1Pet 3 - ÎVUKU RÎA ÛVORO MWARO

Aka na Athuuri

¹ Na njîra wata îo, wa namue aka athîkagîrani athuuri enyu, nîguo kûngîthîrwa kûrî na athuuri amwe matetîkîtie kiugo Kîam Ngai, magetîkagia mona mîtugo yenyu. Mûtikethagîrwa mûrî na vata wa kûmeera wa naarî atîa,

² nîûndû makaagucagîrîrua nî mîtugo yenyu mîtheru na mîtîîku.

³ Kwîgemia kwenyu na njîra ta ya mîvîndîre ya njuîrî, gwîkîra mathaga ma thaavu na gwîkîra nguo cia goro tîkuo kûmûtucaga athaka.

⁴ Vandû va ûguo tigani kîrîa kîrî ngororî cienyu kîmûtucage athaka. Ûthaka ûcio ûtathiraga umanaga na ngoro mvoreri na îkiragîrîria na ûrî vata mûnene mûno methorî ma Ngai.

⁵ Nîûndû aka arîa atheru a tene na maaigaga mwîrîgîrîro wao kûrî Ngai meetucaga athaka na njîra ya kwathîkîra athuuri ao.

⁶ Sara eekariî wata ûguo, nîwathîkagîra Iburahimu na nîwamwîtaga mwathi wake. Mue rîu mûrî ciana ciake ethîrwa vîndî cionthe mûgeekaga waro mûtagwîtigîra ûndû wana ûrîkû.

⁷ Na njîra wata îo, wa namue athuuri îkaranagiani na aka enyu mûkîroragia wagîrîru wao nîûndû matirî vinya ta arûme. Monagieni gîtîîo nîûndû wa nao nîmakaagaîrwa kîveo Kîam mwoyo nî Ngai wa vamwe namue. Îkagani ûguo nîguo vatikagîe na kîndû kîngîvîngîca mavoya menyu.

Kûthînua nîûndû wa gwîka ûrîa kwagîrîrîte

⁸ Mûthiiarî nîramwîra atî, nwanginya muonthe mûnyitanagîre meciriarî menyu na mûcaanagîre. Endanagani ta ciana cia ng'ina ûmwe na mwîgucanagîre ntha na mwînyivanagîrie.

⁹ Mwekwa naaî tigagani kwîrîvîrîria na naaî. Mwarumwa tigagani kwîrîvîrîria na irumi. Vandû va ûguo rathimanagani, nîûndû kîrathimo nîkîo Ngai aamwîrîîre rîrîa aamwîtire.

¹⁰ Mandîko Matheru maugîte atîrî: “Mûndû wa wonthe wendete mwoyo wake, na wendaga gûtûûra akenete, nwanginya atige kwaragia maûndû macûku, na atige kwaragia maveeni.

¹¹ Nwanginya atige gwîkaga naaî na ekage maûndû maro; nwanginya acaragie thayû na ngoro yake yonthe.

¹² Nîûndû Mwathani nîaroragia andû arîa athingu, na akathikîrîria mavoya mao; nwatî nîareganaga na eki naaî.”

¹³ Nû ûngîmwîka naaî ethîrwa mûrî na kîîo gîa gwîka maûndû maro?

¹⁴ Nwatî wana mûngîthînîka nîûndû wa gwîka ûrîa kwagîrîrîte, mûrî arathime. Mûtigetigîre mûndû kana mûtangîke.

¹⁵ Nwatî ngororî cienyu vecagani Kristû gîtîîo kîrîa kîmwagîrîrîte ta Mwathani. Vîndî cionthe îthagîrwani mwîvarîrîtie gûcokeria mûndû wa wonthe ûrîa ûngîmûria mûmûtaarîrie ûvoro wîgiî mwîrîgîrîro ûrîa mûrî naguo.

¹⁶ Nwatî îkagani ûguo mûrî na ûvoreri na gîtîîo. Îthagîrwani mûrî na thamiri ntheru, nîguo andû arîa maragia ûndû mûcûku ûmwîgiî nîûndû nîmûrûmagîrîra Kristû, maconokage.

¹⁷ Nîûndû nî kava kûthînîka nîûndû wa gwîka waro ethîrwa ûcio nîguo wendi wa Ngai, gûkîra kûthînîka nîûndû wa gwîka naaî.

¹⁸ Kristû aakwire nîûndû wa mevia ma andû onthe rita rîmwe. Aarî mûthingu na nîwakwire îthenya rîa evia, nîguo atûvire kûrî Ngai. Nîwaûragirwe kîîmwîrî, nwatî kîîroho nîwagîre na mwoyo,

¹⁹ na arî na mwoyo ûcio wake wa kîîroho, nîwathiîre kûvunjîria maaroho marîa moovetwe.

²⁰ Maaroho mau nî ma andû arîa maaregire kwathîkîra Ngai vîndî îrîa eetererete akirîrîrîtie Nuhu atume thavina. Nî andû anana tu arîa maarî thavinarî maavonokirue na njîra ya manjî.

²¹ Na manjî mau maringithanagua na ûvatithio ûrîa rîu ûmûvonokagia. Ûvatithio tî wa kûthambia mûndû gîko Kîam mwîrî, nwatî nî kîîranîro kûrî Ngai kiumîte thamirirî mbaro. Ûvatithio ûcio ûmûvonokagia na njîra ya kûriûka gwa Jesû Kristû,

²² ûrîa waunûkirie îgûrû na rîu ekaraga mwena wa ûrîo wa Ngai. Kûu Jesû nîwathaga araika onthe, wa vamwe na maroho marîa mathanaga na marî vinya.