1Sam 1 - ÎVUKU RÎA ÛVORO MWARO

Elikana na andû a mûciî wake marî Shilo

¹ Kwarî mûthuuri wetagwa Elikana ûrîa warî wa mûvîrîga wa Efiraimu. Elikana aarî mûvîcî wa Jerohamu, Jerohamu aarî mûvîcî wa Elihu, Elihu aarî mûvîcî wa Tohu, Tohu aarî mûvîcî wa Zufu, Zufu aarî wa mûvîrîga wa Efiraimu. Elikana aatûûraga îtûûrarî rîa Rama vûrûri ûrîa wîthagîrwa ûrî irîma nyîngî wa Efiraimu.

² Elikana aarî na aka aîrî; ûmwe wao eetagwa Hana, nake ûcio wîngî eetagwa Penina. Penina aarî na ciana, nwatî Hana ndaarî na ciana.

³ Elikana nîwamenyerete kûthiî aumîte îtûûrarî rîao wa mwaka wa mwaka akathiî Shilo kûgooca, wa vamwe na kûrutîra Ngai-Mûnene mwene vinya wonthe kîgongoona. Kûu Shilo nîkuo anake aîrî a Eli, Hofini na Finehasi maarî athînjîri-Ngai a Ngai-Mûnene.

⁴ Mûthenya ûrîa Elikana aarutaga kîgongoona, nîwavecaga mûka, Penina icunjî cia nyama. Nîwavecaga ciana cia Penina wanacio.

⁵ Wana ethîrwa Elikana nîwendeete Hana, ke aveecaga Hana gîcunjî kîmwe tu, nîûndû Ngai-Mûnene ndaamûveete ciana.

⁶ Nake Mwîruwe, Penina nîwarakaragia na akathirîkia Hana ngororî, nîûndû Ngai-Mûnene ndaaveete Hana ciana.

⁷ Ûguo nîguo gwekîkaga wa mwaka wa mwaka; na vîndî îrîa yonthe maathiîcaga nyombarî ya Ngai-Mûnene, Penina nîwarakaragia Hana mûno. Na nîûndû wa ûguo Hana nîwarîraga nginya akarega kûrîa irio.

⁸ Nake mûthuuriwe, Elikana nîwamûririe atîrî, “Hana, ûrarîra nîkî? Na ûrarega kûrîa irio nîkî? Na ûregua kîeva nîkî? Na kinthî nie ndirî vata gûkîra ivîcî îkûmi?”

Hana na Eli

⁹ Vîndî îmwe, marîkia kûrîa irio wana kûnyua marî nyombarî ya Ngai-Mûnene kûu Shilo, Hana nîwarûngamire. Vîndî îo Eli mûthînjîri-Ngai eekarîte nthî vakuvî na mûrango wa hekarû ya Ngai-Mûnene.

¹⁰ Hana nîwegucaga ûrûrû mwîngî mûno ngororî yake, na nîwarîrire mûno na akîvoya kûrî Ngai-Mûnene.

¹¹ Nake Hana nîwevîtire na mwîvîtwa na akiuga atîrî: “Ngai-Mûnene mwene vinya wonthe, ndoria nie, ndungata yaku! Roria thîna yakwa na ûndirikane! Ndûkariganîrwe nî nie! Ethîrwa ûkamva kavîcî, nie nînîvîta atî nîngaakûva ko mîthenya yonthe ya ûtûûro wako na atî gûtirî vîndî njuîrî cia kîongo gîake ikeenjwa.”

¹² Hana nîwathiîre na mbere kûvoya Ngai-Mûnene îvinda îraca, nake Eli nîwaroretie mîromo ya Hana.

¹³ Hana aavoyaga na ngoro yake akirîte. Mîromo yake tu nîyo yoyaga, nwatî mûgambo wake ndweguîkaga. Kwoguo Eli eciriirie nîkwa Hana aarî mûrîu wa ndivei.

¹⁴ Nake Eli nîwaûririe Hana atîrî, “Nîwîkara ûrî mûrîu nginya rî? Thengutia ûrîu waku ava.”

¹⁵ Nwatî Hana nîwacokirie na akiuga atîrî, “Naarî mwathi wakwa ndirî mûrîu. Nie nînîrathînîka mûno ngororî yakwa, na mbîthîrîtwe ngîvoyaga Ngai-Mûnene nîûndû wa mathîna marîa nîrî namo.

¹⁶ Tiga kûmona nie ndungata yaku ta mûndûmûka ûtarî na vata.”

¹⁷ Nake Eli nîwacokirie na akiuga atîrî, “Thiî na thayû, nake Ngai wa Isiraeli arokûva kîrîa wamûvoya.”

¹⁸ Nake Hana nîwacokirie na akiuga atîrî, “Nie nîngûkûria ûmbîtîkîre nie ndungata yaku ya mûndûmûka.” Kwoguo Hana nîwethiîrîre, akîrîa irio na kîeva gîake gîkîthira.

Gûciarwa na kûvecanwa gwa Samueli

¹⁹ Elikana na andû a mûciî wake nîmaaramûkire kîraûko tene mûthenya ûcio wîngî. Na vuva wa kûgooca Ngai-Mûnene, nîmaacokire kwao mûciî Rama. Nake Elikana nîwamenyanire kîîmwîrî na mûka Hana, na Ngai-Mûnene akîgua mavoya ma Hana.

²⁰ Kwoguo vîndî îrîa kavinda kagîrîru gaakinyire, Hana nîwagîre nda na agîciara kavîcî. Ke aagatuîrîre rîîtwa Samueli na akiuga atîrî, “Nie naavoire Ngai-Mûnene amve ko.”

²¹ Nako kavinda nîgaakinyire wa rîngî rîrîa Elikana na andû a mûciî wake maathiîre Shilo. Maathiîre kuo nîguo makarutîre Ngai-Mûnene kîgongoona kîrîa Kîamrutagwa wa mwaka wa mwaka wa vamwe na kûruta kîgongoona Kîam mwanya kîrîa eeranîrîte.

²² Nwatî vîndî îno Hana ndaathiî. Ke nîwerire mûthuuri wake atîrî, “Nie ndikunûkia nginya vîndî îrîa mwana agaatiga kwonga. Na rîrîa agaatiga kwonga, nîrîo ngaamûvira nyombarî ya Ngai-Mûnene na kûu nîkuo agaatûûra ûtûûro wake wonthe.”

²³ Nake Elikana, mûthuuri wake nîwamwîrire atîrî, “Îka wata ûrîa ûrona kwagîrîrîte; îkara mûciî nginya vîndî îrîa ûkaamûtigithia kwonga. Nake Ngai-Mûnene arotuma kîîranîro gîake kîvinge.” Nake Hana nîwekarire mûciî akîreraga mwana nginya rîrîa aatigire kwonga.

²⁴ Na vîndî îrîa Hana aatigithirie mwana kwonga, nîwocire Samueli, akiunûkia nake na akîmûvira nyombarî ya Ngai-Mûnene kûu Shilo. Hana akîvira Samueli nîwathiîre na ndegwa yarî na ûkûrû wa mîaka îthatû, ndeve îmwe ya mûtu, na mbooro îcûrîte ndivei.

²⁵ Nîmaacokire makîvira mwana kûrî Eli vuva wa kûthînja ndegwa.

²⁶ Nake Hana nîwaugire atîrî, “Ta mbîtîkîria mwathi wakwa! Wata ûrîa mwathi wakwa ûgûtûûra mwoyo, nie nînie mûndûmûka ûrîa warûngamîte mbere yaku ngîvoya Ngai-Mûnene.

²⁷ Nie naavoyaga mvewe mwana ûyû; nake Ngai-Mûnene nîamvete kîrîa nie naamûvoire.

²⁸ Kwoguo nie nînavecana mwana ûyû kûrî Ngai-Mûnene vîndî îrîa yonthe agûtûûra mwoyo akethagîrwa arî wa Ngai-Mûnene.” Nao makîgooca Ngai-Mûnene marî kûu.