1Sam 21 - ÎVUKU RÎA ÛVORO MWARO

Daudi nîwaûrire kuuma kûrî Saûlo

¹ Daudi nîwathiîre kûrî Ahimeleku mûthînjîri-Ngai kûu Nobu. Ahimeleku nîwathiîre gûtûnga Daudi akinainaga na akîmûria atîrî, “Nîkwa waûka wî wenga nîkî?”

² Daudi nîwacokerie Ahimeleku mûthînjîri-Ngai atîrî, “Nîrî ava ndûmîtwe nî mûthamaki. Ambîrire atî ndikamenyithie mûndû wanarî ûmwe ûndû ûrîa andûmîte ngeke. Na nîtûrîkanîrîte na andû akwa varîa tûgacemania.

³ Rîu nîndûî ûrî nakîo? Mva mîgate îtano kana kîndû kîngî wa kîonthe kîrîa wî nakîo.”

⁴ Nake mûthînjîri-Ngai nîwacokerie Daudi atîrî, “Ndirî na mîgate îrîa tûmenyerete kûrîa, nwatî varî na mîgate îrîa mîamûrîre Ngai. Nwa mûmîoce ethîrwa andû aku matimenyanîte kîîmwîrî na aka kavinda gakuvî.”

⁵ Nake Daudi nîwacokerie mûthînjîri-Ngai atîrî, “Nî ma, andû akwa metheragia vîndî cionthe wana rîrîa tûkûthiî rûgendo wa ruonthe. Na kinthî twa methîrwe metheretie makîria rûgendorî rûrû rwa mwanya?”

⁶ Kwoguo mûthînjîri-Ngai nîwavere Daudi mîgate îo mîamûre, nîûndû ndaarî na mîgate îngî tiga îrîa yamûrîrîtwe Ngai. Nayo yarutîrwe metharî îrîa nyamûre na vakaigwa mîgate îngî ya kûrugwa wa rîo.

⁷ Mûthenya ûcio, Doegu ûmwe wa ndungata cia Saûlo wa kuuma Edomu na warî mûnene wa arîthi a Saûlo aarî kûu, nîûndû aarî na ûndû eendaga gwîka mbere ya Ngai-Mûnene.

⁸ Daudi nîwerire Ahimeleku atîrî, “Wîna îtumû kana rûviû ûngîmva? Ndinavota gûka na rûviû rwakwa kana indo ciakwa cia mbaara, nîûndû ûndû ûrîa arambathire ngeke nîûratûmire nyume na îvenya.”

⁹ Nake Ahimeleku nîwacokirie atîrî, “Nîrî na rûviû rwa Goliathu, ûrîa waûragîre Kîamndarî Kîam Ela na rûrî vuva wa Efodi rûovetwe na gîtambaa. Ethîrwa nîûkûrwenda rwoce, nîûndû rûu nwaruo rûrî gûkû.” Nake Daudi nîwaugire atîrî, “Nengera ruo, gûtirî rûviû rwîngî rwaro ta ruo.”

¹⁰ Kwoguo Daudi nîwaûrire kuuma kûrî Saûlo mûthenya ûcio na akîthiî kûrî Akishi mûthamaki wa Gathu.

¹¹ Nacio ndungata cia mûthamaki ûcio nîciamwîrire atîrî, “Kinthî ûyû tî Daudi ûrîa mûthamaki wa vûrûri wa Isiraeli? Ûyû nîke mûndû ûrîa aka maainîre makiugaga atî, ‘Saûlo nîaûragîte andû ngiri nyîngî, nwatî Daudi nîaûragîte andû ngiri makûmi meengî.’ ”

¹² Daudi nîwaigire ciugo icio ngororî yake na agîîtigîra Akishi, mûthamaki wa Gathu mûno.

¹³ Kwoguo rîrîa rîonthe Daudi angîethagîrwa marî na andû acio, nîwetuucaga kîûgû na agekaga maûndû ta mûndû wa ngoma. Rîrîa mangîageririe kûmûvingîrîria, ke nîwandîkangaga mîrangorî ya îtûûra na agetagîrîria mata nderurî ciake.

¹⁴ Akishi nîwerire ndungata ciake atîrî, “Taroriani! Mûndû ûyû nî wa ngoma! Mûrandeteere ke nîkî?

¹⁵ Andû a ngoma arîa nîrî nao nî eganu. Mûrandeteere wîngî wa kûnthînia agîka maûndû ma ûkoma arî mbere yakwa nîkî? Mûndû ûyû ndangîtonga nyombarî yakwa.”