1Sam 14 - ÎVUKU RÎA ÛVORO MWARO

Jonathani nîwarûire na Afilisiti

¹ Mûthenya ûmwe Jonathani, mûvîcî wa Saûlo nîwerire mwanake ûrîa wamûkuuagîra indo ciake cia mbaara atîrî, “Ûka, tûthiî mûringo ûrîa wîngî kûrîa Afilisiti marî.” Nwatî Jonathani ndeera îthe Saûlo ûguo.

² Saûlo aatûûraga arî rungu rwa mûkûngûmanga ûrîa ûrî Migironi, vakuvî na Gibea. Nao andû arîa maarî nake maarî ta arûme magana matandatû.

³ (Amwe gatagatîrî ka arûme acio maarî, mûthînjîri-Ngai ûrîa wetagwa Ahija na nîke wakuuîte efodi. Ahija aarî mûvîcî wa Ahitubu; Ahitubu aarî mûrwang'ina na Ikabodi. Ikabodi nake aarî mûvîcî wa Finehasi, Finehasi aarî mûvîcî wa Eli, ûrîa warî mûthînjîri-Ngai wa Ngai-Mûnene kûu Shilo.) Nao arûme acio matiamenya atî Jonathani aarî mûthiîu.

⁴ Navo varîa Jonathani maarî, vaarî na nthingo igîrî ndaca cia mathiga mîena wa yoîrî. Rûthingo rwa mwena ûmwe rwetagwa Bozezi, naruo rwa mwena ûcio wîngî rwetagwa Sene.

⁵ Rûthingo rûmwe rwarî mwena wa rûgûrû rûroranîtie na Mikimashi, naruo rûu rwîngî rwarî mwena wa îveti rûroranîtie na Geba.

⁶ Nake Jonathani nîwerire mwanake ûcio wamûkuuagîra indo ciake cia mbaara atîrî, “Ûka, tûthiî mûringo ûrîa wîngî kûrîa Afilisiti arîa matarî aruu marî. Ngai-Mûnene avota gûtûtethia; nîûndû gûtirî kîndû kîngîgiria Ngai-Mûnene atûtethie wana ethîrwa tûtirî eengî.”

⁷ Nake mwanake ûcio nîwacokerie Jonathani na akîmwîra atîrî, “Thiî na mbere gwîka ûndû wa wonthe ûrîa meciria maku marakwîra wîke; nie nîrî vamwe nawe.”

⁸ Nake Jonathani nîwerire mwanake ûcio atîrî, “Ûguo nî waro, tue nîkwa tûkûthiî mûringo ûrîa wîngî nîguo Afilisiti matûone.

⁹ Ethîrwa o nîmagûtwîra tûmeterere maûke kûrî tue, tue nîtûkûmeterera varîa tûrî na tîtunûkia tûthiî kûrî o.

¹⁰ Nwatî o mangîtwîre tunûkie rûrî rûûri rwa gûtwonia atî Ngai-Mûnene nîatûvotithîtie kûmavoota; tue nîtûkunûkia.”

¹¹ Nao oîrî nîmeeyonithanirie kûrî Afilisiti, nao Afilisiti nîmaaugire atîrî, “Aia! Taroriani mwone Ahibirania amwe makiuma marimarî kûrîa marethithîte!”

¹² Nao arûme a Afilisiti nîmeetire Jonathani marî na mwanake ûcio wamûkuuagîra indo cia mbaara, makîmeera atîrî, “Ta unûkiani mûke gûkû tûrî! Tûrî na kaûndû tûrenda kûmwîra!” Nake Jonathani nîwerire mwanake ûcio atîrî, “Ûka ûnûmîrîre tunûkie, nîûndû Ngai-Mûnene nîatûmîte Afilisiti mavootwe nî Aisiraeli.”

¹³ Nake Jonathani nîwaunûkirie akurumîte na maru anyitîte nthî na njara, arûmîrîrîtwe nî mwanake ûcio wamûkuuagîra indo cia mbaara. Jonathani marî na mwanake ûcio nîmaathiîre wa makîûragaga Afilisiti.

¹⁴ Narîo rîûraganarî rîu rîa mbere, Jonathani marî na mwanake ûcio wamûkuuagîra indo cia mbaara nîmaaûragire arûme ta mîrongo îrî mûgûndarî ta wa nuthu eka.

¹⁵ Nao Afilisiti onthe arîa maarî na kûu mîgûndarî makîmaka. Andû arîa maathiîte kûûragana vamwe na athigari arîa maarî magemarî nîmaainainire nîûndû wa guoya; nîkwagîre na kîthingithia nthî na gûkîgîa na kîmako kînene mûno.

Afilisiti nîmaavootirwe

¹⁶ Nao arangîri a Saûlo marî Gibea kûu vûrûrirî wa Benjamini nîmoonire Afilisiti makîvinyûra mîena yonthe marî avîngîcîku.

¹⁷ Vîndî îo Saûlo nîwerire arûme arîa maarî vamwe nake atîrî, “Ta tarani andû nîguo mwone nîûrîkû ûtarî vo.” Rîrîa maataranire, nîmoonire atî Jonathani matiarî vo.

¹⁸ Nake Saûlo nîwerire Ahija, ûrîa mûthînjîri-Ngai atîrî, “Rete îthandûkû rîa Kîrîkanîro rîa Ngai ava.” (Mûthenya ûcio, Ahija aathiîte arîkuîte arî mbere ya andû a Isiraeli.)

¹⁹ Na vîndî îrîa Saûlo aaragia na Ahija, kîvîngîcî gîkîthiî na mbere kwongerereka kûu Afilisiti maatûûraga. Nake Saûlo nîwerire Ahija atîrî, “Tiga kûmathaithanîra kûrî Ngai-Mûnene rîngî!”

²⁰ Kwoguo Saûlo marî na arûme onthe arîa maarî nake nîmaaûnganire vamwe na makîthiî kûrûa na Afilisiti. Nao rîrîa maakinyire kuo nîmeethîrîrie Afilisiti magîtemanganaga o ene nîûndû kwarî na kîvîngîcî kînene mûno.

²¹ Nao Ahibirania amwe arîa maatûûranagia vamwe na Afilisiti vau mbererî nîmaagarûrûkire na makîthiî mwena wa Saûlo na Jonathani.

²² Nao Aisiraeli arîa engî meethithîte vûrûrirî ûrîa ûrîa irîma wa Efiraimu megua atî Afilisiti nîkwa maaûrîte, wanao nîmaanyitanîre na Saûlo na Jonathani na makîthiî kûrûa na Afilisiti.

²³ Nao nîmaarûire mbaara îo na makîvîtûka Bethaveni. Nake Ngai-Mûnene nîwavonokirie andû a Isiraeli mûthenya ûcio.

Maûndû marîa meekîkire mbaara yathira

²⁴ Nao andû a Isiraeli nîmaathirirwe nî vinya mûno mûthenya ûcio, nîûndû Saûlo nîwamevîtithîtie mwîvîtwa na akîmeera atîrî, “Mûndû wa wonthe ûrîa ûkaarîa irio ûmûnthî mbere ya gûtuke nie ndarîkîtie gûtooria nthû ciakwa aronyitwa nî kîrumi.” Kwoguo gûtirî mûndû warîre irio mûthenya ûcio wonthe.

²⁵ Nao andû acio onthe a Isiraeli nîmaakinyire kûndû kwarî na mîtî mîngî na makîthîrîria ûûkî ûrî vandû nthî.

²⁶ Na rîrîa andû acio maatonyire mûtitûrî ûcio nîmoonire mîtî îcûrîte ûûkî taka ûgîtîkaga matata; nwatî gûtirî mûndû waûrûmire, nîûndû andû onthe nîmeetigagîra mwîvîtwa ûrîa meevîtithîtue nî Saûlo.

²⁷ Nwatî Jonathani ndeeguîte îthe akîîvîtithia andû mwîvîtwa; kwoguo ke nîwatonyirie mûthiia wa kamûtî karîa aanyitîte îgorî rîa ûûkî na agîcoka akîrîa, namo metho make makîthera wa rîmwe.

²⁸ Nake mûndû ûmwe gatagatîrî ka andû acio nîwaugire atîrî, “Tue tuonthe tûrî athiru vinya nîûndû wa kûvûta, nwatî aguo nîevîtithiirie andû mwîvîtwa auga atî, ‘Mûndû ûrîa wonthe ûkaarîa irio ûmûnthî aronyitwa nî kîrumi’ ”

²⁹ Nake Jonathani nîwaugire atîrî, “Kaî vava nîatûmîte andû onthe methîrwa marî na ruuo-î! Taroriani mwone ûrîa metho makwa matherete nîûndû wa kûrîa kaûûkî kanini!

³⁰ Ûmûnthî kûngîrî kwaro makîria kethîrwa andû aya nîmararîte irio irîa maatavîte kuuma kûrî nthû ciao matakûgirua. Nîûndû nîtûngîaûraga Afilisiti eengî makîria!”

³¹ Nao Aisiraeli nîmaarivire Afilisiti mûthenya ûcio marutîtie Mikimashi na magîkinya Aijaloni. Kavindarî kau, Aisiraeli marî athiru vinya mûno nîûndû wa kûvûta;

³² Kwoguo nîmaateng'erere ng'ondu na ng'ombe irîa maatavîte kuuma kûrî nthû ciao, makîithînjîra vau nthî na makîrîa nyama irî na nthakame.

³³ Nake mûndû ûmwe nîwerire Saûlo atîrî, “Ta roria, andû nîmareka wîvia kûrî Ngai-Mûnene makîrîa nyama irî na nthakame.” Nake Saûlo nîwaugire atîrî, “Mue mûrî aunu watho. Vingiritiani îthiga rînene mûndetere ava.”

³⁴ Nake Saûlo nîwaugire rîngî atîrî, “Thiîni kûrî andû onthe na mûmeere wa mûndû wonthe aûke na ndegwa yake îmwe wana ndûrûme ava. Nao maithînjîre ava na marîe, na nwanginya mamenyerere matikeevîrie Ngai-Mûnene makîrîa nyama irî na nthakame.” Kwoguo andû acio onthe, wa mûndû wa mûndû nîwavirire nyamû ciake ûtukû ûcio na makîithînjîra vau.

³⁵ Nake Saûlo agîtumîra Ngai-Mûnene metha ya kîgongoona riita rîa mbere.

³⁶ Nake Saûlo nîwerire arûme ake atîrî, “Tigani tûnyûrûrûke kûrî Afilisiti ûtukû wa ûmûnthî tûkamacune indo ciao, na tûmaûrage onthe nginya rûyû macangîa.” Nao magîcokia na makiuga atîrî, “Îka wa ûrîa we ûkwona kwagîrîrîte.” Nwatî mûthînjîri-Ngai nîwaugire atîrî, “Tigani twambe tûvoe Ngai.”

³⁷ Nake Saûlo nîwaûririe Ngai atîrî, “Nie nîmbagîrîrwe nthiî ngarûe na Afilisiti? We nîûgûtûvotithia kûvootana?” Nwatî Ngai ndaacokeria Saûlo mavoya make mûthenya ûcio.

³⁸ Kwoguo Saûlo nîwerire atongoria onthe a andû atîrî, “Ta ûkani ava twîthugunde nîguo tûmenye nî wîvia ûrîkû wîkîtwe ûmûnthî.

³⁹ Nie nîngwîvîta na Ngai-Mûnene ûrîa ûtûûraga mwoyo, ûrîa ûvotithagia andû a Isiraeli kûvootana atî, mûndû ûrîa ûkwîthîrwa arî na mavîtia nwanginya aûragwe, wana ethîrwa arî mûûriû wakwa, Jonathani.” Nwatî gûtirî mûndû wanarî ûmwe gatagatîrî ka andû acio onthe waugire ûndû.

⁴⁰ Ke nîwacokire akîîra andû atîrî, “Mue muonthe thiîni mwena ûûrîa wîngî, natue tûrî na Jonathani nîtwîthîrwa tûrî mwena ûyû.” Nao nîmaacokirie na makiuga atîrî, “Îka wa ûrîa we ûkwona kwagîrîrîte.”

⁴¹ Saûlo nîwavoire kûrî Ngai-Mûnene na akîmwîra atîrî, “Ngai-Mûnene, Ngai wa Isiraeli, nîkwa warega kûnthikîrîria ûmûnthî nîkî? Ethîrwa nînie nîrî na mavîtia kana nî mûûriû wakwa, Jonathani njokeria na njîra Urimu; nwatî ethîrwa mavîtia nî ma andû aku a Isiraeli, njokeria na njîra ya Thumimu.” Nake Jonathani marî na Saûlo nîo moonekire mevîtie. Nao andû acio engî makîvonoka.

⁴² Nake Saûlo nîwaugire rîngî atîrî, “Tuonie nîûrîkû ûrî na mavîtia gatagatîrî ka mûûriû wakwa, Jonathani nanie.” Na Jonathani nîke wonekire arî na mavîtia.

⁴³ Nake Saûlo nîwaûririe Jonathani ûrîa eekîte. Nake Jonathani akîmûcokeria na akîmwîra atîrî, “Nie nînaarîre kaûûkî kanini na mûthiia wa kamûtî karîa naanyitîte na njara. Na rîu nînîîvarîrîtie gûkua.”

⁴⁴ Nake Saûlo nîwerire Jonathani atîrî, “Ngai arombûraga ethîrwe we tî ûkua!”

⁴⁵ Nao andû nîmeerire Saûlo atîrî, “Kûngîvoteka atîa Jonathani akue na arutîte wîra mûnene ûguo wa gûtûma andû a Isiraeli mavootane? Naarî! Tue nîtwevîta na Ngai-Mûnene ûrîa ûtûûraga mwoyo atî, gûtirî wanarî rûcuîrî rûmwe rûkauma kîongorî gîake. Ûrîa ekire ûmûnthî wîkîkire na ûtethio wa Ngai.” Kwoguo andû nîmaavonokirie Jonathani kuuma gîkuûrî.

⁴⁶ Vuva wa ûguo, Saûlo nîwaunûkirie na agîtiga kûrûmîrîria Afilisiti, nao Afilisiti magîcoka vûrûrirî wao.

Wathani wa Saûlo na andû a mûciî wake

⁴⁷ Vîndî îrîa Saûlo aatuîkire Mûthamaki wa Isiraeli, nîwarûire na nthû ciake cionthe kuuma mîena yonthe: Nîwarûire na Amoabu, andû a Amoni, Aedomu, athamaki a Zoba na Afilisiti. Nao andû onthe arîa ke aathiîcaga kûrûa nao, nîwamavootaga.

⁴⁸ Nake nîwarûire na ûcamba na akîvoota andû a Amaleki, na akîvonokia andû a Isiraeli kuuma kûrî nthû ciake irîa ciatavîte indo ciao.

⁴⁹ Nao anake a Saûlo maarî Jonathani, Ishivi, na Malikishua. Mwîrîtu wake ûrîa mûkûrû eetagwa Merabu, nake ûrîa mûnini eetagwa Mikali.

⁵⁰ Nake mûka wa Saûlo eetagwa Ahinoamu, mwarî wa Ahimaazi; na mûndû ûrîa wathaga gîkundi gîake Kîam mbaara eetagwa Abineri, mûvîcî wa Neri. Neri aarî îthe mûnini wa Saûlo.

⁵¹ Kishu îthe wa Saûlo na Neri îthe wa Abineri maarî anake a Abieli.

⁵² Ûtûûrorî wake wonthe, Saûlo nîwarûaga na Afilisiti na vinya mûno; na rîrîa rîonthe ke oonaga mûndûmûrûme wîna vinya kana mûmîrîru, ke nîwamwocaga na akamûtonyia gîkundirî gîake Kîam athigari ake a mbaara.