1Sam 15 - ÎVUKU RÎA ÛVORO MWARO

Saûlo nîwarûire na andû a Amaleki

¹ Nake Samueli nîwerire Saûlo atîrî, “Nie nînie naatûmirwe nî Ngai-Mûnene ngwîtîrîrie maguta nîguo ûtuîke mûthamaki wa andû ake a Isiraeli. Rîu thikîrîria ndûmîrîri ya Ngai-Mûnene mwene vinya wonthe.

² Ke arauga atî, nîakûveritha andû Amaleki, nîûndû wa ûrîa methe mao ma tene maareganire andû a Isiraeli rîrîa maaumaga Misiri.

³ Rîu thiî na ûûrage andû onthe a Amaleki na ûcûkangie indo ciao cionthe viû. Ndûgatigarie wanarî kîndû: ûûrage arûme onthe, aka, ciana na tûkenge, ng'ombe, ng'ondu, ngamîîra na mvunda.”

⁴ Kwoguo Saûlo nîwerire andû maûngane vamwe kûu Telaimu na akîmatara. Nao maarî athigari ngiri magana maîrî a kuuma Isiraeli na engî ngiri îkûmi kuuma Juda.

⁵ Nake Saûlo marî na arûme ake nîmaathiîre îtûûrarî rîa Amaleki na magîkara methithîte Kîamndarî.

⁶ Nake nîwerire Akeni atîrî, “Nyûrûrûkani muume gûkû mûthengutîre Amaleki nîguo ndikamûraganîrie vamwe nao, nîûndû mue nîmwekire Aisiraeli ciîko mbaro vîndî îrîa maaumîte Misiri.” Kwoguo Aakeni nîmaathengutîre Amaleki.

⁷ Nake Saûlo nîwavootire Amaleki kuuma Havila nginya Shuri, îrîa îriganîtie na Misiri mwena wa îrathîro.

⁸ Saûlo nîwanyitire Agagi, mûthamaki wa Amaleki arî mwoyo na akîûraga andû onthe.

⁹ Nwatî Saûlo na arûme ake matiaûraga Agagi, ng'ondu irîa mbaro na ndegwa imwe irîa ciarî mbaro mûno, tûcaû na tûgondu tûrîa twarî twaro mûno, na indo cionthe irîa ciarî mbaro. Nîmaacûkangirie indo cionthe irîa ciarî nthûku na itaarî na vata.

Ngai-Mûnene nîwaregire mûthamaki Saûlo

¹⁰ Ngai-Mûnene nîwerire Samueli atîrî,

¹¹ “Nie nînîrerira nîûndû wa kûthuura Saûlo atuîke mûthamaki. Ke nîandiganîrîtie na nîaregete kwathîkîra maathani makwa.” Nake Samueli nîwarakarire na akîraara akîvoya Ngai-Mûnene ûtukû mûgima.

¹² Samueli nîwaramûkire kîraûko tene mûthenya ûcio warûmîrîrîte nîguo agacarie Saûlo. Nake nîwegwire atî Saûlo nîwathiîte îtûûrarî rîa Karimeli kûrîa aathondekete kînyamû gîa gûtûma aririkanagwe, na aarî mûvîtûku na akathiî Giligali.

¹³ Nake Samueli akinya kûrî Saûlo, Saûlo nîwamwîrire atîrî, “Ngai-Mûnene arokûrathima Samueli! Nie nîmvingîtie ûrîa Ngai-Mûnene athanîte.”

¹⁴ Nake Samueli nîwaûririe atîrî, “Nîndûî vi kîratûma mbîgue ndegwa na ndûrûme ikîania?”

¹⁵ Nake Saûlo nîwacokirie akiuga atîrî, “Andû akwa maaûkire nacio kuuma kûrî Amaleki. Maathuurire ndûrûme na ndegwa irîa mbaro mûno nîguo mairute irî îgongoona kûrî Ngai-Mûnene, Ngai waku, nacio icio ciîngî tûgîicûkangia viû.”

¹⁶ Nake Samueli nîwerire Saûlo atîrî, “Takira ngwîre ûrîa Ngai-Mûnene arambîrire vwaî.” Nake Saûlo akîra Samueli atîrî, “Tambîra.”

¹⁷ Nake Samueli nîwerire Saûlo atîrî, “Wana ethîrwa wîyonaga takwa ûtarî vata, Ngai-Mûnene nîwagwîtîrîrie maguta ûtuîke mûthamaki wa Isiraeli,

¹⁸ na nîwakwathire ûthiî ûgacûkangie evia acio a Amaleki, ûrûe nao nginya ûmaûrage onthe.

¹⁹ Nîndûî vi kîratûmire ûrega kwathîkîra Ngai-Mûnene? Nîndûî kîratûmire ûteng'ere gûtava indo na we weka ûndû mûcûku mbere ya Ngai-Mûnene?”

²⁰ Nake Saûlo nîwerire Samueli atîrî, “Nie nînathîkîre Ngai-Mûnene. Nînathiîre na ngîka wata ûrîa aambîrire, nînaûkire na Agagi, Mûthamaki wa Amaleki na ngîûraga Amaleki onthe viû.

²¹ Nwatî andû akwa matiaûraga ndûrûme na ndegwa irîa mbaro maatavire, vandû va ûguo nîkwa maairetire gûkû Giligali nîguo mairute îgongoona kûrî Ngai-Mûnene, Ngai waku.”

²² Samueli nîwaûririe atîrî, “Ngai-Mûnene akenagua nî maruta ma magongoona kana nî wathîki? Nî waro makîria kwathîkîra Ngai-Mûnene gûkîra kûmûrutîra îgongoona rîa ndûrûme irîa noru.

²³ Kûregana na Ngai-Mûnene kwîganene na wîvia wa ûragûri, naruo rûng'athio nî wîvia wîganene na wîvia wa kûvoya mûvuanano. Nîûndû nîwaregire gwîka ûrîa Ngai-Mûnene aakwîrire wîke, wanake nîaregete ûtuîka mûthamaki.”

²⁴ Nake Saûlo nîwerire Samueli atîrî, “Îî, nie nînjîvîtie. Nînaaregire gwîka ûrîa Ngai-Mûnene ambathîte, wana ûrîa we wambîrîte. Nînetigîre andû akwa na ngîka ûrîa meendaga.

²⁵ Nwatî rîu nîrakûthaitha ûnjovere wîvia wakwa na tûcoke nawe, nîguo ngagooce Ngai-Mûnene.”

²⁶ Nake Samueli nîwerire Saûlo atîrî, “Nie ndigûcokania nawe, nîûndû nîûregete ûrîa Ngai-Mûnene akwathîte, nake nîakûregete ûrî ta mûthamaki wa Isiraeli.”

²⁷ Rîrîa Samueli aagarûrûkire athiî, Saûlo nîwanyitire nguo ya Samueli na îgîtembûka.

²⁸ Nake Samueli akîîra Saûlo atîrî, “Ngai-Mûnene nîatembûra ûthamaki wa Isiraeli kuuma kûrî we ûmûnthî na nîa akaûvecana kûrî mûndû wîngî mwaro gûgûkîra.

²⁹ Nake Ngai wa Isiraeli ûrîa ûrî riiri ndaveenanagia kana ericûkwe, nîûndû ke ndekariî ta mûndû.”

³⁰ Saûlo nîwacokirie na akiuga atîrî, “Nie nînjîvîtie, nwatî mva gîtîîo mbere ya atongoria a andû akwa a Isiraeli. Tûcoke nawe nîguo ngagooce Ngai-Mûnene, Ngai waku.”

³¹ Kwoguo Samueli nîwacokire marî na Saûlo Giligali, nake Saûlo akîgooca Ngai-Mûnene.

³² Samueli nîwathanire akiuga atîrî, “Tandetereni Agagi, Mûthamaki wa Amaleki ava.” Nake Agagi nîwathiîre kûrî Samueli aûmîrîrîtie akîîraga na ngoro atîrî, “Nama ûrûrû wa gîkuû nîmûthiru.”

³³ Nake Samueli nîwerire Agagi atîrî, “Wata ûrîa rûviû rwaku rwa njûra rwanatûma aka eengî matigwe matarî na ciana, ûguo nwaguo rîu nyûkwe agûtigwa atarî na mwana.” Nake Samueli agîtinangia Agagi tûcunjî mbere ya metha ya kîgongoona kûu Giligali.

³⁴ Vuva wa ûguo, Samueli nîwathiîre Rama nake mûthamaki Saûlo akîînûka gwake mûciî kûu Gibea.

³⁵ Nake Samueli ndoona Saûlo rîngî nginya rîrîa aakwire. Nwatî Samueli nîwarîrîre Saûlo mûno. Na Ngai-Mûnene nîweririre nîûndû wa gûtua Saûlo mûthamaki wa Isiraeli.