1Sam 12 - ÎVUKU RÎA ÛVORO MWARO

Samueli nîwarîrie andû mîario ya mûthiia

¹ Nake Samueli nîwacokire akîra andû onthe a Isiraeli atîrî, “Nie nînamwathîkîre maûndûrî monthe marîa mwambîraga mbîke. Nie nînamûthurîre mûthamaki wa kûmwathaga,

² na rîu mûrî nake amûtongoretie. Rîu nie nîrî mûkûrû na njuîrî ciakwa irî na mbuî, nao anake akwa marî vamwe namue. Nie ndûîre nîrî mûtongoria wenyu kuuma nîrî mwanake nginya ûmûnthî.

³ Rîu nie nîrî ava. Ethîrwa kûrî na ûndû mûcûku naneka, nthitangani rîu tûrî mbere ya Ngai-Mûnene na mbere ya mûthamaki ûrîa ke eetîrîrie maguta. Nanaîa ng'ombe kana mvunda ya mûndû? Nanacuuna mûndû kîndû na njîra ya maveeni, kana ngakinyîrîria mûndû? Nanetîkîra gwoca îvaki kuuma kûrî mûndû wana ûrîkû? Ethîrwa naneka ûmwe wa maûndû mama, nie nîngûrîva.”

⁴ Nao andû nîmaacokirie na makiuga atîrî, “Naarî, we ndwanatûveenia kana ûtûkinyîrîria; we ndwanoca wanarî kîndû kuuma kûrî mûndû wanarî ûmwe.”

⁵ Nake Samueli nîwacokirie na akiuga atîrî, “Ngai-Mûnene wa vamwe na mûthamaki ûrîa ke eetîrîrie maguta nî aira ûmûnthî, atî mue nî mwona ndirî na mavîtia.” Nao andû makiuga atîrî, “Îni, Ngai-Mûnene nî mûira.”

⁶ Samueli nîwathiîre na mbere kwîra andû atîrî, Ngai-Mûnene ûrîa wathuurire Musa na Aroni na nîke warutire methe menyu ma tene vûrûrirî wa Misiri nîke mûira.

⁷ Kwoguo rûngamani rîu mûmîrîrîtie nîguo nîmûthitange mbere ya Ngai-Mûnene na njîra ya kûmûririkania maûndû megiî ciîko cionthe cia vinya irîa Ngai-Mûnene eekire nîguo mue wa vamwe na methe menyu ma tene mûvonoke.

⁸ Rîrîa Jakovu na andû a mûciî wake maathiîre Misiri nao andû a Misiri makîmakînyîrîria, methe menyu ma tene nîmaathaithire Ngai-Mûnene nîguo amatethie. Nake Ngai-Mûnene nîwatûmire Musa marî na Aroni, arîa maatongoretie methe menyu ma tene makiuma Misiri, na magîûka gûtûûra vûrûrirî ûyû.

⁹ Nwatî andû nîmaariganîrwe nî Ngai-Mûnene, Ngai wao, na kwoguo Ngai-Mûnene nîwarekererie Afilisiti, mûthamaki wa Moabu, Sisera ûrîa watongoragia athigari a îtûûra rîa Hazoru nîguo marûe na methe menyu ma tene na mamavoote.

¹⁰ Namo methe menyu ma tene nîmaathaithire Ngai-Mûnene amatethie makiugaga atîrî, “Nîtwîvîtie nîûndû tue nîtwagûtiganîrie we, Ngai-Mûnene na tûgîtungatîra ngai cia mîvuanano cia Baali na Ashitarothu, nwatî rîu tûvonokie kuuma kûrî nthû cietû na tûgagûtungatagîra!

¹¹ Nake Ngai-Mûnene nîwatûmire Gideoni, Baraki, Jevitha na mûthiiarî akîndûma. Wa ûmwe wa cietû nîwamûvonokirie kuuma kûrî nthû cienyu na mûgîtûûra mûrî na thayû.

¹² Nwatî mue rîrîa mwonire mûthamaki wa Aamoni, ûrîa wîtagwa Nahashu aûkîte kûmûthûngîrîra, mue nîmwaregire Ngai-Mûnene, Ngai wenyu ûrîa warî mûthamaki wenyu na mûkîmbîîra atî, mue mûrenda mûthamaki wa kûmûtongoragia.

¹³ “Rîu mûthamaki ûrîa mwetirie na mûkîthuura Ngai-Mûnene nîwamûvere, na nîke ûyû ava.

¹⁴ Ethîrwa mue nîmûgûtîîa Ngai-Mûnene, Ngai wenyu, mûmûtungatagîre, mûmûthikagîrîrie, na mwathîkagîre maathani make, na ethîrwa mûthamaki wenyu akaarûmagîrîra Ngai wenyu-rî, maûndû makethîrwa marî maro.

¹⁵ Nwatî ethîrwa mue tî mûthikîrîria ûrîa Ngai-Mûnene akuuga na mûrege kwathîkîra maathani make, Ngai-Mûnene nîamûverithia wa vamwe na mûthamaki wenyu.

¹⁶ Kwoguo rûngamani mûkirîrîrîtie na nî mûwîyonera na metho menyu ûrîa Ngai-Mûnene agwîka ûndû mûnene.

¹⁷ Îvinda rîîrî nî rîrîa kwîthagîrwa gûtarî na mbura. Nwatî nie nîmvoya Ngai-Mûnene nîguo arete ngwa na aurithie mbura. Vîndî îrîa ûndû ûyû ûgeekîka nîrîo mue mûkaamenya, atî nîmwekire wîvia mûnene kûrî Ngai-Mûnene rîrîa mwetirie mûthamaki.”

¹⁸ Kwoguo Samueli nîwavoire kûrî Ngai-Mûnene, nake Ngai-Mûnene akîrete ngûa na akiurithia mbura mûthenya wa ûcio. Nao andû onthe nîmeetigîre Ngai-Mûnene na Samueli

¹⁹ Nao andû acio nîmeerire Samueli atîrî, “Twakûthaitha ûtûvoere kûrî Ngai-Mûnene, Ngai waku, nîguo tûtigakue. Rîu nîtwamenya atî nîtwongererete mevia marîa mengî monthe metû na wîvia wa gwîtia mûthamaki.”

²⁰ Samueli nîwerire andû acio atîrî, “Tigani kûmaka, wana ethîrwa nîmwîkîte wîvia wa mûthemba ûcio, mûtigatiganîrie Ngai-Mûnene, nwatî mûmûtungatîreni na ngoro yonthe.

²¹ Tigani gûtungatîra Ngai cia maveeni. Ngai icio itîngîmûguna kana imûvonokie, nîûndû tî cia ma.

²² Ngai-Mûnene nîamûthuurîte mûgatuîka andû ake na nîamwîrîrîte atî ke ndakaamûtiganîria.

²³ Makîria ya ûguo, Ngai-Mûnene arondethia ndikavîtie ngîrega kûvoya nîûndû wenyu, nwatî ngaamûthomithagia ûvoro wîgiî maûndû marîa maro na marîa ma ûma.

²⁴ Athîkagîrani Ngai-Mûnene na mûmûtungatagîre arî wenga na ngoro yonthe mûrî na wîvokeku. Taririkanani maûndû manene marîa ekîte nîûndû wenyu.

²⁵ Nwatî ethîrwa nîmûkûthiî na mbere gwîka maûndû ma wîvia, mue mûkaathirua wa vamwe na mûthamaki wenyu.”