1Sam 10 - ÎVUKU RÎA ÛVORO MWARO

¹ Nake Samueli nîwocire kanyûngû karî na maguta na agîtîrîria Saûlo maguta mau kîongorî gîake, akîmûmumunya, na akiuga atîrî, “Ngai-Mûnene nîagwîtîrîrîtie maguta nîguo ûtuîke mûthamaki wa andû ake a Isiraeli. We nîûgatongoria andû ake na ûmagitîre kuuma kûrî nthû ciao cionthe. Naguo ûndû ûrîa ûgakwonia nama atî Ngai-Mûnene nîakûthuurîte nîguo ûtuîke mûthamaki wa andû ake nî atî:

² Ûmûnthî twatigana, nîûgûtûngana na arûme aîrî vakuvî na mbîrîra ya Rakeli kûu Zeliza vûrûrirî wa Benjamini. O nîmagûkwîra atî, mvunda irîa mwathiîre gûcaria rîu nîmoneku, na rîu îthe wenyu nîmûtigu kûmaka nîûndû wacio, nwatî rîu aratangîka nîûndû waku. Ke arekara akîûragia atîrî, ‘Nie nîmbîka atîa nîûndû wa mûriû wakwa.’

³ Nawe wathiîcathiîca na mbere kuuma vau, nîûkwona mûtî mûtheru wa Taboru. Vau nîvo ûgaatûngana na arûme athatû maunûkîtie mathiîte Betheli kûrutîra Ngai Kîgongoona. Ûmwe wao akethîrwa athiîte atongoreretie twori tûthatû, nake wîngî akethîrwa akuuîte mîgate îthatû, nake mûndû mûrûme wa kathatû akethîrwa akuuîte mbooro îcûrîte ndivei taka.

⁴ Nao magagûkethia na makûve mîgate îrî, nawe ûmîoce.

⁵ Vuva wa ûguo, we ûthiî na mbere nginya kîrîmarî Kîam Ngai kîrîa kîrî Gibea. Kûu nîkuo Afilisiti matumîte magema mao. Wakinya vau kîvingorî gîa îtûûra ûgatûngana na gîkundi Kîam arathi manyûrûrûkîte makîvûraga inanda, ndarama, mîtûrirû, na ngita. Nao makethîrwa maumîte metharî ya Kîgongoona kûu Kîrîmarî makinaga maugîrîrîtie.

⁶ Nake Roho wa Ngai-Mûnene agaûka îgûrû rîaku na vinya wa rîmwe na ûgarûrûke ûtuîke mûndû wîngî. Nawe ûkanyitanîria nao na wambîrîrie kwina ugîrîrîtie.

⁷ Vîndî îrîa maûndû mama magekîka, we ûgeka wa ûrîa ûkona kwagîrîrîte nîûndû Ngai arî vamwe nawe.

⁸ Na ûcoke ûnyûrûrûke ûthiî Giligali na ûkinye kuo mbere yakwa. Weterere ûrî kuo gwa îvinda rîa mîthenya mûgwanja nginya rîrîa ngaaûka gûkwîra ûrîa wagîrîrwe nî gwîka. Nie ngaakwîthîra kûu na ndute magongoona ma kûvîvua na ma thayû.”

⁹ Na rîrîa Saûlo aavûgûkire nîguo matigane na Samueli-rî, Ngai nîwagarûrire Saûlo. Namo maûndû monthe marîa Saûlo eerîtwe nî Samueli makîvinga mûthenya wa ûcio.

¹⁰ Rîrîa Saûlo marî na ndungata yake maakinyire Gibea, nîwatûngirwe nî gîkundi Kîam arathi. Naguo Roho wa Ngai ûgîûka îgûrû rîake na vinya wa rîmwe na na ûkîmûtongoria. Nake nîwambîrîrie kwina augîrîrîtie marî na arathi acio.

¹¹ Nao andû onthe arîa maamwicî mbere mona agîka ûguo nîmaambîrîrie kûrania wa mûndû na ûrîa wîngî atîrî, “Nîkwa mûriû wa Kishu ekara atîa? Nîkwa Saûlo wanake arî ûmwe wa arathi?”

¹² Nake mûndû mûrûme ûmwe watûûraga kûu nîwaûririe atîrî, “Mue mûreciria methe ma arathi aya engî nî arîkû?” Ûguo nîguo nthimo yambîrîrie îrîa yugaga atîrî, “Nîkwa Saûlo wana ke arî mûtuîku mûrathi?”

¹³ Rîrîa Saûlo aarîkirie kwina, nîwathiîre kîrîmarî îgûrû varîa andû maagoocagîra.

¹⁴ Nake mama wa Saûlo nîwaûririe Saûlo marî na ndungata yake atîrî, “Nîkwa mûrarî kû?” Nake Saûlo agîcokia na akiuga atîrî, “Tue twathiîre gûcaria mvunda; na rîrîa ciaturire, tue nîtwathiîre kwona Samueli!”

¹⁵ Nake mama wa Saûlo akîmûria rîngî atîrî, “Ke aamwîrire atîa?”

¹⁶ Nake Saûlo nîwacokirie na akîîra mamawe atîrî, “Samueli nîwatwîrire cararûkû atî, mvunda ciarî moneku.” Nwatî Saûlo ndeera mamawe ûrîa Samueli aarîtie ûvoro wîgiî Saûlo gûtuîka mûthamaki.

Saûlo nîwatuirwe mûthamaki

¹⁷ Nake Samueli nîwetire andû na akîmeera mathiî matûngane kîgongoonarî Kîam Ngai-Mûnene kûu Mizipa,

¹⁸ na akîmeera Ngai-Mûnene, Ngai wa Isiraeli arauga atîrî, “Nî nie naamûrutire Misiri na ngîmûvonokia kuuma kûrî andû onthe arîa maamûvinyagîrîria.

¹⁹ Nî nie Ngai wenyu, ûrîa ûmûvonokagia kuuma mathînarî na mîtangîkorî yenyu yonthe, nwatî mue nîmûndiganîrîtie na mûkambîra nîmûnengere mûthamaki. Ûguo nî waro mûno. Kwoguo rûngamani mbere ya Ngai-Mûnene kûringana na ûrîa mîvîrîga yenyu îkariî, na wata ûrîa mbarî cienyu ciîkariî?”

²⁰ Nake Samueli akiugaga mîvîrîga yonthe îthiî vakuvî na Ngai-Mûnene, nake Ngai-Mûnene akîthuura mûvîrîga wa Benjamini.

²¹ Samueli nîwaugire, atî andû a nyomba cia mûvîrîga wa Benjamini mathiî vakuvî na Ngai-Mûnene, na andû a mûciî wa Matiri makîthuurwa. Mûthiiarî, ke nîwaugire arûme a mûciî wa Matiri mathiî mbere ya Ngai-Mûnene na Ngai-Mûnene akîthuura Saûlo, mûvîcî wa Kishu. Nao nîmaamûcaririe, nwatî matiamwona.

²² Kwoguo nîmaaûririe Ngai-Mûnene atîrî, “Nî kûrî na mûndû wîngî ûtarî ava?” Nake Ngai-Mûnene nîwacokirie na akiuga atîrî, “Taroria, Saûlo ethithîte kûrîa mîrigo igagwa.”

²³ Kwoguo nîmaavinyûrire na makîgîra Saûlo; na rîrîa Saûlo aarûngamire gatagatîrî ka andû, akîoneka arî mûraca gûkîra andû acio engî onthe kuuma cianderî ciake gûcoka mwena wa îgûrû.

²⁴ Nake Samueli nîwerire andû acio engî onthe atîrî, “Mûndû mûrûme ûyû mûrona ava nîke Ngai-Mûnene athuurîte! Gûtirî mûndû wîngî gatagatîrî getû wîkariî take.” Nao andû onthe makiugîrîria na makiuga atîrî, “Mûthamaki wetû ûrotûûratûûra!”

²⁵ Vîndî îo Samueli nîwataarîrie andû ûvoro wîgiî mawîra ma mûthamaki na agîcoka akîandîka mawîra mau îvukuurî, na akîriiga vandû varîa vatheru. Ke nîwacokire akîîra andû onthe menûke mîciî kwao.

²⁶ Saûlo wanake nîwacokire gwake mûciî kûu Gibea. Nao arûme amwe maarî na vinya arîa maavutîtue ngoro ciao nî Ngai, nîmaathiîre vamwe nake.

²⁷ Nwatî nîkwarî na andû amwe maarî a mana maaûririe atîrî, “Nî ûndû ûrîkû mwaro mûndû ûyû angîtwîkîra?” Nao makîmûnyûrûria na makîrega kûmûva kîveo wanarî kîmwe. Nwatî Saûlo agîkira kivi.