1Sam 26 - ÎVUKU RÎA ÛVORO MWARO

Daudi nîwaregire kûûraga Saûlo rîngî

¹ Andû amwe nîmaaumire Zifu na makîthiî kûrî Saûlo kûu Gibea. Nao nîmaamwîrire atî Daudi eethithîte kîrîmarî gîa Hekila, kîrîa kîrî mûthiiarî wa werû wa Judea.

² Nake Saûlo nîwathiîre na îvenya werûrî wa Zifu arî na athigari ngiri ithatû (3,000) arîa maathuurîtwe kuuma kûrî athigari a Isiraeli gûcaria Daudi.

³ Nake Saûlo nîwambire magema make njîrarî îrîa îrî vakuvî na kîrîmarî gîa Hakila mwena wa îrathîro wa werû. Rîrîa aamenyire atî Saûlo nîwaûkîte kûmûcaria,

⁴ nîwatûmire anjaama mathiî magatuîrie ûvoro ûcio waro, na nîwamenyire na ma atî Saûlo aarî kuo.

⁵ Daudi nîwathiîre varîa Saûlo aambîte magema make na akîona varîa Saûlo aamamîte marî na Abineri, mûvîcî wa Neri ûrîa warî mûnene wa athigari a Saûlo. Saûlo aamamîte ndaarî ya îgema nao athigari maambîte magema mamûthiûrûrûkîrîtie.

⁶ Daudi nîwaûririe Ahimeleku ûrîa Mûhiti na Abishai mûrwang'ina na Joabu (ng'ina eetagwa Zeruia) atîrî, “Nî ûrîkû gatagatîrî kenyu muoîrî tûkûthiî nake îgemarî rîa Saûlo?” Nake Abishai nîwacokirie atîrî, “Nî nie.”

⁷ Kwoguo ûtukû ûcio Daudi na Abishai nîmaathiîre na magîtonya kûrîa Saûlo maambîte magema. Nao nîmeethîre Saûlo amamîte gatagatî narîo îtumû rîake rîmundithîtue nthî vakuvî na kîongo gîake. Nake Abineri na athigari acio engî mamamîte mamûthiûrûrûkîrîtie.

⁸ Abishai nîwerire Daudi atîrî, “Ngai nîanenganîrîte nthû yaku kûrî we ûmûnthî. Mbîtîkîria nîmûmunde na îtumû rîu rîake, nîmûmunda riita rîmwe nînîmûmundithanie na nthî, tînîmûmunda maita maîrî!”

⁹ Nwatî Daudi nîwerire Abishai atîrî, “Ndûkamûrage! Ngai-Mûnene nwa averithie mûndû wa wonthe ûrîa ûngîka mûthamaki ûrîa ke athuurîte ûûru.”

¹⁰ Daudi nîwathiîre na mbere kwaria, na nîwaugire atîrî, “Wata ûrîa Ngai-Mûnene atûûraga mwoyo, nie nîmbicî, atî Ngai-Mûnene nîke ûkaaûraga Saûlo rîrîa mûthenya wake wa gûkua ûgaakinya kana agaakuîra mbaararî.

¹¹ Ngai-Mûnene nîangirîtie ndigeke mûndû ûrîa atuîte mûthamaki ûûru! Tigani tûoce îtumû rîîrî rîrî vakuvî na kîongo gîake na mûcuva wake wa manjî tûkînathiî.”

¹² Kwoguo Daudi nîwocire îtumû na mûcuva wa manjî irîa ciarî vakuvî na kîongo gîa Saûlo na makîthiî. Gûtirî mûndû wanarî ûmwe wonire kana amenya ûrîa gwekîkîte, wana gûtirî mûndû waûkîrire. Onthe maarî toro nîûndû Ngai-Mûnene nîke watûmîte manyitwe nî toro nene mûno.

¹³ Daudi nîwacokire akîthiî mwena ûcio wîngî wa Kîamnda na nîwarûngamire îgûrû rîa kîrîma varaca kuuma kûrî Saûlo,

¹⁴ na nîwaugîrîrie athigari a Saûlo, Abineri mûvîcî wa Neri na akiuga atîrî, “Abineri! Angwa nîûrambîgua?” Nake Abineri nîwaûririe atîrî, “Nîûrîkû ûcio ûraugîrîria agîîtaga mûthamaki?”

¹⁵ Nake Daudi nîwacokerie Abineri atîrî, “Kinthî tîwe njamba îrîa nene mûno gûkû Isiraeli? Ûrarega kûgitîra mûnene waku, mûthamaki nîkî? Wa rîu kûrî mûndû ûratonyete kûu akîenda kûraga mûnene waku.

¹⁶ Ûguo wîkîte tî waro. Nîrevîta na Ngai-Mûnene ûrîa ûtûûraga mwoyo atî, we wagîrîrwe nî kûragwa, nîûndû ndûnagitîra mûnene wenyu ûrîa Ngai-Mûnene aathuurire atuîke mûthamaki. Taroriani wone îtumû rîa mûthamaki rîrî kû? Naguo mûcuva wa manjî ûrîa ûrarî vakuvî na kîongo gîake ûrî kû?”

¹⁷ Saûlo nîwamenyire mûgambo wa Daudi na nîwaûririe atîrî, “Daudi mûvîcîwa, nîwe?” Nake Daudi nîwacokirie atîrî, “Îî nînie mwathi wakwa mûthamaki.”

¹⁸ Ke nîwacokire akiuga rîngî atîrî, “Nîndûî kîratûma mwathi wakwa ûnûmîrîrie nginya rîu, nie ndungata yaku? Ngwîkîte atîa? Nî ûûru ûrîkû mbîkîte?

¹⁹ Mwathi wakwa, rîu thikîrîria ûrîa ndungata yaku îkuga. Ethîrwa nî Ngai-Mûnene ûtûmîte wende kûmbûraga, nînîmûrutîra îtega nîguo agarûre îtua rîake. Nwatî ethîrwa nî andû matûmîte, Ngai-Mûnene arotûma magwatwe nî kîrumi nîûndû nîmamîngatîte ngauma îgairî rîrîa Ngai-Mûnene aatûveere na makiuga atî, ‘Thiî ûgatungatîre ngai ng'eni.’

²⁰ Kwoguo ndûkareke mbûragîrwe vûrûrirî mûgeni kûraca na Ngai-Mûnene. Nîndûî kîratûma mûthamaki wa Isiraeli aûka kûmbûraga na mvana ta nthua na anguîme ta gîconi irîmarî?”

²¹ Nake Saûlo nîwacokirie atîrî, “Nie nîmvîtîtie. Coka Daudi mwana wakwa! Ndigaacoka gûgwîka ûûru rîngî, nîûndû nîwamvonokia ûmûnthî. Nie nîrekariî ta kîrimû, na nîmbîkîte ûndû mûcûku mûno.”

²² Nake Daudi nîwacokirie atîrî, “Mwathi wakwa, îtumû rîaku nîrîo rîrî. Tûma ûmwe wa anake aku aûke arîoce.

²³ Ngai-Mûnene nîarathimaga andû arîa athingu na evokeku. Ûmûnthî Ngai-Mûnene nîarakûrekereretie njararî ciakwa, nwatî ndinagwîka ûûru nîûndû Ngai-Mûnene nîakûthuurîte ûtuîke mûthamaki.

²⁴ Wata ûrîa nie nakûvonokia ûmûnthî, Ngai-Mûnene arombîka wata ûguo na andute mathînarî monthe!”

²⁵ Nake Saûlo nîwerire Daudi atîrî, “Ngai-Mûnene arokûrathima mûvîcîwa. Ûrovootanaga maûndûrî monthe marîa ûgekaga!” Kwoguo Daudi nîwethiîrîre, nake Saûlo agîcoka gwake mûciî.