1Sam 22 - ÎVUKU RÎA ÛVORO MWARO

Athînjîri-Ngai nîmaaûragirwe

¹ Daudi nîwaûrire akiuma kûu îtûûrarî rîa Gathu na akîthiî ngurungarî îrîa yarî vakuvî na îtûûra rîa Adulamu. Rîrîa aa mûrwang'ina na andû onthe a mûciî wao meeguire atî aarî kûu, nîmaathiîre kûrî ke.

² Na andû onthe arîa maarî avinyîrîrie kana maarî na thirî kana meegucaga mateganîrîte, nîmaathiîre kûrî ke. Nao onthe maarî andû ta magana mana (400). Nake Daudi nîwatuîkire mûtongoria wao.

³ Daudi nîwaumire kûu na akîthiî Mizipa vûrûrirî wa Moabu na akîra mûthamaki wa Moabu atîrî, “Nîrakûthaitha wîtîkîrie vava na nyanya mekare gûkû gwaku nginya rîrîa ngaamenya ûrîa Ngai akwenda nanie.”

⁴ Kwoguo Daudi nîwatigire aciari ake marî na mûthamaki wa Moabu na nîmeekarire na mûthamaki îvinda rîrîa rîonthe Daudi eethithîte ngurungarî.

⁵ Nake mûrathi Gadi nîwathiîre kûrî Daudi na akîmwîra atîrî, “Tiga gwîkara ava. Thiî narua vûrûrirî wa Juda.” Nake Daudi nîwaumire vau na akîthiî mûtitûrî wa Herethu.

⁶ Mûthenya ûmwe Saûlo arî Gibea, nîwekarîte nthî rungu rwa mûtî wîtagwa mûkarakaba kîrîmarî îgûrû. Nîwanyitîte îtumû rîake na njara, nacio ndungata ciake cionthe ciarûngamîte îmûthiûrûrûkîrîtie. Saûlo nîwerirwe atî Daudi na andû ake nîonekanu.

⁷ Saûlo nîwerire ndungata ciake atîrî, “Nthikîrîriani mue andû a Benjamini! Mûreciria atî Daudi nîakaamûva muonthe mîgûnda ya irio na ya mîthavibu na amûtue anene a athigari ake?

⁸ Kîu nîkîo gîtûmîte mûvanga kûregana nanie? Gûtirî mûndû wanarî ûmwe wa cienyu ûmbîrîte atî mûvîcîwa nîmanyitanîrîte na Daudi. Gûtirî wanarî mûndû ûranûmbûyia kana ambîra atî Daudi, ûmwe wa ndungata ciakwa nîaracaria kamweke nîguo ambûrage na mûvîcîwa nîke ûramwîkîra vinya!”

⁹ Nake Doegu ûrîa warûngamîte vamwe na ndungata cia Saûlo nîwaugire atîrî, “Nînoonire Daudi mûvîcî wa Jesii athiîte Nobu kûrî Ahimeleku mûvîcî wa Ahitubu.

¹⁰ Nake Ahimeleku nîwavoire Ngai-Mûnene vandûrî va Daudi na nîwacokire akîva Daudi irio na akîmûnengera rûviû rwa Goliathu ûrîa Mûfilisiti.”

¹¹ Mûthamaki Saûlo nîwatûmanîre Ahimeleku mûthînjîri-Ngai na andû onthe a mûciî wake arîa maarî athînjîri-Ngai kûu Nobu mathiî kûrî ke. Nao onthe nîmaathiîre kûrî Saûlo.

¹² Saûlo nîwerire Ahimeleku atîrî, “Tathikîrîria mûvîcî wa Ahitubu.” Nake Ahimeleku nîwacokirie atîrî, “Îî nîrî ava mwathi wakwa.”

¹³ Saûlo nîwamûririe atîrî, “We mûrî na Daudi mûnjirîrîte nîkî? Nîndûî gîatûmire ûmûva irio na ûmûnengera rûviû na ûvoe Ngai vandûrî vake? Rîu nîareganîte nanie na etererete one kamweke nîguo ambûrage!”

¹⁴ Ahimeleku nîwacokerie mûthamaki atîrî, “Daudi nîke ndungata îrîa îîvokekete mûno gatagatîrî ka ndungata ciaku cionthe! Ke nî mûthoniguo, nîke mûnene wa athigari arîa makûrangagîra na nîatîîtwe mûno nî andû onthe a nyomba yaku.

¹⁵ Ûmûnthî tîguo mûthenya wa mbere kûvoya Ngai vandûrî vake. Mûthamaki, ndûgaîcirie ûndû mûcûku wîgiî ndungata yaku kana andû a nyomba vava, nîûndû ndiîcî wanarî ûndû ûmwe wa maûndû mau!”

¹⁶ Nake mûthamaki nîwerire Ahimeleku atîrî, “We vamwe na andû onthe a mûciî wenyu nwanginya mûragwe.”

¹⁷ Nîwacokire akîîra athigari arîa maamûrangagîra arîa maarûngamîte mamûthiûrûrûkîrîtie atîrî, “Ûragani athînjîri-Ngai a Ngai-Mûnene, nîûndû wanao nîmaanyitanîre na Daudi. Nîmaamenyaga atî Daudi aarî mûtoroku, nwatî matianyumbûrîra.” Nwatî ndungata cia mûthamaki nîciaregire kûraga athînjîri-Ngai a Ngai-Mûnene.

¹⁸ Kwoguo mûthamaki nîwerire Doegu atîrî, “Maûrage arî we!” Nake Doegu nîwaûragire athînjîri-Ngai onthe. Mûthenya ûcio, ke nîwaûragire athînjîri-Ngai mîrongo înana na atano arîa meekagîra efodi.

¹⁹ Saûlo nîwacokire akîathana atî andû onthe arîa matûûraga Nobu îtûûra rîa athînjîri-Ngai maûragwe. Arûme, aka, ciana na tûkenge, ng'ombe, mvunda na ng'ondu; cionthe nîciaûragirwe.

²⁰ Nwatî Abiatharu, ûmwe wa anake a Ahimeleku nîwaûrire na akîthiî kûrî Daudi.

²¹ Abiatharu nîwerire Daudi atî Saûlo nîaûragîte athînjîri-Ngai a Ngai-Mûnene.

²² Nake Daudi nîwerire Abiatharu atîrî, “Rîrîa noonire Doegu ûrîa Mûedomu arî vo mûthenya ûcio, nînaamenyire atî nwanginya akeera Saûlo. Kwoguo nînie natûma andû onthe a mûciî wenyu maûragwe.

²³ Îkarania nanie na ndûgetigîre, nîûndû Saûlo nîarenda gûtûûraga tuoîrî, nwatî wî vamwe nanie wî mûmenyerere.”