1Sam 17 - ÎVUKU RÎA ÛVORO MWARO

Goliathu nîwathithûkîre Aisiraeli

¹ Afilisiti nîmaaûnganirie mbûtû ciao cia mbaara kûu Soko nîguo makarûe. Soko rîarî îtûûra rîmwe rîa Juda. Maambire magema mao vandû vetagwa Efesi-damimu. Efesi-damimu îrî gatagatî ka Soko na Azeka.

² Nake Saûlo na andû a Isiraeli nîmaaûnganire na makîamba magema mao Kîamndarî Kîam Ela varîa meevarîrie marî nîguo marûe na Afilisiti.

³ Afilisiti nîmaarûngamire îgûrû rîa kîrîma mwena ûmwe, nao Aisiraeli makîrûngama îgûrû rîa kîrîma mwena ûcio wîngî. Vau gatagatî ka Afilisiti na Aisiraeli vaarî na Kîamnda.

⁴ Nakuo kûu Afilisiti maambire magema mao nîkwaumire njamba îmwe yetagwa Goliathu ûrîa warî wa kuuma îtûûra rîa Gathu. Goliathu aarî na ûraca wa mita ta ithatû.

⁵ Eekîrîte ngovia ya gîcango ya kûgitîra kîongo na agekîra nguo ya gîcango ya kûgitîra kîthûri îrîa yarî na ûrito ta wa kilo mîrongo îtano na mûgwanja.

⁶ Namo magûrû make maagitîrîtwe na mînyamû ya gîcango na agacuuria îtumû rîa gîcango rîa gwikia cianderî ciake.

⁷ Mûtî wa îtumû rîake watunguvîte ta mûtî wa macini îrîa îtumaga itambaa cia nguo, nayo cuuma ya kîongo gîa îtumû rîake Kîamrî na ûrito ta wa kilo mûgwanja. Nake ûrîa wamûkuuagîra ngo yake aathiîcaga amûtongoreretie.

⁸ Goliathu nîwarûngamire na akiugîrîria athigari a Isiraeli na akîmeera atîrî, “Mûkîte kûrûa mbaara nîkî? Nie nî Mûfilisiti namue mwî ndungata cia Saûlo! Thuurani mûndû ûmwe gatagatîrî kenyu aûke tûrûe nake.

⁹ Ethîrwa nîakûmvoota na ambûrage nîtûgûtuîka ngombo cienyu, nwatî ethîrwa nîngûmûvoota na nîmûrage, nîmûgûtuîka ngombo cietû mûtûtungatagîre.”

¹⁰ Nake Mûfilisiti ûcio nîwaugire atîrî, “Ûmûnthî nînathithûkîra mbûtû ya mbaara ya Isiraeli. Thuurani mûndû ûmwe nîguo tûrûe nake!”

¹¹ Rîrîa Saûlo na andû onthe a Isiraeli meeguire ûrîa Mûfilisiti ûcio aaugire, nîmaamakire na magîîtigîra.

Daudi nîwathiîre kûrîa Saûlo aatûûraga

¹² Daudi aarî mwanake wa Jesii. Nake Jesii aarî Mûefiratha wa kuuma Bethilehemu kûu Juda. Jesii aarî na anake anana na rîrîa Saûlo aarî mûthamaki Jesii nîwatûûrîte mîaka mîîngî na agatuîka mûthuuri mûkûrû mûno.

¹³ Anake ake athatû arîa akûrû nîmaathiîte mbaararî vamwe na Saûlo. Ûrîa warî mûkûrû eetagwa Eliabu, nake ûrîa wamûrûmîrîrîte eetagwa Abinadabu, nake wa kathatû Shama.

¹⁴ Daudi nîke warî kîvinganda. Aamûrwang'ina arîa akûrû nîmaathiîcanagia na Saûlo,

¹⁵ nwatî Daudi nîwamatigaga na agacoka Bethilehemu kûrîthia ng'ondu cia îthe.

¹⁶ Goliathu nîwekaraga akîvuragia Aisiraeli kîraûko na kîvwaî kwa îvinda rîa mîthenya mîrongo îna.

¹⁷ Nake Jesii nîwerire Daudi atîrî, “Oca kilo ino îkûmi cia ngano irî mvîvie na mîgate îno îkûmi ûvirîre aa mûrwanyûkwe kûrîa mambîte magema.

¹⁸ Na ûvirîre mûnene wa athigari icunjî îkûmi cia maguta ma îriia. Thiî na ûtuîrie ûrîa aa mûrwanyûkwe mekariî na ûke na kîndû gîa kwonania atî nîwamoonire na atî o nî aro.”

¹⁹ Mûthamaki Saûlo, aa mûrwanyûkwe na Aisiraeli onthe marî Kîamndarî Kîam Ela makîrûa na Afilisiti.

²⁰ Daudi nîwaûkîrire kîraûko tene mûthenya ûcio wîngî, agîtigîra ng'ondu mûndû wîngî wa kûirîthia, agîoca irio na akîthiî wata ûrîa Jesii aamwathîte. Daudi aakinyire kûrîa maambîte magema vîndî îrîa Aisiraeli maarî vakuvî kumagara mathiîte mbaararî makiugagîrîria nîûndû wa mbaara.

²¹ Nao athigari a Filisiti na a Isiraeli nîmeerekanîre mevarîrîtie nîguo marûe.

²² Daudi nîwatigire irio irîa aakuuîte kûrî mûndû ûrîa wamenyagîrîra irio cionthe, akîvinyûra na kûrîa mbaara yarûagîrwa na agîkethia aa mûrwang'ina.

²³ Wa akîaragia nao, Goliathu nîwaumîre mbere na akîaria wata ûrîa aaragia mbere. Na Daudi nîwamwîguire.

²⁴ Rîrîa Aisiraeli moonire Goliathu, nîmeguire guoya na makîûra nîûndû wa guoya.

²⁵ Nao nîmeeranire atîrî, “Taroriani mûndû ûyû! Na ma ke aûka kûnyararithia andû a Isiraeli. Mûthamaki Saûlo nîwîranîrîte atî mûndû ûrîa ûkaamûraga, nîakaamûva kîveo kîene. Mûthamaki nîagaacoka amûve mwarî amûvikie na andû a mûciî wa îthe matigaacoka kûrîva gooti kûu vûrûri wa Isiraeli.”

²⁶ Daudi nîwaûririe andû arîa maarî vakuvî nake atîrî, “Mûndû ûrîa ûkaaûraga Mûfilisiti ûyû na athengutîrie Isiraeli gîconoko gîkî-rî, akaavewa ndûî? Mûfilisiti ûyû ûtarî mûruu nîkwa arî ûrîkû ke atî nîguo anyararithie athigari a Ngai ûrîa ûtûûraga mwoyo?”

²⁷ Nao andû acio nîmaamwîrire ûrîa mûndû ûrîa ûkaaûraga Goliathu ageekwa.

²⁸ Nake Eliabu, mûrwang'ina ûrîa mûkûrû nîweguire Daudi akîaria na andû acio. Nîwarakarirue nî Daudi na akîmûria atîrî, “We ûreka atîa gûkû? Ûtigîre ng'ondu icio itarî nyîngî werûrî irî na û? Nîmbicî ûrîa ûreîgîria na ûûru ûrîa ûrî ngororî yaku! Nîûndû we ûûkîte tu kwona mbaara.”

²⁹ Nake Daudi nîwaûririe atîrî, “Nîkwa neka atîa rîu? Anga ndiagîrîrwe nî kûria kîûria?”

³⁰ Daudi nîwavûgûkîre mûndû wîngî na akîmûria kîûria wata kîu, na rîrîa rîonthe aaûragia, aacokagîrua macokio wata ma mbere.

³¹ Rîrîa andû meeguire ûrîa Daudi aaugaga, nîmaathiîre na makîra Saûlo, nake Saûlo agîtûmanîra Daudi.

³² Nake Daudi nîwerire Saûlo atîrî, “Mwathi wakwa, mûndû wana ûrîkû ndagetigîra Mûfilisiti ûyû! Nie ndungata yaku nîngûthiî kûrûa nake.”

³³ Nake Saûlo nîwacokerie Daudi atîrî, “Naarî, we ndûngîvota kûrûa na Mûfilisiti ûyû nîûndû we wî kavîcî kanini, na mûndû ûyû ethîrîtwe akîrûa mbaara kuuma vîndî îrîa aarî kavîcî kanini.”

³⁴ Nwatî Daudi nîwerire Saûlo atîrî, “Mwathi wakwa nie ndîthagia ng'ondu cia vava, na rîrîa rîonthe mûnyambû kana ngatûnyi yanyita kagondu kuuma ndîthiarî,

³⁵ nînîmîrûmagîrîra, ngamîringa na ngavonokia kagondu kau. Na ethîrwa nyamû îo nwa înjokerere, nîmînyitaga mûmero ngamîriva nginya ngamîûraga.

³⁶ Nîmbûragîte mînyambû na ngatûnyi, na ûguo nwaguo ngwîka Mûfilisiti ûyû ûtarî mûruu ûrîa ûnyararithîtie athigari a Ngai ûrîa ûtûûraga mwoyo.

³⁷ Ngai-Mûnene ûrîa ûmvonokagia kuuma kûrî mînyambû na ngatûnyi, nwake ûkamvonokia kuuma kûrî Mûfilisiti ûyû.” Nake Saûlo nîwerire Daudi atîrî, “Nî waro, thiî na Ngai-Mûnene aroîkara nawe.”

³⁸ Saûlo nîwacokire akîva Daudi nguo yake ke mwene cia mbaara, nîwekîrire Daudi ngovia ya gîcango ya kûgitîra kîongo na akîmûva îgooti rîa gîcango rîa kwîgitîra kîthûri.

³⁹ Daudi nîwoverere rûviû rwa njûra rwa Saûlo îgûrû rîa nguo icio, akîgeria kûthiî, nwatî ndaavota nîûndû ndaamenyerete gwîkîra nguo icio. Daudi nîwacokire akîîra Saûlo atîrî, “Nie ndingîvota kûrûa mbîkîrîte nguo ino, nîûndû ndirî mûmenyanîriu nacio.” Kwoguo Daudi nîwairutire cionthe.

⁴⁰ Nîwacokire agîoca mûragi ûrîa aarîthagia ng'ondu naguo, akîthuura tûthiga tûtano tûnyoroku kuuma karûnjîrî na agîtwîkîra kamûvukorî gake, akînyita gîkûtha gîake na njara na agîkuvîvîria Goliathu.

Daudi nîwavootire Goliathu

⁴¹ Goliathu nîwathiîre mbere agîkuvîvagîria Daudi atongoreretue nî mûndû ûrîa wamûkuuagîra ngo.

⁴² Na rîrîa Goliathu aaroririe na akîona Daudi waro, ke nîwamûnyararire nîûndû Daudi kaarî kavîcî kanini na kathaka.

⁴³ Nake Goliathu nîwaûririe Daudi atîrî, “Nie nîkwa nî ngui atî nîûgûka kûrî nie na mûragi?” Nîwarumire Daudi akîgwetaga ngai ciake.

⁴⁴ Mûfilisiti ûcio nîwerire Daudi atîrî, “Nguvîvîria na nînengera iconi cia rîerarî na nyamû cia kîthaka kimba gîaku.”

⁴⁵ Daudi nîwerire Goliathu atîrî, “We ûkîte kûrî nie na rûviû rwa njûra, îtumû na îtumû rîa gwikia, nwatî nie nîmbûka kûrî we na rîîtwa rîa Ngai-Mûnene mwene vinya wonthe, na nîke Ngai wa athigari a Isiraeli ûrîa we ûnyararithîtie.

⁴⁶ Ûmûnthî Ngai-Mûnene nîakûmva we, ngûvoote na ngûnuke kîongo na njoke mve iconi na nyamû cia kîthaka ciimba cia athigari a Afilisiti irîe, nîguo andû a nthî mamenye atî Isiraeli kwîthagîrwa kûrî na Ngai.

⁴⁷ Nao andû aya onthe marî ava nîmakûmenya atî Ngai-Mûnene ndavonokanagia na rûviû rwa njûra na îtumû. Ke nîke ûvootanaga mbaararî na nîke ûgûtûma tûmûvoote mue muonthe.”

⁴⁸ Rîrîa Goliathu aambîrîrie kûthiî aroretie na kûrîa Daudi aarî rîngî, Daudi nîwavinyûrire narua aroretie na kûrîa athigari a mbaara a Afilisiti maarî nîguo akarûe na Mûfilisiti ûcio.

⁴⁹ Nîwacokire akîruta kathiga mûvukorî wake, agîgekîra gîkûtharî na akîringa Goliathu kîthithi nako. Kathiga kau nîgaatonyire ndaarî ya nyama na Goliathu akîgûa nthî na îvu.

⁵⁰ Kwoguo Daudi nîwavûthîre gîkûtha na kathiga na akîvoota Goliathu atakûvûthîra rûviû rwa njûra.

⁵¹ Daudi nîwavinyûrire akîrûngama vakuvî na Goliathu, agîcomora rûviû rwa Goliathu njûrarî, akîmûtinia kîongo na akîmûraga. Nao Afilisiti nîmaatorokire rîrîa moonire atî njamba yao nîyaûragwa.

⁵² Nao andû a Isiraeli na Juda nîmaathiîre makiugagîrîria na makîngata Afilisiti, makîmakinyia nginya Gathu na ivingorî cia Ekironi. Afilisiti arîa maativangîtue maagûcaga njîrarî kuuma Sha-araimu nginya Gathu na Ekironi.

⁵³ Rîrîa Aisiraeli maacokire maumîte kwîngata Afilisiti, nîmoocire indo cionthe irîa ciarî kûrîa Afilisiti maambîte magema.

⁵⁴ Nake Daudi nîwocire kîongo Kîam Goliathu na agîkîvira Jerusalemu, nwatî indo cia mbaara irîa Goliathu aavûthagîra agîciga îgemarî rîake.

Daudi nîwamenyithanirue na Saûlo

⁵⁵ Rîrîa Saûlo oonire Daudi athiîte kûrûa na Goliathu, ke nîwaûririe Abineri atîrî, “Abineri, kavîcî gaka nî ka û?” Abineri aarî mûnene wa athigari a Saûlo. Nake Abineri nîwamûcokerie atîrî, “Mwathi wakwa nie ndiîcî kavîcî gaka nî ka û.”

⁵⁶ Nake Saûlo nîwathire Abineri athiî agatuîrie na amenye nî ka û.

⁵⁷ Kwoguo rîrîa Daudi aacokire kûrîa maambîte magema arîkia kûûraga Goliathu, Abineri nîwamûvirire kûrî Saûlo. Vîndî îo, Daudi nwa wakuuîte kîongo Kîam Goliathu.

⁵⁸ Nake Saûlo nîwaûririe Daudi atîrî, “Mwanake ûyû, aguo nû?” Nake Daudi nîwamûcokerie atîrî, “Nie nîrî mûvîcî wa ndungata yaku Jesii ya kuuma Jerusalemu.”