1Maû 4 - ÎVUKU RÎA ÛVORO MWARO

Njiarwa cia Juda

¹ Njiarwa cia Juda ciarî: Perezi, Hezironi, Karimi, Huri, na Shobali.

² Shobali aarî îthe wa Reaia, ûrîa warî îthe wa Jahathi. Jahathi aarî îthe wa Ahumai na Lahadi. Acio nîo maarî methe ma tene ma andû arîa maatûûraga Zora.

³ Avîcî a Etamu maarî Jezireeli, Ishima, na Idibashi. Nake mwarî eetagwa Hazeleliponi.

⁴ Panueli aarî îthe wa Gedori, nake Ezeri aarî îthe wa Husha. Acio maarî a Huri ûrîa warî îrikithathi rîa Efiratha îthe wa wa Bethilehemu.

⁵ Ashihuri, îthe wa Tekoa aarî na aka aîrî. Ûmwe eetagwa Hela, na ûcio wîngî eetagwa Naara.

⁶ Naara nîwaciarire anake ana. Nao meetagwa Ahuzamu, Heferi, Temeni, na Haahishitari.

⁷ Nake Hela nîwaciarire anake athatû. Nao meetagwa Zerethi, Iziharu, na Ethinani.

⁸ Kozi aarî îthe wa Anubi, Zobeba, na îthe wa tene wa mbarî ya Ahariheli mûvîcî wa Harumu.

⁹ Jabezi aarî mûve gîtîîo mûno gûkîra aa mûrwang'ina. Ng'ina aamûtuîrîrîte rîîtwa rîa Jabezi nîûndû aarî na ûrûrû mwîngî mûno akîmûciara.

¹⁰ Nwatî Jabezi nîwavoire Ngai wa Isiraeli akiuga atîrî, “Ngai ndathima na ûnenevie mîvaka ya vûrûri wakwa. Îthagîrwa ûrî vamwe nanie na ûngitagîre kuuma kûrî ûndû wonthe mûcûku ûrîa ûngîtûma mbîthîrwe na ûrûrû.” Ngai Nîwamûvere kîrîa aavoire.

Mûtaratara wa mbarî ciîngî

¹¹ Kelubu, mûrwang'ina na Shuha aarî îthe wa Mehiru. Nake Mehiru aarî îthe wa Eshitoni.

¹² Eshitoni aarî îthe wa Bethirafa, Pasea, na Tehina. Tehina aarî îthe wa andû arîa maatûûraga îtûûrarî rîa Irinahashi. Andû aya matûûraga Reka.

¹³ Avîcî a Kenazi maarî: Othinieli na Seraia. Nao avîcî a Othinieli maarî: Hathathi na Meonothai.

¹⁴ Meonothai aarî îthe wa Ofira. Seraia aarî îthe wa Joabu. Nake Joabu aarî îthe wa tene wa andû a Kîamnda Kîam ûvundi. Andû acio meetirwe ûguo nîûndû andû onthe arîa maatûûraga Kîamndarî kîu maarî mavundi.

¹⁵ Kalebu mûvîcî wa Jefune aarî na avîcî athatû. Nao meetagwa Iru, Ela, na Naamu. Ela aarî îthe wa Kenazi.

¹⁶ Avîcî a Jehaleleli maarî: Zifu, Zifa, Tiria na Asareli.

¹⁷ Avîcî a Ezira maarî: Jetheri, Meredi, Eferi, na Jaloni. Meredi nîwavikirie mwarî wa mûthamaki wa Misiri. Nao nîmaaciarire mwîrîtu wetagwa Miriamu na avîcî aîrî metagwa Shamai na Ishiba. Ishiba nîke watuîkire kiumo gîa îtûûra rîa Eshitemo.

¹⁸ Meredi nîwacokire akîvikia mûka wîngî kuuma mûvîrîgarî wa Juda na magîciara avîcî athatû meetagwa Jeredi, ûrîa warî kiumo gîa îtûûra rîa Gedori; Heberi nake aarî kiumo gîa îtûûra rîa Soko, nake Jekuthieli nîke warî kiumo gîa îtûûra rîa Zanoa.

¹⁹ Hodia nîwavikirie mwarwang'ina na Nahamu. Njiarwa ciao nîcio ciatuîkire andû a mbarî ya Garimu, arîa maatûûraga îtûûrarî rîa Keila, na andû a mbarî ya Maakathi arîa maatûûraga îtûûrarî rîa Eshitemoa.

²⁰ Avîcî a Shimoni maarî: Amunoni, Rina, Benihanani na Tiloni. Avîcî a Ishi maarî: Zohethi na Benizohethi.

Njiarwa cia Shela

²¹ Shela aarî mûvîcî wa Juda. Avîcî a Shela maarî: Eri, îthe wa tene wa andû arîa maatûûraga îtûûrarî rîa Leka; Laada îthe wa tene wa andû arîa maatûûraga îtûûrarî rîa Maresha; na mbarî ya andû arîa maatumaga nguo na vamba na maatûûraga îtûûrarî rîa Bethi Ashibea.

²² Mûvîcî wîngî aarî Jokimu na andû arîa maatûûraga îtûûrarî rîa Kozeba, Joashi na Sarafi arîa maathanaga vûrûrirî wa Moabu na magîcoka makîthiî gûtûûra Lehemu. (Mandîko mama nî ma tene mûno.)

²³ Avîcî aya a Shela maarî aûmbi a nyûngû na maatûûraga matûûrarî ma Netaimu na Gedera makîrutagîra mûthamaki wîra.

Njiarwa cia Simeoni

²⁴ Avîcî a Simeoni maarî: Nemueli, Jamini, Jaribu, Zera, Shauli.

²⁵ Shauli aarî îthe wa Shalumu nake Shalumu aarî îthe wa Mibusamu, Mibusamu aarî îthe wa Mishima.

²⁶ Mishima aarî îthe wa Hamueli nake Hamueli aarî îthe wa Zakuri. Zakuri aarî îthe wa Shimei.

²⁷ Shimei aarî îthe wa avîcî îkûmi na atandatû na erîtu atandatû, nwatî aa mûrwang'ina matiarî na ciana nyîngî. Mûvîrîga wao ndwongerereka andû ta mûvîrîga wa Juda.

²⁸ Njiarwa cia Shimei ciatûûraga matûûrarî mama marûmîrîrîte: Beerisheba, Molada, Hazarishuali,

²⁹ Biliha, Ezemu, Toladi,

³⁰ Bethueli, Horima, Zikilagi,

³¹ Bethimarikabothi, Hazarisusimu, Bethibiri, na Sha-araimu.

³² Nîmaatûûraga matûûrarî mengî matano. Matûûra mau maarî: Etamu, Aini, Rimoni, Tokeni, Ashani,

³³ na icagi irîa ciathiûrûrûkîrîtie matûûra mau kûnyûrûrûka mwena wa îveti na îthûîro nginya îtûûrarî rîa Baala. Ûyû nîguo mûtaratara ûrîa maaigire wa njiarwa ciao na kûrîa maatûûraga.

³⁴ Andû aya maarî atongoria a mbarî ciao na marûmanîrîrîte ta û: Meshobabu, Jamuleki, Josha a mûvîcî wa Amazia,

³⁵ Joeli, Jehu (mûvîcî wa Joshibia, mûvîcî wa Seraia, mûvîcî wa Asieli),

³⁶ Elioenai, Jaakoba, Jeshohaia, Asaia, Adieli, Jesimieli, Benaia,

³⁷ Ziza mûvîcî wa Shifi, Shifi mûvîcî wa Aloni, Aroni mûvîcî wa Jedaia, Jedaia mûvîcî wa Shimuri, Shimuri mûvîcî wa Shemai.

³⁸ Andû aya nîmoongererekire mûno.

³⁹ Nao nîmaathiîre na kûu nja ya îtûûra rîa Gedori na mwena wa îrathîro wa Kîamnda kîu gûcaria kûndû gwa kûrîthia nyamû ciao.

⁴⁰ Nîmoonire kûndû kûnoru kwaro gwa kûrîthua. Vûrûri ûcio warî na kûndû kûnene gwa kûrîthua na ndwarî na înegene, warî na thayû. Mbererî vûrûri ûcio watûûragwa nî njiarwa cia Hamu

⁴¹ Andû acio mandîkîtwe marîîtwa mao, nîmaaûkire vûrûrirî ûyû vîndî îrîa Hezekia aarî mûthamaki wa Juda. Nao nîmaatharîkîre njiarwa cia Hamu na magîcûkangia magema mao na makîrûa na Meuni arîa maatûûraga kuo. Nîmaamavinyûririe na magîtûûra kuo nginya ûmûnthî nîûndû kwarî kûndû kwaro gwa kûrîthua.

⁴² Andû magana matano (500) a mûvîrîga wa Simeoni nîmaathiîre kîrîmarî gîa Seiru matongoretue nî Pelatia, Nearia, Refaia na Uzieli, avîcî a Ishi.

⁴³ Nao nîmaaûragire Amaleki arîa maatigarîte na maaûrîte na nîkuo matûûraga nginya ûmûnthî.