1Sam 13 - ÎVUKU RÎA ÛVORO MWARO

Saûlo nîwarûire na Afilisiti

¹ Saûlo agîtuîka mûthamaki aarî na ûkûrû wa mîaka mîrongo îthatû, na aathanire kûu Isiraeli îvinda rîa mîaka mîrongo îna na îîrî.

² Saûlo nîwathuurire arûme ngiri ithatû (3,000) a kuuma Isiraeli. Ke nîwekarire na arûme ngiri igîrî cia acio kûu Mikimashi na vûrûri ûrîa ûrî irîma wa Betheli. Nîwacokire akîîra mûvîcî ûrîa wetagwa Jonathani mathiî kûu Gibea marî na arûme ngiri îmwe. Gibea yarî vûrûrirî wa mûvîrîga wa Benjamini. Agîcoka akîîra acio engî menûke, wa mûndû gwake mûciî.

³ Nake Jonathani nîwaûragire mûnene wa Afilisiti arîa maarî Geba, nao Afilisiti onthe makîgua ûvoro ûcio. Nake Saûlo agîtûma anjaama na akîmeera mete Ahibirania na njîra ya kûvuva karumbeta vûrûrirî wonthe.

⁴ Nao andû a Isiraeli onthe nîmeguîte atî Saûlo nîwaûragîte mûnene wa Afilisiti, na atî Aisiraeli nîmaamenetwe nî Afilisiti. Kwoguo andû nîmeetîkîrire kûthiî na Saûlo kûu Giligali.

⁵ Nao Afilisiti nîmaacokanîrîre vamwe na makîîvarîria nîguo marûe na Aisiraeli; o maarî na ngari ngiri mîrongo îthatû cia mbaara, arûme ngiri ithathatû arîa mathiîcaga matûîte mbarathi, na athigari eengî meengîvîte ta mûthanga ûrîa wîthagîrwa ûrî rûtererî rwa îria. O nîmaaunûkirie na makîamba magema mao mwena wa îrathîro wa Bethiaveni, kûu Mikimashi.

⁶ Rîrîa Afilisiti maatonyerere andû a Isiraeli na vinya ûndû andû a Isiraeli matangîavotire gwîtethia, andû amwe a Isiraeli nîmeethithire ngurungarî, marimarî, mîanyarî ya mathiga marîa manene, na ndaarî ya iriko cia manjî;

⁷ Nao arîa engî makîringa rûnjî rwa Jorodani makîthiî mavûrûrirî ma Gadi na Gileadi. Vîndî îo Saûlo aarî Giligali, nao andû onthe arîa maarî nake nîkwa maainainaga nîndû wa guoya.

⁸ Ke nîwetererire Samueli kuo kwa îvinda rîa mîthenya mûgwanja, wata ûrîa eerîtwe nî Samueli, nwatî Samueli ndaathiî Giligali. Nao andû nîmaambîrîrie kûnyagania magîtiganîria Saûlo

⁹ Kwoguo Saûlo nîwamerire atîrî, “Ndetereni iveo cia kîgongoona gîa kûvîvua na cia kîgongoona gîa kûrete thayû.” Ke nîwarutire kîgongoona gîa kûvîvua,

¹⁰ na arîîkia kûruta kîgongoona kîu nîrîo Samueli aakinyire kuo. Saûlo nîwathiîre gûtûnga Samueli na akîmûnyita ûgeni, nwatî Samueli nîwaûririe atîrî, “Ayia! Nîkwa weka atîa?”

¹¹ Nake Saûlo nîwacokirie na akiuga atîrî, “Rîrîa nie monire atî andû nîkwa makûnyaganagia makîndiganagîria na we ndûrarî mûku vîndî îrîa wambîrîte nîûgûka, na atî Afilisiti maûnganîte kûu Mikimashi;

¹² nie nînîîciririe na nona takwa Afilisiti mangîûka kûndonyerera gûkû Giligali, na ndirarî mûthaithu Ngai-Mûnene, nîguo twîtîkîrîke Nîke! Kwoguo nie nîmonire mbagîrîrwe nî kûruta kîgongoona.”

¹³ Nake Samueli nîwerire Saûlo atîrî, “Ûcio nî ûrimû wîkire, we ndûnathîkîra rîathani rîrîa Ngai-Mûnene, Ngai waku aakwathire wathîkagîre. Kethîrwa we nîwathîkire, Ngai-Mûnene nîangîatûma we mûrî na andû a mûciî waku mûtuîke athamaki a andû a Isiraeli tene na tene.

¹⁴ Nwatî rîu ûthamaki waku nîûkaathira Ngai-Mûnene nîakeethuurîra mûndû mûrûme ûrîa ke endaga na amûtue mûthamaki wa andû ake, nîûndû we nîwaregire kûmwathîkîra.”

¹⁵ Nake Samueli nîwaumire kûu Giligali na akîthiî Gibea, vûrûrirî wa Benjamini. Nake Saûlo nîwatarire andû arîa aarî nao na maarî ta arûme magana matandatû.

¹⁶ Nake Saûlo na mûûriû wake, Jonathani marî na arûme arîa maarî nao nîmeekarire Geva, kûu vûrûrirî wa Benjamini; nao Afilisiti maatumîte magema mao kûu Mikimashi.

¹⁷ Na athigari a Afilisiti nîmaaumire magemarî mao marî ikundi ithatû mathiîte kûrûa: Gîkundi Kîam mbere gîkîthiî kîrûmîrîrîte njîra îrîa îthiîte Ovara kûu vûrûrirî wa Shuali,

¹⁸ nakîo gîkundi gîa kaîrî gîkîthiî kîrûmîrîrîte njîra îrîa îthiîte Bethi-horoni, nakîo gîkundi kîu kîngî kîroretie mûvakarî ûrîa ûnyûrûrûkîte Kîamndarî Kîam Zeboimu kîerekerete werûrî.

¹⁹ Vîndî îo gûtiarî mûturi wa indo cia cuuma wanarî ûmwe vûrûrirî wonthe wa Isiraeli, nîûndû Afilisiti nîmaageretie mûno kûgiria Ahibirania mathondeka mviû na matumû.

²⁰ (Nao Aisiraeli onthe nwanginya mangîanyûrûrûkire makathiî kûrî Afilisiti, nîguo wa mûndû wa mûndû akanoore rûviû rwa mûraû wake, macembe na mathanwa.

²¹ Nao Afilisiti arîa maarî atûûri maarîvagia gîcunjî Kîam inya gîa ciringi ya sîlûva nîûndû wa kûnoora îthanwa rîmwe na kûthondeka ithanju irîa maavûthagîra nîguo ndegwa ithiîcange, na ciringi igîrî cia sîlûva nîûndû wa kûnoora rûviû rwa mûraû kana macembe.)

²² Kwoguo mûthenya ûrîa mbaara yambîrîrie, athigari a Isiraeli arîa maarî na Saûlo na Jonathani matiarî na mviû kana matumû. Nwatî Saûlo marî ma mûûriû wake Jonathani maarî nacio.

²³ Nakîo gîkundi kîmwe Kîam athigari a Afilisiti nî Kîamthiîre kûgitîra njîrarî îrîa îvîtûkîrîrîte Mikimashi.