1Sam 2 - ÎVUKU RÎA ÛVORO MWARO

Îvoya rîa Hana

¹ Hana nîwavoire na akiuga atîrî, Ngai-Mûnene nîecûrîtie gîkeno ngororî yakwa, nie nîngenete nîûndû wa ûrîa ekîte. Nînthekagîrîra nthû ciakwa, nîrî mûkenu nîûndû Ngai nî amvonoketie!

² Gûtirî wîngî mûtheru ta Ngai-Mûnene, gûtirî wîngî ûngîvanana nake, gûtirî mûndû ûngîvota gûtûgitîra ta Ngai wetû.

³ Mûtigacoke kwaria na mwîtîîo rîngî. Tigani gwîtîîaga vîndî îrîa mûkwaria, nîûndû Ngai-Mûnene nîke Ngai ûrîa wicî maûndû, atucagîra andû onthe kûringana na ciîko ciao.

⁴ Mota ma andû arîa marî na vinya nîmaunîkangu, nwatî andû arîa matarî na vinya nî magîcaga na vinya.

⁵ Andû arîa meethagîrwa marî na irio nyîngî, rîu nîkwa marutaga wîra nîguo moone irio. Nwatî andû arîa meethagîrwa marî avûtu, rîu marî na irio. Mûndûmûka ûrîa warî nthata, rîu nîmûciaru ciana mûgwanja. Nwatî mûndûmûka ûrîa ûrî na ciana nyîngî, rîu atigîtwe atarî na mwana wana ûmwe.

⁶ Ngai-Mûnene nîke ûûragaga andû na nwake ûmavecaga mwoyo, nîke ûviraga andû kwa arîa akuû na akamaruta kuo.

⁷ Ngai-Mûnene nîke ûtûmaga andû amwe mathîne na agatua arîa engî itonga, nîanyivagia amwe na akanenevia arîa engî.

⁸ Nîarutaga mûthîni rûkûngûrî, na agaûkîrîria arîa athîni makauma mathînarî. Ngai-Mûnene nîatûmaga andû acio matuîke arata a anene, na agatûma mekarîre itî cia ûnene. Ngai-Mûnene nîke mwene itugî irîa itiirîrîrîte nthî îno, nîke wigîrîrîte nthî îgûrû rîacio.

⁹ “Ngai-Mûnene nîke ûgitagîra andû ake arîa mamwîvokete, nwatî andû arîa aganu maûragîra ndumarî. Nîûndû mûndû ndavootanaga na njîra ya vinya wake ke mwene.

¹⁰ Ngai-Mûnene nîagacûkangia nthû ciake, nîakaairiva na mûgambo ta wa ngwa arî îgûrû. Ngai-Mûnene nîagaacirithia andû onthe a nthî, na ave mûthamaki ûrîa ke athuurîte ûvoti, amûve vinya wa kûvootana.”

¹¹ Vuva wa ûguo Elikana nîwacokire gwake mûciî Rama. Nake Samueli nîwatigirwe kûu Shilo agîtungatagîra Ngai-Mûnene akîonagîrîrua nî mûthînjîri-Ngai Eli.

Ariû a Eli

¹² Nake Eli aarî na anake ake. Anake acio maarî aganu na matiavecaga Ngai-Mûnene gîtîîo,

¹³ kana marûmîrîra mîtugo îgiî kîrîa athînjîri-Ngai meetagia kuuma kûrî andû. Vandû va ûguo, o maamenyerete gwîkaga atîrî, vîndî îrîa mûndû wa wonthe akûruta kîgongoona ndungata ya mûthînjîri-Ngai nîyathiîcaga varîa nyama ciarugagîrwa înyitîte ûma ya mîthece îthatû na njara.

¹⁴ Nayo ndungata nîyavutûkagia ûma îo thavuriarî, kana nyûngûrî îrîa ya kûruga, nyama ikîrugwa. Nayo nyama wa yonthe îrîa yamundagwa nî ûma nîyarutagwa na îgatuîka ya mûthînjîri-Ngai. Ûguo nîguo Aisiraeli onthe arîa maathiîcaga kûruta magongoona kûu Shilo meekagwa.

¹⁵ Makîria ya ûguo, wana mbere ya mathunya mavîvue, ndungata ya mûthînjîri-Ngai nîîngîathiîcaga na îkeera mûndû ûrîa warutaga kîgongoona atîrî; “Nengera nyama ya mûthînjîri-Ngai akavîvie nîûndû ke ndangîtîkîra îrî nduge kuuma kûrî we, nwanga îrî mbîthî.”

¹⁶ Na ethîrwa mûndû ûcio nîangîacokerie ndungata na akamîîra atîrî, “Amba weterere twambe tûvîvie mathuma, ûcoke woce irîa ûkwenda.” Ndungata ya mûthînjîri-Ngai nîîngîaugire atîrî, “Naarî, nwanginya ûnengere rîu! Na ethîrwa ndûkûnengera, nie nîmboca na vinya.!”

¹⁷ Kwoguo Ngai-Mûnene nîwonire atî, wîvia wa anake a Eli warî mûnene mûno, nîûndû matiavecaga iveo irîa ciarutagîrwa Ngai-Mûnene gîtîîo.

Samueli arî Shilo

¹⁸ Samueli nîwathiîre na mbere gûtungatîra Ngai-Mûnene ekîrîte nguo îrîa yarathimîrîtûe wîra ûcio.

¹⁹ Nake ng'ina wa Samueli nîwamûtumagîra gakanjû kanini wa mwaka wa mwaka na akavirîra Samueli gakanjû kau vîndî îrîa makûthiî na mûthuuriwe kûruta kîgongoona kîrîa Kîamrutagwa wa mwaka wa mwaka.

²⁰ Nake Elikana wa vamwe na mûndûmûka wake nîwarathimagwa nî Eli na Eli akeera Elikana atîrî, “Ngai-Mûnene arokûva ciana ciîngî ciumanîte na mûndûmûka ûyû irîa ikeethîrwa irî îthenyarî rîa mwana ûyû ke aamûrîîre Ngai-Mûnene.” Na vuva wa ûguo makeenûka kwao mûciî.

²¹ Nake Ngai-Mûnene nîwarathimire Hana na anake engî athatû na erîtu aîrî. Nake Samueli nîwakûrire agîtungatagîra Ngai-Mûnene.

Eli marî na anake ake

²² Vîndî îo Eli aarî mûkûrû mûno. Ke nwa wegucaga maûndû monthe marîa anake ake meekaga andû onthe a Isiraeli, wana nginya ûrîa maamamaga na aka arîa maatungataga marî mûrangorî wa îgema kûrîa Ngai-Mûnene eethagîrwa arî.

²³ Nake Eli nîwamaûririe atîrî, “Mue mwîkaga maûndû ta mau nîkî? Nîûndû nie nînîregua andû onthe makîmbîra maûndû macûku marîa mue mwîkaga.

²⁴ Tigani gwîka maûndû mau rîngî anake akwa! Nîûndû ûvoro ûcio nîregua andû a Ngai-Mûnene makîaria îgûrû rîenyu tî mwaro!

²⁵ Angîthîrwa mûndû nwa avîtîrie mûndû ûrîa wîngî, Ngai nîke ûngîmeguithania. Nwatî mûndû angîvîtîria Ngai-Mûnene, nî ûrîkû vi ûngîmûthaithanîrîra?” Nao nîmaaregire kûthikîrîria ûrîa meeragwa nî îthe, nîûndû Ngai-Mûnene nîwatuîte atî nîakûmaûraga.

²⁶ Nake Samueli nîwathiîre na mbere gûkûra akîendagwa nî Ngai-Mûnene wana andû.

Ûrathi kûrî andû a mûciî wa Eli

²⁷ Nake mûrathi nîwatûmirwe nî Ngai-Mûnene kûrî Eli akamwîre atîrî, “Nie nîneyonithanirie kûrî îthe wenyu wa tene Aroni na andû a mûciî wake vîndî îrîa maarî ngombo cia mûthamaki wa Misiri.

²⁸ Na nî nie naathuurire andû a mûciî wa Aroni gatagatîrî ka mîvîrîga yonthe ya Isiraeli matuîke athînjîri-Ngai akwa, nîguo mekagîre nguo ntheru vîndî îrîa makwenda kûmbarîria, mathiîcage metharî ya kîgongoona, na mamvîvagîrie ûbani vo. Nie nînaamavere rûtha meigagîre iveo imwe cia irîa ciavothagwa nî Aisiraeli.

²⁹ Nîndûî vi kîratûma ûkorokere iveo na magongoona marîa naathire andû akwa mandutagîre? We Eli, nîndûî kîratûma ûtîîe anake aku kûngîra na njîra ya kûmetîkîria menorithagie na iveo irîa mbaro mûno cia irîa ndutagîrwa nî andû akwa, Aisiraeli?

³⁰ Kwoguo nie Ngai-Mûnene, Ngai wa Isiraeli nînerîrîte andû a mûciî waku wana andû a mûvîrîga waku, atî makandungatagîra marî athînjîri-Ngai vîndî cionthe. Nwatî rîu nîrauga atî ûndû ûcio ndingîtîkîria ûthiî na mbere rîngî. Vandû va ûguo, nie ngatîîaga andû arîa mandîaga, nao arîa manyararaga ngaamatucaga ta andû matarî na vata.

³¹ Tathikîrîria, vingo nîgûkinya rîrîa ngaaûraga andû ethî onthe a mûciî waku wana a mûvîrîga wenyu, na gûtîkeethîrwa kûrî na mûndû wanarî ûmwe mûkûrû gatagatîrî ka andû a mûciî waku.

³² We nîûkaathînîka na wîgue wîru nîûndû wa irathimo irîa ngaarathima andû acio engî a Isiraeli nacio, na gûtirî mûndû mûkûrû ûkooneka gatagatîrî ka andû a mûciî waku tene na tene.

³³ Mûndû wa wonthe wa rûciaro rwaku ûrîa ngaavonokia na nîmwîtîkîrie andungatagîre arî ta mûthînjîri-Ngai agaatûûra arîraga na ecûrîtwe nî kîeva. Nao andû acio engî onthe a rûciaro rwaku magaakuucaga gîkuû Kîam ruuo.

³⁴ Naguo ûndû ûrîa ûgeekîka kûrî anake aku oîrî, Hofini na Finehasi nîguo ûgaatuîka kîmenyithia kûrî we atî, maûndû monthe marîa mbugîte nîmakaavinga. Naguo nî atî, anake aku wa oîrî magaakua mûthenya ûmwe.

³⁵ Na nie nîngethuurîra mûthînjîri-Ngai ûrîa ûkethagîrwa arî mwîvokeku kûrî nie. Ke nîke ûgeekaga maûndû monthe marîa ngaamwîraga kuuma ngororî yakwa wana meciriarî makwa. Nie nîngaatûma agîe na njiarwa, na vingo cionthe nîigaatungatagîra mûthamaki ûrîa nie nthuurîte.

³⁶ Nake mûndû wa wonthe wa rûciaro rwaku ûrîa ûgaatigara nîakaathiî kûrî mûthînjîri-Ngai ûcio na akavoya mûthînjîri-Ngai ûcio mbeca kana irio na nîakaathaithanaga akiugaga etîkîrue atethagîrîrie athînjîri-Ngai, nîguo oonage kîndû gîa kûrîa.”