1Sam 24 - ÎVUKU RÎA ÛVORO MWARO

Daudi nîwaregire kûûraga Saûlo.

¹ Rîrîa Saûlo aacokire aumîte kûrûa na Afilisiti, nîwerirwe atî Daudi aarî werûrî wa Engedi.

² Saûlo nîwocire athigari ngiri ithatû (3,000) arîa maarî aro mûno gatagatîrî ka athigari a Isiraeli na akîthiî gûcaria Daudi na andû ake mwena wa îrathîro wa mathiga ma mbûri cia werûrî.

³ Saûlo nîwakinyire ngurungarî ya vandû vaarî na njaga cia ng'ondu rûtere rwa njîra na nîwatonyire ndaarî nîguo etethie. Nakuo kûu ngurungarî îo ndaarî nîkuo Daudi na andû ake meethithîte.

⁴ Nao andû a Daudi nîmaamwîrire atîrî, “Gaka nîko kamweke gaku, nîûndû ûmûnthî nîguo mûthenya ûrîa Ngai-Mûnene aakwîrire atî nîakaanenganîra nthû yaku njararî ciaku, nawe nîûkaamwîka wa ûrîa wonthe ûkeenda kûmîka.” Nake Daudi nîwathiîre acemete na agîtinia gîcûrî Kîam nguo ya Saûlo îrîa ndaca atakûmenya.

⁵ Nwatî vuva wa gwîka ûguo, thamiri ya Daudi nîyambîrîrie kûmûcuka nîûndû nîwatinirie gîcûrî Kîam nguo ya Saûlo.

⁶ Nake nîwerire andû ake atîrî, “Ngai-Mûnene arongiria nîguo ndigeeka mwathi wakwa ûndû mûcûku, nîûndû nî Ngai-Mûnene ûmûthuurîte atuîke mûthamaki! Ndiagîrîrwe nî kûmwîka ûndû mûcûku, nîûndû ke nîke mûthamaki ûrîa Ngai-Mûnene amûrîte!”

⁷ Kwoguo na njîra ya ciugo icio Daudi nîweguithirie andû ake atî matikatharîkîre Saûlo. Nake Saûlo nîwarûngamire, akiuma ngurungarî îo na akîthiî.

⁸ Vuvarî Daudi wanake nîwaumire ngurungarî na agîîta Saûlo, “Mwathi wakwa mûthamaki!” Saûlo nîwevûgûrire, nake Daudi nîwenamîrîre na agîturumithia ûthiû wake nthî na wînyivia

⁹ na akîîra Saûlo atîrî, “Nîndûî gîtûmaga ûthikîrîrie andû arîa makwîraga atî, Daudi nîarenda gûkûgera ngero?

¹⁰ Taroria, ûmûnthî we nîweyonera ûrîa Ngai-Mûnene arakûnenganîrîte kûrî nie kûu ngurungarî? Andû amwe akwa nîmambîraga ngûrage, nwatî nîngwîguîrîre ntha na nauga atî, ndingîgwîka ûûru wanarî vanini nîûndû Ngai-Mûnene nîakûthuurîte ûtuîke mûthamaki.

¹¹ Taroria, vava, taroria wone gîcûrî Kîam nguo yaku îrîa ndaca gîkî nyitîte! Nîngîkûragire, nwatî vandû va gwîka ûguo nie nîndinirie gîcûrî gîkî Kîam nguo yaku. Kwoguo menya atî nie ndirî na meciria ma kûregana nawe kana ma gûgwîka ûûru. Ndirî mûkûvîtîriu wana ethîrwa nîûrenda kûmbûraga.

¹² Ngai-Mûnene arotûtuîra we nanie onanie ûrîa wîvîtie! Ngai-Mûnene arokûverithia nîûndû wa ûrîa ûrambîka, nwatî nie ndingîgwîka ûndû mûcûku wanarî vanini.

¹³ We nîwicî nthimo îrîa yugaga atîrî, ‘Waganu wîkagwa nî andû arîa aganu.’ Nwatî nie ndingîgwîka ûûru.

¹⁴ Taroria mûndû ûrîa mûthamaki wa Isiraeli arenda kûraga! Nîûrîkû ûrûmîrîrîtie! Nî ngui îno nguû! Ûrûmîrîrîtie nthuua tu!

¹⁵ Ngai-Mûnene arotuîka mûtuui cira gatagatî gakwa nawe. Nîke ûkaambarîrîria na amvonokie kuuma kûrî we.”

¹⁶ Rîrîa Daudi aarîkirie kwîra Saûlo ûguo, Saûlo nîwaugire atîrî, “Mûgambo ûcio nî waku mûvîcîwa Daudi?” Nake Saûlo nîwambîrîrie kûrîra.

¹⁷ Nake nîwerire Daudi atîrî, “We ndûrî na mavîtia, nwatî nie mvîtîtie. Nîûmbîkîte maûndû maro rîrîa nie ngwîkîte maûndû macûku!

¹⁸ Ûmûnthî we nîwonania ûrîa ûrî mwagîrîru nîûndû ndûnambûraga wana ethîrwa Ngai-Mûnene nîaranenganîrîte kûrî we!

¹⁹ Nî mûndû ûrîkû ûngînyita nthû yake na akamîrekereria îthiî atamîkîte ûûru? Ngai-Mûnene arokûrathima nîûndû wa ûguo wambîka ûmûnthî.

²⁰ Rîu nînamenya na ma nîûgaatuîka mûthamaki wa Isiraeli na atî ûthamaki nîûkevanda ûtongoretue nîwe.

²¹ Nwatî îîvîte na rîîtwa rîa Ngai-Mûnene atî nîûkaavonokia njiarwa ciakwa nîguo rîîtwa rîakwa na rîa mûciî wetû rîtikariganîre viû.”

²² Nake Daudi nîwerîre Saûlo atî nîageka ûguo. Saûlo nîwacokire mûciî, nake Daudi na andû ake magîcoka kûrîa meethithîte.