1Sam 23 - ÎVUKU RÎA ÛVORO MWARO

Daudi nîwavonokirie îtûûra rîa Keila

¹ Daudi nîwegwire atî Afilisiti nîmaatharîkagîra îtûûra rîa Keila na nîmaaîaga ngano irîa ciarîkîtie gûkethwa.

² Kwoguo Daudi nîwaûririe Ngai-Mûnene atîrî, “Nthiî ngatharîkîre Afilisiti?” Nake Ngai-Mûnene nîwerire Daudi atîrî, “Îî thiî ûmatharîkîre na ûvonokie îtûûra rîa Keila.”

³ Nwatî andû arîa maarî na Daudi nîmaamwîrire atîrî, “Ethîrwa nîtûgwîtigîra tûrî gûkû Juda, kinthî tûtigeetigîra makîria twathiî Keila kûrûa na athigari a Afilisiti?”

⁴ Nake Daudi nîwavoire Ngai-Mûnene rîngî na Ngai-Mûnene akîmwîra atîrî, “Ûkîra, ûthiî Keila ûkatharîkîre Afilisiti, nîûndû nîngûkûvotithia kûmavoota.”

⁵ Daudi marî na andû ake nîmaathiîre Keila na makîtharîkîra Afilisiti. Nîmaaûragire Afilisiti engî mûno na magîtava ng'ombe ciao. Ûguo nîguo Daudi aavonokirie îtûûra rîa Keila.

⁶ Vîndî îrîa Abiatharu mûvîcî wa Ahimeleku aatorokire na akîthiî kûrî Daudi kûu Keila, nîwathiîre akuuîte efodi.

⁷ Saûlo nîwerirwe atî Daudi nîwathiîte Keila. Nake Saûlo nîwaugire atîrî, “Ngai nîamûnenganîrîte njararî ciakwa, nîûndû Daudi ke mwene nîwîvingîrîte atonyete îtûûra ririgîre na rîrî na ivingo cia vinya.”

⁸ Kwoguo Saûlo nîwetire athigari ake a mbaara mathiî Keila na matharîkîre nîguo marigicîrie Daudi na andû ake.

⁹ Rîrîa Daudi aamenyire atî Saûlo aarî na mûvango wa kûmûtharîkîra, nîwerire Abiatharu mûthînjîri-Ngai atîrî, “Ndetere efodi ava.”

¹⁰ Daudi nîwaugire atîrî, “Ûûi Ngai-Mûnene, Ngai wa Isiraeli, nîmbîguîte atî Saûlo arî na mûvango wa gûka îtûûrarî rîa Keila na arîcûkangia nîûndû wakwa, nie ndungata yaku.

¹¹ Andû a Keila nîmagwîtîkîra kûmvecana kûrî Saûlo? Na ma ûguo mbîguîte Saûlo nîagûka? Ngai-Mûnene, Ngai wa Isiraeli nakûthaitha ûnjokerie!” Ngai-Mûnene nîwamûcokerie atîrî, “Îî Saûlo nîagûka.”

¹² Daudi nîwaûririe rîngî atîrî, “Andû a Keila nîmakûmvecana andû akwa kûrî Saûlo?” Ngai-Mûnene nîwacokirie atîrî, “Îî nîmakûmûvecana.”

¹³ Kwoguo Daudi na andû ake arîa maarî ta magana matandatû (600) nîmaaumire Keila na makîthiî kûrîa kuonthe mangîavotire kûthiî. Rîrîa Saûlo aamenyithirue atî Daudi nîmaaûrîte makauma Keila, nîwavangûrire mûvango wake.

Daudi arî vûrûrirî ûrîa ûrî irîma

¹⁴ Daudi nîwekarire ethithîte kûu vûrûrirî ûrîa ûrî irîma kûu werûrî wa Zifu. Saûlo nîwamûcaragia wa mûthenya, nwatî Ngai ndaanenganîra Daudi kûrî Saûlo.

¹⁵ Daudi nîwamenyire atî Saûlo nîwavangîte kûmûraga. Vîndî îo Daudi aarî Horeshi werûrî wa Zifu.

¹⁶ Nake Jonathani mûvîcî wa Saûlo nîwathiîre kûrî Daudi kûu Horeshu na akîmûmîrîria atî Ngai nîakûmûgitîra.

¹⁷ Jonathani nîwerire Daudi atîrî, “Tiga gwîtigîra, nîûndû vava Saûlo ndangîkûraga. We nîûgaatuîka mûthamaki wa Isiraeli nanie nîngaatuîka mûnini waku na vava Saûlo nîwicî ûguo.”

¹⁸ Nao oîrî nîmaathondekire kîîranîro kîtheru Kîam ûrata mbere ya Ngai-Mûnene. Vuva wa ûguo, Daudi nîwekarire kûu Horeshu nake Jonathani akînûka mûciî.

¹⁹ Nao andû amwe a kuuma Zifu nî maathiîre kûrî Saûlo kûu Gibea na makîmwîra atîrî, “Daudi ethithîte vûrûrirî wetû kûu Horeshu kîrîmarî Kîam Hakila kîrîa kîrî mwena wa îveti wa werû wa Judea.

²⁰ Tue nîtîcî mûthamaki ûrîa ûrerirîria kûmûnyita. Kwoguo ûka vûrûrirî wetû na nwanginya twone atî nîwamûnyita.”

²¹ Nake Saûlo nîwacokirie atîrî, “Ngai-Mûnene aromûrathima nîûndû wa ûrîa mûmbîguîrîrîte ntha!

²² Thiîni na mwîkîre ûira wa rîngî, mûtuîrie waro kûrîa ethithîte na mûmenye nîûrîkû ûmwonete kuo. Nîmbîguîte atî ke nî mwara mûno.

²³ Mûtuîrie waro na mûmenye kûrîa kuonthe ethithaga na mûcoke mûndetere ûvoro ûcio. Nanie nîngaacoka nthiî namue na ethîrwa arî wa vûrûrirî ûcio, nîngaamûcaria wana angîthîrwa nî kûmûcaria vûrûrirî wonthe wa Juda.”

²⁴ Nao nîmaaumire kûu na magîcoka Zifu na nîmaakinyire kuo mbere ya Saûlo. Nake Daudi na andû ake maarî werûrî wa Maoni Kîamndarî kîrîa gîtaarî na kîndû kîrîa Kîamrî mwena wa îveti werûrî wa Judea.

²⁵ Nake Saûlo na andû ake nîmaathiîre gûcaria Daudi, nwatî rîrîa Daudi eerirwe ûvoro ûcio, nîwathiîre kîrîmarî kîrîa kîrî mathiga kûu werûrî wa Maoni na agîkara kuo. Rîrîa Saûlo eeguire ûguo, nîwarûmîrîrie Daudi kûu werûrî wa Maoni.

²⁶ Saûlo na andû ake nîmaathiîre mwena ûmwe wa kîrîma, nake Daudi na andû ake maarî mwena ûcio wîngî. Wa ûrîa Daudi na andû ake maathiîcaga na îvenya nîguo maûrîre Saûlo na andû ake, nwaguo nake Saûlo na andû ake maakuvagîrîria kûmanyita.

²⁷ Vîndî wa îo mûnjaama ûmwe nîwakinyire na akîra Saûlo atîrî, “Coka na narua! Afilisiti nîmaratharîkîra vûrûri!”

²⁸ Kwoguo Saûlo nîwatigire kûrûmîrîria Daudi na akîthiî kûrûa na Afilisiti. Kîu nîkîo vandû vau vetagwa îthiga rîa nyamûkano.

²⁹ Daudi nîwaumire kûu na akîthiî gûtûûra vûrûrirî wa Engedi ethithîte kuo.