1Sam 27 - ÎVUKU RÎA ÛVORO MWARO

Daudi arî gatagatîrî ka Afilisiti

¹ Daudi nîweîrire na ngoro atîrî, “Mûthenya ûmwe Saûlo nîakambûraga. Kwoguo ûndû ûrîa mwaro makîria nîngîka nî kûra nthiî vûrûrirî wa Afilisiti. Vîndî îo Saûlo nîagaatiga kûnjaria kûu vûrûrirî wonthe wa Isiraeli, na ngethîrwa nîrî mûgitîre kuuma kûrî ke.”

² Kwoguo Daudi marî na andû ake magana matandatû nîmaathiîre wa rîmwe kwî Akishi mûvîcî wa Maoku, mûthamaki wa Gathu.

³ Daudi na andû ake nîmaatûûranirie na Akishi kûu Gathu. Na wa mûndû aarî na andû a mûciî wake. Daudi aarî na aka ake aîrî, Ahinoamu kuuma Jezireeli na Abigaeli wa kuuma Karimeli, ûrîa warî mûka wa ndigwa wa Nabali.

⁴ Rîrîa Saûlo eerirwe atî Daudi nîwaûrîte akathiî Gathu, nîwatigire kûmûcaria rîngî.

⁵ Daudi nîwacokire akîra Akishi atîrî, “Ethîrwa nîrî mûrata waku, mva îtûûra rînini ndûûre kuo. Gûtirî na vata wa tûtûûre nawe îtûûrarî rîrîa rînene.”

⁶ Kwoguo Akishi nîwavere Daudi îtûûra rîa Zikilagi, na nîûndû wa ûguo îtûûra rîa Zikilagi rîtwîre rîrî rîa athamaki a Juda nginya ûmûnthî.

⁷ Daudi aatûûrire vûrûrirî wa Afilisiti îvinda rîa mwaka ûmwe na mîeri îna.

⁸ Kavindarî kau, Daudi na andû ake nîmaatharîkîre andû a Geshuri, Agirizi na Amaleki, arîa maatûûraga kuuma tene vûrûrirî ûrîa umîte Shuri nginya Misiri.

⁹ Daudi nîwaûragire arûme na aka onthe vûrûrirî ûcio na agîtavaga ng'ondu, ng'ombe, mvunda, ngamîîra wana nguo. Nake nîwacokaga kûrî Akishi.

¹⁰ Nake Akishi angîamûririe atîrî, “Wauma kûtharîkîra kû ûmûnthî?” Daudi nîwamwîraga atî ke aathiîte mwena wa îveti wa Juda, kana vûrûrirî wa Ajerahameeli, kana vûrûrirî wa Akeni.

¹¹ Daudi nîwaûragaga arûme na aka onthe nîguo mûndû wanarî ûmwe ndakathiî Gathu auga ûrîa Daudi na andû ake meekîte. Ûguo nîguo Daudi eekaga vîndî îrîa yonthe aatûûrire Filisiti.

¹² Nwatî Akishi nîwetîkirie Daudi na akîîra na ngoro atî, Daudi nîwathûrîtwe mûno nî andû ake a Isiraeli, na kwoguo nîatûûra andungatagîra vîndî cionthe.