1Pet 1 - ÎVUKU RÎA ÛVORO MWARO

¹ Nie Petero mûtûmwa wa Jesû Kristû nîrandîkîra arîa mathuurîtwe nî Ngai, arîa matûûraga mathamîrîte na makanyagarûka mavûrûrirî ma Ponto, Galatia, Kapadokia, Asia na Bithînia.

² Mue mwathuurirwe kûringana na wendi wa Ngai Vava, na mûkîtherua nî Roho nîguo mwathîkagîre Jesû Kristû na mûtherague nî nthakame yake. Mûrotuîka a kwîngîvîrwa nî wega na thayû.

Kîîrîgîrîro kîa ma

³ Tigani tûcokie ngatho kûrî Ngai na Îthe wa Mwathani wetû Jesû Kristû! Nîûndû wa ntha ciake nyîngî, nîwatûvere mwoyo mûcerû na njîra ya kûriûkia Jesû Kristû. Ûndû ûyû nîguo ûtûmaga twîcûrwe nî kîîrîgîrîro Kîam ma,

⁴ kwoguo nîtwetagîrîra kûgwata îgai rîrîa Ngai aigîrîte andû ake. Îgai rîrîa amwigîrîte îgûrû kûrîa rîtangîora, rîtangîgia na gîko na rîtangîthira.

⁵ Îgai rîu nî rîenyu, mue arîa na njîra ya wîtîkio mûgitîrîtwe nî vinya wa Ngai nîûndû wa ûvonokio ûrîa ûvarîrîtue gûkaaguûrua îvindarî rîa mûthiia.

⁶ Kenani nîûndû wa ûguo, wana ethîrwa kûrî na vata wa mûgîe na kîeva kavinda kanini nîûndû wa magerio ma mîthemba mîîngî marîa maramûthînia.

⁷ Mworoto wa magerio mama monthe nî kwonania atî wîtîkio wenyu nî wa ma. Wana nginya thaavu îgeragua na mwaki nîguo yonekane kana nî mbaro. Kwoguo wîtîkio wenyu ûrîa wî vata gûkîra thaavu, nwanginya ûgerue nîguo wonekane kana nî wa ma. Namue nîmûgaacoka kûgîa na ûkumio, riiri na gîtîîo vîndî îrîa Jesû Kristû akaaguûrua.

⁸ Mue mûtianona Kristû, nwatî nîmûmwendete. Mue rîu mûtiramwona, nwatî nîmûmwîtîkîtie. Kwoguo nîmûkenaga gîkeno kînene mûno na gîtangîgweteka na ciugo,

⁹ nîûndû nîmûramûkîra ûvonokio wa mîoyo yenyu, ûrîa arî guo mworoto wenyu wa kûmwîtîkia.

¹⁰ Arathi nîmaacaririe na magîtuîria na kîîo kîîngî mûno ûvoro wîgiî ûvonokio ûyû. Nîmaarathire îgûrû rîa ûvoro wîgiî kîveo gîkî kîrîa Ngai akaamûva.

¹¹ Roho wa Kristû aarî ndaarî ya Arathi rîrîa maarathaga ûvoro wîgiî kûthînua gwa Kristû, na riiri ûrîa ûgaacoka kûrûmîrîra mathîna mau. Arathi nîmaageragia kûmenya ûvoro wîgiî maûndû marîa Roho aamoonagia rîrîa magaatuîkîka na ûrîa gûkeethîrwa gwîkariî maûndû mau magîtuîkîka.

¹² Ngai nîwaguûrîrie arathi aya atî maûndû marîa maarathaga matiarî ma kûmaguna o ene, nwatî maarî ma kûmûguna mue. Maatuirwe ndungata cia kwanîrîra maûndû marîa rîu mûrîkîtie kwîgua kûvîtûkîra kûrî anjaama arîa maamûvunjîrie Ûvoro Mwaro. Meekire ûguo matethereretue nî Roho Mûtheru ûrîa watûmîtwe kuuma îgûrû. Maûndû mama nîmo nginya araika mendaga kûmenya.

Ngai atwîtaga tûtûûre mûtûûrîre mûtheru

¹³ Kwoguo îcirieni waro îgûrû rîa ûrîa mûgeere gwîka. Îkaragani mwîîguîte na mwigîte mwîrîgîrîro wenyu wonthe kûrî kîveo Kîam Wega wa Ngai. Mûkaavewa kîveo kîu rîrîa Jesû Kristû akaaguûrua.

¹⁴ Rîu nîûndû mûrî ciana mbathîki cia Ngai, mûtigatûûre na merirîria marîa mwatûûraga namo vîndî ya tene rîrîa mûtaarî ataûkîre.

¹⁵ Vandû va ûguo, tuîkani andû atheru maûndûrî monthe marîa mwîkaga wata ûrîa Ngai ûrîa wamwîtire ethagîrwa arî mûtheru.

¹⁶ Mandîko matheru maugaga atîrî, “Tuîkani andû atheru, nîûndû wananie nîrî mûtheru.”

¹⁷ Rîrîa mûravoya Ngai nîmûmwîtaga Vava. Nake atucaga cira ya wa mûndû wa mûndû atarî na kîmenyano. Atucaga cira kûringana na ûrîa wa mûndû wa mûndû ekîte. Kwoguo rîrîa mûrî gûkû nthî tûûragani mûrî na gîtîîo kûrî Ngai.

¹⁸ Mue nîmwîcî atî nîmwakûrirwe kuuma mîtûûrîrerî îtarî vata îrîa mwatigîrwe nî methe menyu ma tene. Mûtiakûûrwa na na kîndû ta sîlûva kana thaavu irîa ingîcûka.

¹⁹ Mwakûûrirwe na nthakame ya goro mûno ya Kristû, ûrîa wekariî ta ng'ondu îtaarî na wonje kana îroro.

²⁰ Kristû aathuurirwe nî Ngai mbere ya nthî kûmbwa, nwatî rîu mîthenyarî îno ya kûrigîrîria nîaguûrîtue nîûndû wenyu.

²¹ Na njîra ya Kristû nîmwîtîkîtie Ngai ûrîa wariûkirie Kristû na akîmûva riiri. Kwoguo rîu mûtûûraga mwîtîkîtie Ngai na mwigîte mwîrîgîrîro wenyu kûrî ke.

²² Rîu nîûndû nîmûtheretie mîoyo yenyu na njîra ya kwathîkîra ûma, nîmûvotete kwenda na ma aarî na ariû a îthe wetû. Kwoguo mûndû nî endage mûndû ûrîa wîngî na ngoro yake yonthe.

²³ Nîûndû na njîra ya kiugo Kîam Ngai kîrîa kîrî mwoyo nîmûciarîtwe rîngî ta ciana cia mûciari ûrîa ûtakucaga, nwatî atûûraga tene na tene.

²⁴ Mandîko matheru maugîte atîrî: “Andû onthe mekariî ta nyaki, na riiri wao wonthe wîkariî ta maûa ma kîthaka. Nyaki nîyûmaga, namo maûa nîmagûcaga,

²⁵ nwatî kiugo Kîam Mwathani nîgîtûûraga tene na tene.” Kiugo gîkî nîguo Ûvoro Mwaro ûrîa wavunjirue kûrî mue.