1Pet 2 - ÎVUKU RÎA ÛVORO MWARO

Îthiga rîrî mwoyo na rûrîrî rûtheru

¹ Îîyaûreni maûndû monthe macûku, maveeni monthe, ûvinga wonthe, rwetho ruonthe na ciugo cionthe cia gûcambania.

² Tuîkagani ta tûkenge. Vîndî cionthe nyondagîrani îriia rîrîa rîtheru rîa Kîîroho nîguo mwarînyua mûkûre na mûvonokue.

³ Nîûndû mandîko matheru maugîte atîrî, “Nîmûtuîrîtie na mûkeyonera atî Mwathani nî Mûtugi.”

⁴ Ûkani kûrî Mwathani na nîke Îthiga rîrî mwoyo rîrîa rîaregirwe nî andû nwatî nîrîathuurirwe nî Ngai na nî rîa goro.

⁵ Ûkani kûrî Kristû ta mathiga marî mwoyo mûtûmîrwe gûtuma hekarû ya kîîroho na matuîke ta athînjîri-Ngai atheru a kûrutaga magongoona ma kîîroho kûrî Ngai. Nake agetîkagîra magongoona mau na njîra ya Jesû Kristû.

⁶ Nîûndû mandîkorî matheru Ngai augîte atîrî, “Nîngwiga îthiga rîrîa nthuurîte Zayuni, îthiga rîu nî rîa goro. Mûndû wa wonthe ûmwîtîkagia ndagaaconorithua.”

⁷ Kûrî arîa mwîtîkîtie îthiga rîîrî nî rîa goro, nwatî kûrî arîa mûtetîkîtie: “Îthiga rîrîa rîaregirwe nî atumi a nyomba, nîrîo rîtuîkîte rîa vata mûno, gûkîra marîa mengî monthe.”

⁸ Mandîko matheru maugîte atî: “Îthiga rîîrî rîtûmaga andû mavîngwe, rûciara rûrîa rûtûmaga magwe.” Mavîngagwa nîûndû matiathîkagîra ciugo cia Ngai. Ûcio nîguo warî wendi wa Ngai kûrî o.

⁹ Nwatî mue mûrî rûrîrî rûthuure, athînjîri-Ngai a mûciî wa mûthamaki, rûrîrî rûtheru na rwa andû a Ngai. Mwathuurirwe mwanagîrîre ûvoro wîgiî ciîko cia magegania cia Ngai. Ke nîke wamwîtire muume ndumarî na mûkinye ûtherirî wake wa magegania.

¹⁰ Vîndî îmwe mûtiarî andû a Ngai, nwatî rîu mûrî andû ake. Vîndî îmwe mûtiarî akinyîre nî ntha cia Ngai, nwatî rîu mûrî akinyîre nîcio.

Ngombo cia Ngai

¹¹ Arata akwa ende, mûtûûraga gûkû nthî ta ageni na athiîi! Nîramûthaitha mûtigane na merirîria marîa macûku ma mwîrî, nîûndû vîndî cionthe methagîrwa makîrûa na roho.

¹² Mîtugo yenyu yagîrîrwe nî kwîthagîrwa îrî mîaro gatagatî ka andû arîa matetîkîtie, nîguo mangiuga mûrî evia magaacokaga kwona ciîko cienyu mbaro. Nao nîmagaakumia Ngai mûthenya ûrîa agaaûka.

¹³ Nîûndû wa Mwathani, athîkagîrani andû onthe arîa marî wathanirî. Athîkagîrani wathani wa mûthamaki ûrîa mûnene wa Roma.

¹⁴ Athîkagîrani anene arîa mathuurîtwe nî mûthamaki ûcio, nîguo maverithagie andû arîa mekaga naaî na makumagie arîa mekaga waro.

¹⁵ Nîûndû wendi wa Ngai nî atî, na njîra ya maûndû maro marîa mwîkaga mûkaavotaga gûtûma andû arîa aritu matigane na mîario yao ya ûrimû.

¹⁶ Tûûragani ta andû meyathîte, na mûtigetîkagîre wîyathi ûcio wenyu ûtuîke wa gûkunîkagîra naaî. Nwatî tûûragani ta ngombo cia Ngai.

¹⁷ Tîîagani andû onthe, endagani aarî na ariû a îthe wetû, îîtigagîreni Ngai na mûvecage mûthamaki wa Roma gîtîîo.

Kîonereria kuumana na kûthînua gwa Kristû

¹⁸ Mue ndungata nwanginya mwathîkagîre anene enyu na mûmavecage gîtîîo kîrîa kîmagîrîrîte. Mûtikathîkagîre wa arîa tu marî ntha na avoreri, nwatî athîkagîrani wana arîa mamûvinyagîrîria.

¹⁹ Ngai nîarathimaga mûndû ûrîa ûmagîrîria ûrûrû wa mathîna marîa matamwagîrîrîte nîûndû ke nî amenyete wendi wa Ngai.

²⁰ Nî umithio ûrîkû mûndû angîgîa naguo rîrîa aûmîrîria ndivo ya kûmûverithia nîûndû wa gwîka naaî? Nwatî mûndû ûrîa ûmagîrîria rîrîa arathînua nîûndû wa gwîka waro, nîarathimagwa nî Ngai.

²¹ Ûndû ûcio nîguo mwetîrwe. Kristû aathînirue nîûndû wenyu na akîmûtigîra kîonereria, nîguo wa namue mûrûmîrîre mîthiîre yake.

²² Ke gûtirî wîvia eekire na ndaanaria maveeni.

²³ Rîrîa aarumirwe, ndeerîvîrîria na kûrumana. Rîrîa aathînirue, gûtirî mûndû eevîtîre, nwatî aaigire mwîrîgîrîro wake kûrî Ngai ûrîa ûtucanagîra cira na kîvooto.

²⁴ Kristû ke mwene nîwakuuire mevia metû mûtharavarî na njîra ya mwîrî wake. Eekire ûguo nîguo maûndûrî ma wîvia twîkare ta tûrî akuû na tûtûûrage mwoyo maûndûrî ma ûthingu. Mue rîu nîmûvonetue na njîra ya ironda ciake.

²⁵ Mwekariî ta ng'ondu ivîtîtie njîra, nwatî rîu nîmûcokererete Mûrîthi na Mûmenyereri wa mîoyo yenyu.