1Pet 4 - ÎVUKU RÎA ÛVORO MWARO

Mîtûûrîre mîgarûrûku

¹ Nîûndû Kristû nîwathînîkire kîîmwîrî, wa namue nwanginya mûgîcage na meciria ta marîa Kristû aarî namo, nîûndû mûndû ûrîa ûthînîkîte kîîmwîrî nîatiganîte na mevia.

² Kuuma rîu mûtûûrîre wenyu gûkû nthî nîwîthagîrwe ûtongoretue nî wendi wa Ngai nwatî tî merirîria ma ûmûndû.

³ Mavinda mavîtûku mwîthîrîtwe mûgîka maûndû marîa andû arîa matetîkîtie Ngai meriragîria gwîka. Mûtûûrîte mûgîkaga maûndû ma ûra nthoni, mûrî na merirîria macûku, ûrîu, marugarî marîa matagîrîrîte ma waganu na mûgîkaga maûndû marî na nthoni ma kûgooca mîvuanano.

⁴ Andû arîa matetîkîtie Ngai nîmamakîte nîûndû mûtiranyitanîra nao mûtûûrîrerî ûcio wa waganu na wa wanangi. Kwoguo nîmaramûcambia.

⁵ Nwatî nwa magaataarîria ûvoro ûyû kûrî Ngai ûrîa wîvarîrîtie gûcirithia arîa marî mwoyo na arîa akuû.

⁶ Kîu nîkîo gîatûmire Ûvoro Mwaro ûvunjue kûrî arîa akuû. Wana ethîrwa nîmaatuîrîrwe marî mwoyo ta ûrîa atucagîra andû arîa engî, Ûvoro Mwaro nîwavunjirue kûrî o nîguo mîtûûrîrerî yao ya kîîroho mekarage ta Ngai.

Aramati aro a iveo cia Ngai

⁷ Îthirîro rîa indo cionthe rîrî vakuvî. Îkaragani mwîîguîte na mwîvarîrîtie, nîguo mûvotage kûvoya.

⁸ Îgûrû rîa maûndû monthe endaga mûndû ûrîa wîngî na ngoro yaku yonthe, nîûndû wendani nîûkunîkagîra mevia mengî.

⁹ Tuganagani kwenyu mîciî mûtakûnuguna.

¹⁰ Wa mûndû nîavetwe kîveo ngûrani nî Ngai nîguo ta mûramati mwaro wa iveo cia Ngai agîtûmagîre gûtungata andû arîa engî. Vûthagîrani waro iveo cia mwanya irîa ciumanîte na wega wa Ngai.

¹¹ Mûndû ûrîa ûvunjagia nwanginya avunjagie ndûmîrîri ya Ngai, na ûrîa ûtungataga nwanginya atungatage na vinya îrîa aveetwe nî Ngai, nîguo Ngai akumague na njîra ya Jesû Kristû maûndûrî monthe marîa mûgeekaga nîûndû riiri wonthe na vinya nî ciake tene na tene. Ameni.

Kûthînua nîûndû ûrî mûkristiano

¹² Arata akwa ende, tigani kûmaka nîûndû wa ûrûrû wa mathîna marîa mûracemania namo mûkîgerua. Tigani gwîciria atî maûndû mau marekîka kûrî mue nî mageni.

¹³ Nwatî kenani nîûndû mûrathînua wata ûrîa Kristû aathînirue, nîguo mûkeethîrwa mwîcûrîtwe nî gîkeno rîrîa riiri wake ûkaaguûrua.

¹⁴ Kûrathimwa nî mue ethîrwa mûrumagwa nîûndû nîmûrûmagîrîra Kristû. Ûndû ûyû wonanagia atî Roho ûrîa ûrî riiri na nîke Roho wa Ngai, ekaraga namue.

¹⁵ Gatagatîrî kenyu gûtikanonekane mûndû wana ûmwe ûrathînua nîûndû atî ke nî mûûragani, mwîi kana muni watho wana kana atî nîûndû ke nî mûtonyereri wa maûndû ma andû arîa engî.

¹⁶ Nwatî ethîrwa mûrathînua nîûndû nîmûrûmagîrîra Kristû, mûtikegucage mûgîconoka nîûndû wa ûguo. Cokagiani ngatho kûrî Ngai nîûndû mûrî akristiano.

¹⁷ Îvinda nîrîkinyu rîa kwambîrîria îtuîro na andû a Ngai nîo makwambîrîria gûtuîrwa. Ethîrwa nîtue tûkwambîrîria gûtuîrwa rî, gûkaarîkîrîria atîa na arîa matetîkîtie Ûvoro Mwaro ûrîa umîte kûrî Ngai?

¹⁸ Wa ta ûrîa mandîko matheru maugîte: “Ethîrwa kûrî na vinya mûndû mûthingu kûvonoka rî; gûgaatuîkîka atîa kûrî arîa matarî na ûngai na mevagia?”

¹⁹ Kwoguo andû arîa mathînagua kûringana na wendi wa Ngai, nîmagîrîrwe nîkwîthîrwa meigîte viû njararî cia Mûmbi wao na njîra ya gwîka maûndû maro. Nîûndû vîndî cionthe ethagîrwa arî mwîvokeku.