo.

¹⁵ Nake Samueli nîwaûririe Saûlo atîrî, “Ûranthînia nîkî na njîra ya gûtûma mbûke gûkû?” Nake Saûlo nîwacokirie atîrî, “Nie nînîrathînîka mûno, nîûndû Afilisiti nîmararûa nanie, na Ngai nîandiganîrîtie. Ke ndaranjokeria ûndû wanarî ûrîkû na njîra ya arathi kana ya iroto. Kwoguo nagwîta nîguo ûmbîre ûrîa mbagîrîrwe nî gwîka.”

¹⁶ Nake Samueli nîwerire Saûlo atîrî, “Ûrambîta rîrîa Ngai-Mûnene agûtiganîrîtie na agatuîka nthû yaku nîkî?

¹⁷ Ngai-Mûnene agwîkîte ûrîa aakwîrire na njîra yakwa. Nîathengutîtie ûthamaki kuuma kûrî we na akaûnenganîra kûrî Daudi.

¹⁸ Nîwaregire gwîka ûrîa Ngai-Mûnene aakwathîte na ûkîrega gûcûkangia Amaleki na kîrîa kîonthe maarî nakîo viû. Kîu nîkîo kîratûma Ngai-Mûnene agwîke ûndû ûyû rîu.

¹⁹ Ngai-Mûnene nîagaakûrekereria we vamwe na Aisiraeli kûrî Afilisiti. We mûrî na anake aku mûkethîrwa mûrî vamwe nanie rûyû. Ngai-Mûnene nîakaarekereria athigari a Isiraeli wanao kûrî Afilisiti.”

²⁰ Saûlo nîwagwîre nthî wa rîmwe ecûrîtwe nî guoya nîûndû wa ûrîa Samueli aaugîte. Ke ndaarî na vinya nîûndû mûthenya ûcio wonthe wana ûtukû ndaarîte wanarî kîndû.

²¹ Nake mûndûmûka ûcio nîwacokire akîthiî kûrî Saûlo, na ona ûrîa aamakîte nîwamwîrire atîrî, “Mwathi wakwa, nînîîtonyirie ûgwatirî wa gîkuû rîrîa mbîtîkîrire gwîka ûrîa we ûmbîrire.

²² Rîu nîngûkûria wanawe wîtîkîre ûrîa ngûkûria. Tiga ngûthondekere irio ûrîe nîguo ûgîe na vinya wa kûthiî!”

²³ Saûlo nîwaregire na akiuga ndakûrîa wanarî kîndû. Nwatî ndungata ciake vamwe na mûndûmûka ûcio nîmaamûringîrîrie arîe nginya agîtîkîra. Nîwaûkîrire kuuma nthî na agîkarîra gîtanda.

²⁴ Mûndûmûka ûcio nîwathînjire njaû noru îrîa aarî nayo na îvenya, agîcoka agîoca mûtu wa ngano, agîûkanda na akîthondeka mîgate îtarî na ndawa ya kwimbia.

²⁵ Nîwanengerire Saûlo na ndungata ciake irio icio, nao nîmaairîre. Nîmaacokire makîthiî ûtukû wa ûcio.