1Sam 20 - ÎVUKU RÎA ÛVORO MWARO

Jonathani nîwatethirie Daudi

¹ Daudi nîwacokire akiuma Naiothu kûu Rama akîthiî kûrî Jonathani na akîmûria atîrî, “Nîkwa mbîkîte atîa? Mavîtia makwa nîmarîkû? Nî îvîtia rîrîkû mvîtîrîtie aguo narîo rîa gûtûma ende kûmbûraga?”

² Nake Jonathani nîwamûcokerie atîrî, “Ûguo ûroaga gwîkîka! We tîûkua. Gûtirî ûndû wanarî ûmwe vava angîka atambîrîte, ûrî mûnene kana ûrî mûnini. Na ndangînthitha ûndû ûcio. Ûcio tî ûvoro wa ma!”

³ Nwatî Daudi nîwacokerie Jonathani atîrî, “Aguo nîecî waro mûno ûrîa ûmendete na nîatuîte atî tîakûmenyithia ûrîa avangîte gwîka, nîûndû nwa wîgue naaî mûno ngororî. Nwatî nie nîrevîta na Ngai-Mûnene ûrîa ûtûûraga mwoyo nîrî mbere yaku atî, nie ndigarîtie vanini ngue!”

⁴ Nake Jonathani nîwerire Daudi atîrî, “Nîngûgwîkîra ûndû wa wonthe ûrîa ûkwenda mbîke.”

⁵ Daudi nîwacokirie atîrî, “Rûyû nîrîo kûrî na kîrugo gîa karûngamo ka mweri na mbagîrîrwe nî kûrîcanîra na mûthamaki. Nwatî tiga nthiî ngethithe nginya kîvwaî Kîam mûthenya wa kathatû.

⁶ Aguo angîkaandura na aûrie kûrîa nîrî ûkaamwîra atî nînîrakûvoire rûtha nîguo nthiî mûciî Bethilehemu nîûndû kûrî na kîgongoona kîrîa kîrutagwa wa mwaka nî andû onthe a mûciî wetû.

⁷ Angîkaauga, ‘nî waro,’ gûtirî ûûru ngona, nwatî angîkaarakara, ûkaamenya atî nîatuîte kûmbîka ûndû mûcûku.

⁸ Kwoguo nînîrakûthaitha ûvingie kîrîkanîro kîtheru kîrîa twarîkanîre nawe. Nwatî ethîrwa nîmûvîtiu, mbûraga arî we! Nîûmvira kûrî aguo nîguo ambûrage nîkî?”

⁹ Nake Jonathani nîwacokirie atîrî, “Ndûgaîcirie ûndû ta ûcio! Nîûndû kethîrwa nwa menye na ma atî vava nîatuîte nîagûgwîka naaî, kinthî twa ngwîre?”

¹⁰ Nake Daudi nîwaûririe Jonathani atîrî, “Aguo angîgaagûcokeria na marakara ngaamenyithua nû?”

¹¹ Jonathani nîwacokerie Daudi atîrî, “Ûka tûthiî mûgûndarî.” Kwoguo nîmaathiîre mûgûndarî wa oîrî.

¹² Nake Jonathani nîwerire Daudi atîrî, “Ngai-Mûnene, Ngai wa Isiraeli arotuîka mûira wetû! Rûyû kana mûthenya wa kathatû îthaa wata rîîrî nîngaaûria vava ûvoro ûcio. Ethîrwa mworoto wake kûrî we nî mwaro, nîngaakûmenyithia.

¹³ Nwatî ethîrwa arî na mworoto wa gûgwîka ûûru, Ngai-Mûnene arombûraga ethîrwa nîngaarega gûkumbûrîra ûndû ûcio nîguo ûvonoke. Ngai-Mûnene aroîkara nawe wata ûrîa arekaraga na vava.

¹⁴ Ethîrwa nie tîngua, ûkaavingia kîîranîro kîrîa kîtheru Kîam Ngai-Mûnene, na nîngîgaakua,

¹⁵ ûkaathiî na mbere kwenda andû a mûciî wakwa tene na tene. Na rîrîa Ngai-Mûnene agacûkangia nthû ciaku cionthe,

¹⁶ ndûkarege kûvingia kîîranîro gîetû nawe. Ûngîkaarega gûkîvingia, Ngai-Mûnene nîagaakûverithia.”

¹⁷ Jonathani nîwevîtithirie Daudi rîngî na akîmwîrîra atî akaamwendaga nîûndû Jonathani nîwendete Daudi wata ûrîa eyendete ke mwene.

¹⁸ Jonathani nîwacokire akîîra Daudi atîrî, “Rûyû nîrîo kîrugo Kîam karûngamo ka mweri na nîgûkaamenyekana atî we ndûrî kuo.

¹⁹ Mûthenya wa kathatû gûkaamenyekana makîria atî ndûrî kuo, kwoguo thiî varîa wethithîte vîndî îrîa îngî, na wîthithe vau vuva ya kîrûndo Kîam mathiga.

²⁰ Nîngaacoka mbikie mîguî îthatû mwenarî wa kîrûndo kîu Kîam mathiga takwa arî kîo nîraratha.

²¹ Nîngaacoka mbîîre ndungata yakwa îthiî îgacarie mîguî îo. Na nîngîkera ndungata îo atîrî, ‘Taroria mîguî îrî mwena ûcio ûrî, mîoce,’ vîndî îo nîûkaamenya atî kûrî na thayû na nwa umîre. Nînevîta na Ngai-Mûnene ûrîa ûtûûraga mwoyo atî gûtikethîrwa kûrî na ûgwati.

²² Nwatî nîngîkera ndungata îo atî, ‘Mîguî îrî mbere yaku,’ vîndî îo ûkaathiî nîûndû Ngai-Mûnene nîakethîrwa akîenda ûthiî.

²³ Naguo ûvoro wîgiî kîîranîro kîrîa twathondeka nawe, Ngai-Mûnene arotuîka mûira wetû tene na tene.”

²⁴ Kwoguo Daudi nîwethithire mûgûndarî. Na rîrîa kîrugo Kîam karûngamo ka mweri gîakinyire, mûthamaki Saûlo nîwaûkire kûrîa irio.

²⁵ Eekarîre gîtî gîake Kîamrî vakuvî na rûthingo wata ûrîa aamenyerete. Nake Abineri agîkara ariganîtie nake, nake Jonathani agîkara mwena ûcio wîngî. Nwatî varîa Daudi eekaraga vatiarî mûndû.

²⁶ Saûlo ndaagweta wanarî ûndû mûthenya ûcio, nîûndû eeciragia atî Daudi arî na ûndû ûmûgwatîte kana nîkwa atetheretie.

²⁷ Mûthenya wa kaîrî vuva wa kîrugo Kîam karûngamo ka mweri, varîa Daudi eekaraga vatiarî na mûndû. Saûlo nîwaûririe mûvîcî Jonathani atîrî, “Daudi mûvîcî wa Jesii araregire gûka kîrugorî îgoro wana ûmûnthî nîkî?”

²⁸ Nake Jonathani nîwacokerie Saûlo atîrî, “Daudi nîaranthaithire nîmwîtîkîrie athiî Bethilehemu.

²⁹ Arambîrire atîrî, ‘Tiga nthiî nîûndû andû a mûciî wetû marî na kîgongoona îtûûrarî na mûrwaiya nîarenda mbîthîrwe nîrî kuo. Ethîrwa nî waro mbîtîkîria nthiî ngonane na aa mûrwaiya.’ Kîu nîkîo gîtûmi atarî gîtîrî gîake metharî.”

³⁰ Nake Saûlo nîwarakarîre Jonathani na akîmwîra atîrî, “We ûrî mwana wa mûndûmûka mûremi! Nîmenyete atî nîmûnyitanîte na Daudi nîguo agûconorithie na aconorithie nyûkwe!

³¹ Anga ndûicî atî Daudi arî mwoyo ndûgaatuîka mûthamaki wa vûrûri ûyû? Kwoguo thiî ûkamûrete ava nîrî, nîûndû nwanginya akue!”

³² Jonathani nîwacokerie îthe Saûlo atîrî, “Nîndûî gîgûtûma akue? Nîkwa ekîte atîa?”

³³ Kavindarî wa kau, Saûlo nîwaikirie Jonathani îtumû akîenda kûmûûraga, nake Jonathani akîmenya atî îthe nama nîwatuîte nîakûûraga Daudi.

³⁴ Jonathani nîwarûngamire na akiuma vau metharî arakarîte mûno, na ndaarîa kîndû mûthenya ûcio. Ûcio warî mûthenya wa kaîrî wa kîrugo gîa karûngamo ka mweri. Jonathani nîweguîrîre Daudi kîeva mûno nîûndû Saûlo nîwamûcambithîtie.

³⁵ Kîraûko Kîam mûthenya ûcio wîngî, Jonathani nîwathiîre na kûu mûgûndarî nîguo makonane na Daudi wata ûrîa maarîkanîrîte, na akîthiî na ndungata ya kamwanake.

³⁶ Jonathani nîwerire kamwanake kau atîrî, “Vinyûra ûgacarie mîguî îrîa ngwikia.” Mwanake ûcio nîwavinyûrire, nake Jonathani agikia mîguî mbere yako.

³⁷ Rîrîa mwanake aakinyire varîa mûguî wagwîte, Jonathani nîwamwîtire na akîmwîra atîrî, “Mûguî ûrî na vau mberavere!

³⁸ Tiga kûrûngama vau! Vinyûra!” Mwanake nîwathiîre, agîoca mûguî na agîcokeria mwathi wake,

³⁹ nwatî mwanake ûcio ndaamenyaga gîtûmi Kîam ûndû ûcio tiga Jonathani marî na Daudi.

⁴⁰ Jonathani nîwanengerire mwanake ûcio indo ciake cia mbaara na akîmwîra aicokie îtûûrarî.

⁴¹ Mwanake ûcio arîkia kûthiî, Daudi nîwaumîrire varîa eethithîte vuva ya kîrûndo Kîam mathiga, agîturia maru na akînamîrîra nthî maita mathatû. Nao oîrî, Jonathani na Daudi nîmaamumunyanire makîrîraga. Daudi aarî na kîeva kîngî gûkîra Jonathani.

⁴² Jonathani nîwacokire akîra Daudi atîrî, “Thiî na waro Ngai-Mûnene arotûtethia nie nawe, na njiarwa cietû tûtûûre tûmenyererete kîîranîro kîrîa tûrîkanîrîte nawe.” Nake Daudi nîwacokire akîthiî nake Jonathani agîcoka îtûûrarî.