1Sam 16 - ÎVUKU RÎA ÛVORO MWARO

Daudi nîwetîrîrue maguta atuîke Mûthamaki

¹ Nake Ngai-Mûnene nîwaûririe Samueli atîrî, “Nîûtûûra ûrîragîra Saûlo nginya rî? Nie nînîmûregete athiî na mbere arî mûthamaki wa Isiraeli. Îcûria mûcuva waku maguta ma mîtamaiyû îrîa îciaraga matunda na ûthiî Bethilehemu kwa mûndû wîtagwa Jesii, nîûndû nie nî nthuurîte ûmwe wa anake ake atuîke mûthamaki.”

² Nake Samueli nîwaûririe atîrî, “Nîngîka ûguo atîa? Saûlo angîgua ûguo nîkwa akambûraga!” Nake Ngai-Mûnene nîwerire Samueli atîrî, “Oca mori ûthiî nayo na uge atî ûthiîte kuo kûrutîra Ngai-Mûnene kîgongoona.

³ Na wîte Jesse kîgongoonarî kîu na nîngaakwîra ûrîa wagîrîrwe nî gwîka. Ûgetîrîria mûndû ûrîa ngaakwonia maguta nîguo atuîke mûthamaki.”

⁴ Nake Samueli nîwekire ûrîa Ngai-Mûnene aamwathire na akîthiî Bethilehemu. Atongoria a îtûûra rîu nîmaaûkire kûmûtûnga makinainaga na makîmûria atîrî, “Waûka wî na thayû?”

⁵ Nake nîwacokirie atîrî, “Îî naûka nîrî na thayû. Naûka kûrutîra Ngai-Mûnene kîgongoona. Îîtherieni na mûke tûthiî.” Nîwacokire akîîra Jesse na anake ake metherie wanao, na akîmeeta kîgongoonarî.

⁶ Rîrîa maakinyire, Samueli nîwaroririe mûvîcî wa Jesii ûrîa wetagwa Eliabu na akîîra na ngoro atîrî, “Nama mûndû ûyû ûrûngamîte ava mbere ya Ngai-Mûnene nîke athuurîte.”

⁷ Nwatî Ngai-Mûnene nîwerire Samueli atîrî, “Tiga kûroria ûrîa aracavîte kana ûrîa arî mûthaka. Nie nînîmûregete, nîûndû ndiroragia ta ûrîa andû maroragia. Andû maroragia ûrîa mûndû ethagîrwa ekariî akîonwa na metho, nwatî nie ndoragia ngoro ndaarî.”

⁸ Nake Jesii nîwetire mûvîcî ûrîa wetagwa Abinadabu na akîmûrete varî Samueli. Nwatî Samueli akiuga atîrî, “Naarî wanake ûyû tîke Ngai-Mûnene athuurîte.”

⁹ Vuva wa ûguo, Jesse akîrete Shama. Nake Samueli akiuga atîrî, “Wana ûyû tîke Ngai-Mûnene athuurîte.”

¹⁰ Na njîra wata îo, Jesse nîwaretire anake ake mûgwanja kûrî Samueli. Nake Samueli nîwerire Jesse atîrî, “Naarî, gûtirî wanarî ûmwe wa aya ûthuurîtwe nî Ngai-Mûnene.”

¹¹ Nake Samueli nîwaûririe Jesse atîrî, “Wî na anake engî?” Nake Jesii nîwacokirie atîrî, “Nîatigarîte wa kîvinga nda, nwatî nîkwa ararîthia ng'ondu.” Nake Samueli nîwerire Jesse atîrî, “Mûtûmanîre agetwe, nîûndû tûtingîkara nthî nginya rîrîa agaakinya ava.”

¹² Kwoguo Jesii nîwamûtûmanîre na akîretwe. Nake aarî mwanake mûthaka, wîna vinya na aarî na metho maakengaga. Nake Ngai-Mûnene nîwerire Samueli atîrî, “Mûndû nî ûyû. Ûkîra na ûmwîtîrîrie maguta.”

¹³ Samueli nîwocire mûcuva ûrîa warî na maguta ma mîtamaiyû îrîa îciaraga matunda na agîtîrîria Daudi maguta aa mûrwang'ina makîonaga. Naguo roho wa Ngai-Mûnene nîwanyûrûrûkîre Daudi wa rîmwe na agîkara nake kuuma mûthenya ûcio. Nake Samueli nîwacokire Rama.

Daudi arî mûciî gwa Saûlo

¹⁴ Roho wa Ngai-Mûnene nîwatiganîrie Saûlo, naguo roho mûcûku atûmîtwe nî Ngai-Mûnene akîambîrîria kûmûnyarira.

¹⁵ Nacio ndungata cia Saûlo nîciamwîrire atîrî, “Tue nîtwîcî atî roho mûcûku atûmîtwe nî Ngai rîu nîarakûnyarira.

¹⁶ Kwoguo Mwathi wetû tûve rûtha tue ndungata ciaku nîguo tûthiî tûgacarie mûndû wicî kûthaka ngita, nîguo roho mûcûku aûka kûrî we atûmîtwe nî Ngai, mûndû ûcio nwa akûthakagîre ngita yake na ûkegua waro rîngî.”

¹⁷ Nake nîwathire ndungata ciake na agîciîra atîrî, “Njarîriani mûndû wicî kûthaka ngita waro, na mûndetere ke.”

¹⁸ Ûmwe wa ndungata ciake nîwaugire atîrî, “Jesii ûrîa wa îtûûra rîa Bethilehemu arî na mûvîcî wicî kûthaka waro. Ke nî mûndû mûmîrîru na mûthaka, na nî mûthigari mwaro na nî mwaria waro, na Ngai-Mûnene arî vamwe nake.”

¹⁹ Kwoguo Saûlo nîwatûmire anjaama mathiî kûrî Jesii makamwîre atîrî, “Ndetere mûvîcîguo Daudi ûrîa ûrîthagia ng'ondu.”

²⁰ Nake Jesii nîwocire koori ka mbûri, mvunda îkuuîte mîgate na mûvuko wa rûûo wîcûrîtue ndivei na akîîra Daudi athiî nacio kûrî Saûlo.

²¹ Nake Daudi nîwathiîre kûrî Saûlo na agîtuîka ndungata yake. Saûlo nîwendire Daudi mûno na akîmûthuura atuîke wa kûmûkuuagîra indo ciake cia mbaara.

²² Kwoguo Saûlo nîwatûmire ndûmîrîri kûrî Jesii na akiuga atîrî, “Tiga Daudi ekare gûkû akîndungatagîra, nîûndû nie nînîmwendete.”

²³ Kuuma vîndî îo, rîrîa rîonthe roho mûcûku atûmîtwe nî Ngai aûka kûrî Saûlo, Daudi nîwocaga ngita yake na akamîthaka. Kwoguo roho ûcio mûcûku nîwathengutagîra Saûlo na akegua waro rîngî.