1Sam 19 - ÎVUKU RÎA ÛVORO MWARO

Daudi nîwanyaririrwe nî Saûlo

¹ Saûlo nîwerire mûvîcî Jonathani vamwe na ndungata ciake cionthe atî nîatuîte kûûraga Daudi. Nwatî Jonathani nîwendeete Daudi mûno.

² Kwoguo Jonathani nîwerire Daudi atîrî, “Vava nîarenda gûkûûraga. Kwoguo îîmenyerere rûyû kîraûko ûkeethitha vandû ûtakwonwa na wîkare vo.

³ Nîngaathiî na nûngame vakuvî na vava kûu ûkethîrwa wîthithîte na nîmwarîrie ûvoro ûkwîgiî. Ethîrwa nîngaamenya ûndû wanarî ûrîkû, nîngaakwîra.”

⁴ Jonathani nîwagaathîrîrie Daudi kûrî îthe na akîîra Saûlo atîrî, “Mwathi wakwa, ndûgeke ndungata yaku Daudi ûndû mûcûku. Ndarî anakûvîtîria wanarî na ûndû na maûndû make monthe agîgûtungatîra methîrîtwe marî na ûtethio mûnene mûno kûrî we.

⁵ Nîweîkîrire ûgwatirî mûnene rîrîa aaûragire Goliathu na Ngai-Mûnene agîtûma Aisiraeli mavootane. Rîrîa wonire ûndû ûcio, we nîwakenire. Rîu we ûrenda gwîka ûndû ûyû mûcûku nîkî wa gwîtûrûra nthakame ya mûndû ûtarî na wîvia na njîra ya kûûraga Daudi vatarî na gîtûmi?”

⁶ Saûlo nîwetîkirie ûrîa Jonathani aamwîrire na akîîvîta na rîîtwa rîa Ngai-Mûnene atî, ndakaaûraga Daudi.

⁷ Kwoguo Jonathani nîwetire Daudi na akîmwîra maûndû monthe, agîcoka akîvira Daudi kûrî Saûlo, nake Daudi akîthiî na mbere gûtungatîra mûthamaki wata ûrîa eekaga mbere.

⁸ Afilisiti nîmaambîrîrie mbaara rîngî na andû a Isiraeli. Daudi nîwarûire nao, akîmavoota nginya makîûra.

⁹ Naguo roho mûcûku umîte kûrî Ngai-Mûnene nîwanyitire Saûlo mûthenya ûmwe arî gwake nyomba anyitîte îtumû na njara. Vîndî îo Daudi nîkwa aavûûraga ngita.

¹⁰ Saûlo nîwaikirie îtumû rîake akîgeria kûmundanîria Daudi na rûthingo, nwatî Daudi nîwavinyûrire na akîûra.

¹¹ Ûtukû wa ûcio Saûlo nîwatûmire anjaama mathiî makarangîre nyomba ya Daudi nîguo makaamûraga kîraûko. Nwatî Mikali, mûka wa Daudi nîwamwîrire atîrî, “Wona warega kûûra ûtukû ûyû wa ûmûnthî, rûyû nîûkaûragwa.

¹² Kwoguo Mikali nîwanyûrûrûkîrie Daudi ndiricarî, na Daudi akîûra na akîthiî.

¹³ Mikali nîwacokire agîoca mûvuanano wa kûu mûciî na akîûmamia gîtandarî, agîoca kamuuto kaathondeketwe na guoya ya mbûri agîkaigîrîra kîongorî Kîam mûvuanano ûcio na agîûkunîkîra na nguo.

¹⁴ Rîrîa anjaama arîa maatûmîtwe nî Saûlo maathiîre kûgîra Daudi, Mikali nîwamerire atî Daudi aarî mûrwaru.

¹⁵ Nwatî Saûlo nîwamatûmire rîngî mathiî na mone Daudi o ene. Ke nîwamaathire mamûkuue arî gîtandarî gîake na mamûvirîre ke nîguo amûûrage.

¹⁶ Nîmaatonyire ndarî na makîthîrîria mûvuanano ûcio ûrî gîtandarî na kamuuto ka guoya ya mbûri karî kîongorî Kîamguo.

¹⁷ Saûlo nîwaûririe Mikali atîrî, Wamveenia ûguo nîkî na wareka nthû yakwa yûre?” Nake Mikali nîwamûcokerie atîrî, “Ke ambîrire atî nîakûmbûraga ethîrwa tînîmûtethereria aûre.”

¹⁸ Nake Daudi nîwaûrire na akîthiî kûrî Samueli kûu Rama na akîmwîra ûrîa wonthe Saûlo amwîkîte. Vuva wa ûguo Daudi na Samueli nîmathiîre Naiothu gûtûûra kuo.

¹⁹ Vuvarî Saûlo nîwerirwe atî Daudi aarî Naiothu kûu Rama,

²⁰ Kwoguo nîwatûmire anjaama mathiî makamûnyite. Rîrîa moonire gîkundi Kîam arathi gîkina gîtongoreretue nî Samueli, roho wa Ngai nîwatonyire kûrî anjaama a Saûlo na wanao makîambîrîria kwina.

²¹ Rîrîa Saûlo eegwire ûguo, nîwatûmire anjaama engî na wanao makîambîrîria kwina. Nîwacokire agîtûma anjaama rîngî riita rîa kathatû, na wanao makîambîrîria kwina.

²² Saûlo ke mwene nîwacokire akîthiî Rama. Rîrîa aakinyire kîthimarî kîrîa kînene kîrî Seku, nîwaûririe kûrîa Samueli na Daudi maarî, na akîrwa atî maarî Naiothu.

²³ Rîrîa Saûlo aathiîte Naiothu, roho wa Ngai nîwatonyire kûrî ke wanake na akîthiî akîinagia nginya agîkinya Naiothu kûu Rama.

²⁴ Nîwarutire nguo ciake na akîambîrîria kûratha arî mbere ya Samueli. Nîwekarire arî njaga mûthenya ûcio wonthe na ûtukû. (Kwoguo andû nîmaambîrîrie kûrania atîrî, “Nîkwa Saûlo wanake arî mûtuîku mûrathi?”)