1Sam 11 - ÎVUKU RÎA ÛVORO MWARO

Saûlo nîwavootire andû a Amoni

¹ Kîndû ta mweri ûmwe wathira, Mûthamaki Nahashu ûrîa warî Mûamoni nîwatongorerie athigari ake na makiunûkia mathiîte kûrûa na andû a îtûûra rîa Jabeshi kûu vûrûrirî wa Gileadi. Nao nîmaathiûrûrûkîrie îtûûra rîa Jabeshi. Nao andû onthe a Jabeshi makîra Nahashu atîrî, “Tiga tûthondeke kîrîkanîro nawe, na nîtûgwîtîkîra ûtuîka mûtongoria wetû.”

² Nake Nahashu, ûcio Mûamoni akîmeera atîrî, Ûndû ûmwe tu nîguo ûngîtûma mbîtîkîre tûthondeke kîrîkanîro namue. Naguo nî atî, nîmûkûûre wa mûndû ritho rîake rîa ûrîo, naguo ûndû ûcio ûtuîke wa gûconorithia andû onthe a Isiraeli.

³ Nao athuuri a Jabeshi nîmeerire Nahashu atîrî, “Tûve mîthenya mûgwanja nîguo tûtûme anjaama vûrûrirî wonthe wa Isiraeli. Ethîrwa gûtirî mûndû ûngîtûtethia, tue nîtûgaaûka na twîvecane kûrî we.”

⁴ Na rîrîa anjaama acio maakinyire kûu Gibea, kûrîa Saûlo aatûûraga na makîva andû ûvoro ûcio, andû onthe nîkwa maambîrîrie kûrîra nîûndû wa kîeva.

⁵ Vîndî îo Saûlo aaumîte mûgûndarî arûmîrîrîte ndegwa ciake; nake nîwaûririe atîrî, “Nîndûî kîrî na thîna, na nîndûî kîratûma andû onthe marîre?” Nao nîmaamûvere ûvoro ûrîa anjaama arîa maaumîte Jabeshi maamerîte.

⁶ Rîrîa Saûlo eguire ûguo, Roho wa Ngai nîwaûkire na ûkîmûnyita na vinya na akîrakara mûno.

⁷ Ke nîwocire ndegwa ciake, agîitinangia tûcunjî, na agîtûma anjaama makuue tûcunjî tûu matûvire vûrûrirî wonthe wa Isiraeli makiugaga atîrî, “Mûndû wa wonthe ûrîa ûtakûrûmîrîra Saûlo na Samueli makîthiî mbaararî, ûguo nîguo ndegwa ciake igeekwa!” Nao andû nîmeguire guoya nîûndû wa ûrîa Ngai-Mûnene angîka na makîgomana vamwe marî kîndû kîmwe.

⁸ Rîrîa Saûlo aamatarire marî Bezeki, kwarî na andû ngiri magana mathatû a kuuma Isiraeli na andû ngiri mîrongo îthatû a kuuma Juda.

⁹ Nao makîra anjaama acio maaûkîte kûrî o maumîte Jabeshi atîrî, “îra andû enyu atî nîmakaavonokua rûyû mbere ya thaa thita cia mûthenya ikinye.” Nao andû a Jabeshi makinyîrwa nî ndûmîrîri îo nî maakenire mûno

¹⁰ na kwoguo nîmeerire Nahashi atîrî, “Rûciû, tue nîtûkevecana kûrî mue na nwa mûtwîke wa ûrîa mûkoona kwagîrîrîte.”

¹¹ Ûtukû ûcio Saûlo nîwagaanirie andû ake ikundi ithatû na makîthitûkîra andû a Amoni kîraûko tene kûu magemarî mao. Nîmaaûragire andû a Amoni nginya thaa thita cia mûthenya. Nao arîa maatigarire nîwanyaganirie, wa mûndû akîthiî njîra yake wenga.

¹² Nao andû a Isiraeli nîmaaûririe Samueli atîrî, “Andû arîa maaugire atî Saûlo ndagîrîrwe nî gûtuîka mûthamaki wetû marî kû? Tûretereni o tûmaûrage!”

¹³ Nwatî Saûlo nîwamerire atîrî, “Ûmûnthî gûtirî mûndû ûkûûragwa, nîûndû ûmûnthî nîguo mûthenya ûrîa Ngai-Mûnene avonokia andû a Isiraeli.”

¹⁴ Nake Samueli akîîra andû atîrî, “Ûkani tûthiî Giligali tûkathuure Saûlo wa rîngî arî mûthamaki wetû.”

¹⁵ Kwoguo andû onthe nîmaathiîre Giligali vandû varîa vatheru na makîthuurîra Saûlo vo arî mûthamaki wao. O nîmaarutîre Kîgongoona gîa kûrete thayû vo, na Saûlo marî vamwe na andû onthe a Isiraeli nîmaakenerere ûndû ûcio.