1Sam 18 - ÎVUKU RÎA ÛVORO MWARO

¹ Rîrîa Saûlo na Daudi maarîkirie kwaria, Jonathani mûvîcî wa Saûlo nîwagucîrîrue mûno nî Daudi na Jonathani akîenda Daudi wata ûrîa eyendete ke mwene.

² Saûlo nîwocire Daudi agîkarania nake kuuma mûthenya ûcio na ndaanacoka kûmwîtîkîria enûka kwao mûciî.

³ Jonathani nîwendire Daudi mûno na kwoguo nîwathondekire kîîranîro na Daudi, atî magaatûûra marî arata.

⁴ Nîwarutire nguo ndaca îrîa eekîrîte na akînengera Daudi vamwe na indo ciake cia mbaara na rûviû rwake ûta na mûcivi.

⁵ Daudi nîwavootanaga kûrîa kuonthe Saûlo aamûtûmaga, na nîûndû wa ûguo Saûlo nîwamûtuire mûnene wa athigari ake. Ûndû ûyû nîwakenirie andû onthe wana ndungata cia Saûlo.

Saûlo nîweguîrîre Daudi wîru

⁶ Rîrîa Daudi marî na athigari a mbaara menûkîte arîkia kûûraga Goliathu, aka nîmaaumire matûûrarî monthe ma Isiraeli na makîthiî gûtûnga Saûlo. Maathiîre makinaga na makîrûgarûgaga nîûndû wa gûkena makîvûraga tamburini na ngita cia mîthemba na mîthemba.

⁷ Nao magîkûngûîra, aka maainaga magîcokanagîria makiugaga atîrî, “Saûlo nîaûragîte andû ngiri nyîngî nwatî Daudi aûragîte ngiri makûmi meengî.”

⁸ Rîrîa Saûlo eegwire ûguo, nîwarakarire mûno na akiuga atîrî, “Marauga atî Daudi aûragîte andû ngiri makûmi meengî, nwatî nie mbûragîte tûkiri tûnini. Rîu ûndû ûrîa ûtigarîte nî kûmûtua mûthamaki.”

⁹ Kwoguo Saûlo nîwambîrîrie kwîguîra Daudi wîru kuuma mûthenya ûcio.

¹⁰ Naguo mûthenya ûcio wîngî roho mûcûku aumîte kûrî Ngai nîwatonyire kûrî Saûlo wa rîmwe arî gwake mûciî na agîkara ta mûndû wî na ngoma. Vîndî îo, Daudi nîkwa aavûûraga ngita wata ûrîa aamenyerete gwîka wa mûthenya wa mûthenya, nake Saûlo aanyitîte îtumû na njara yake.

¹¹ Nake Saûlo akîîra na ngoro atîrî, “Nîmbikia Daudi îtumû nîmûmundanîrie na rûthingo.” Nake nîwaikirie Daudi îtumû maita maîrî wa Daudi akîevagîra.

¹² Saûlo nîwetigagîra Daudi nîûndû Ngai-Mûnene aarî vamwe na Daudi, nwatî agatiganîria Saûlo.

¹³ Kwoguo Saûlo nîwamûthengutirie mbere yake na akîmûtua mûnene wa athigari ngiri îmwe (1,000). Daudi nîwatongoririe andû ake mbaararî,

¹⁴ na nîwavootanaga maûndûrî marîa monthe eekaga, nîûndû Ngai-Mûnene aarî vamwe nake.

¹⁵ Rîrîa Saûlo oonire atî Daudi aarî na ûvootani mûnene, ke nîwakîrîrîrie kûmwîtigîra.

¹⁶ Nwatî andû onthe a Isiraeli na Juda nîmeendire Daudi nîûndû wa ûrîa aarî mûtongoria mwaro.

Daudi nîwavikirie mwarî wa Saûlo

¹⁷ Saûlo nîwacokire akîîra Daudi atîrî, “Merabu mwarîwa ûrîa mûkûrû nîke ûyû, Nîngûkûva ke atuîke mûka waku ethîrwa nîûkûndungatîra ta mûthigari mûmîrîru na mwîvokeku na ûrûage mbaara cia Ngai-Mûnene.” (Nîûndû Saûlo eeciragia atî na njîra îno Afilisiti nîmakûûraga Daudi vandû va Saûlo ke mwene aûrage Daudi.)

¹⁸ Nake Daudi nîwacokerie Saûlo atîrî, “Nie nîrî û na andû a mûciî wetû nî ta ndûî, atî nîguo nduîke mûthoniwe wa mûthamaki?”

¹⁹ Nwatî rîrîa îvinda rîakinyire rîa Merabu kûvecanwa kûrî Daudi, vandû va ûguo nîwavecanirwe kûrî mûndû wetagwa Adirieli wa kuuma Mehola nîguo atuîke mûndûmûka wake.

²⁰ Kûnarî ûguo, Mikali mwarî wa Saûlo nîmeendanire na Daudi. Na rîrîa Saûlo eerirwe ûvoro ûcio, ke nîwakenire.

²¹ Saûlo eeîraga na ngoro atîrî, “Tiga mvecane Mikali kûrî Daudi, nîguo atuîke mûtego kûrî ke na nîakûragwa nî Afilisiti.” Kwoguo Saûlo nîwerire Daudi riita rîa kaîrî atîrî, “Rîu we nîûgûtuîka mûthoniwa.”

²² Kwoguo Saûlo nîwathire ndungata ciake ciarîrie Daudi vandû keverirî na imwîre atîrî, “Mûthamaki nîakenetue nîwe wana ndungata ciake cionthe nîikwendete, kwoguo îtîkîra kûvikia mwarî.”

²³ Nacio ndungata icio cia Saûlo ciera Daudi ûvoro ûcio, Daudi nîwacokirie atîrî, “Mûreciria nî ûndû mûvûthû gûtuîka mûthoniwe wa mûthamaki na makîria mûndû mûthîni ûtarî îgweta tanie.”

²⁴ Nacio ndungata icio cia Saûlo nîciamwîrire ûrîa Daudi aaugire,

²⁵ nake Saûlo agîciatha ithiî ikeere Daudi atîrî, “Mûthamaki ndarenda rûracio rwa mûviki, tiga ikonde cia ûruu cia arûme îgana rîmwe a Afilisiti, nîguo erîvîrîrie kûrî nthû ciake.” (Ûguo nîguo Saûlo aavangîte nîguo Daudi aûragwe nî Afilisiti.)

²⁶ Rîrîa ndungata cia Saûlo cierire Daudi ûrîa Saûlo aaugîte, Daudi nîwakenirue nî ûvoro ûcio wa gûtuîka mûthoniwe wa mûthamaki. Mbere ya mûthenya ûrîa watuîtwe wa ûviki ûvîtûka,

²⁷ Daudi nîmaathiîre marî na arûme ake na makîûraga Afilisiti magana maîrî. Daudi nîwacokire akîvirîra mûthamaki ikonde cia Afilisiti acio na akîmûtarîra cio nîguo atuîke mûthoniwe. Kwoguo Saûlo nîwavecanire Mikali mwarî kûrî Daudi nîguo atuîke mûka wake.

²⁸ Rîrîa Saûlo aamenyire waro atî Ngai-Mûnene aarî vamwe na Daudi na atî andû onthe a Isiraeli nîmaamwendete,

²⁹ nîwakîrîrîrie gwîtigîra Daudi na agîtûûra arî nthû yake ûtûûrorî wake wonthe.

³⁰ Na rîrîa rîonthe athigari a Afilisiti mangîaûkire kûrûa, Daudi nîke wavootanaga gûkîra athigari onthe a Saûlo. Kwoguo Daudi nîwamenyekanire mûno.