1Maû 28 - ÎVUKU RÎA ÛVORO MWARO

Daudi nîwataarîrie ûvoro wa gûtuma hekarû

¹ Mûthamaki Daudi nîwathanire anene onthe a Isiraeli magomane Jerusalemu. Nao anene onthe a mîvîrîga, anene a ikundi cia andû arîa maarutaga wîra wa mûthamaki, anene a athigari ngiri îmwe, anene a athigari îgana, atongoria arîa maamenyagîrîra indo na ndîthia ya mûthamaki, avîcî ake, anene a mûciî wa mûthamaki na athigari na andû arîa maarî îgweta nîmaagomanire Jerusalemu.

² Mûthamaki Daudi nîwamerire atîrî, “Tanthikîrîriani andû etû. Nînîrendete gûtuma nyomba ya kwigwa îthandûkû rîa kîrîkanîro Kîam Ngai-Mûnene, Ngai wetû na va kwigwa gaturwa ka magûrû make, na nînavarîrîrie gûtuma.

³ Nwatî Ngai nî arangiririe nîmîtuma, nîûndû nî mûrûu mbaara na nîmbîtûrûrithîtie nthakame nyîngî.

⁴ Kûnarî ûguo, Ngai-Mûnene, Ngai wa Isiraeli nîwanthuurire kuuma kûrî nyomba ya vava nduîke mûthamaki wa Isiraeli nginya tene na tene. Nîwathuurire mûvîrîga wa Juda umage atongoria na kuuma mûvîrîgarî wa Juda nîwathuurire nyomba yetû, na kuuma mûciî wa vava nîwakenirue nînie na akîndua mûthamaki wa Isiraeli.

⁵ Ngai-Mûnene nîwamvere anake eengî na gatagatîrî kao onthe nîwathuurire Solomoni ekarîre gîtî Kîam ûthamaki wa Ngai-Mûnene nîguo athamakîre Isiraeli.

⁶ “Ngai-Mûnene nîwambîrire atîrî, ‘Mûvîcîguo Solomoni nîke ûkaandumîra hekarû na kîvaro gîakwa. Nînîmûthuurîte atuîke mwana wakwa nanie nduîke îthe.

⁷ Nîngaatûma ûthamaki wake ûtûûre tene na tene ethîrwa nî agûtûûra athîkagîra mawatho na maathani makwa ta ûrîa ekaga rîu.’

⁸ “Kwoguo, andû akwa mûrî mbere ya Ngai na ûngano wonthe wa andû a Isiraeli andû a Ngai-Mûnene nîramwîra mwathîkagîre waro maathani monthe ma Ngai-Mûnene, Ngai wenyu. Na mweka ûguo nîmûkûthiî na mbere kwîgwatîra vûrûri ûyû mwaro na nîmûgaaûtigîra njiarwa cienyu rîrî îgai rîao tene na tene.”

⁹ Mûthamaki Daudi nîwerire Solomoni atîrî, “Mwana wakwa, ûmenye Ngai wa aguo na ûmûtungatagîre na ngoro yonthe na meciria marî na wendi. Ngai-Mûnene nîatuîragia ngoro cionthe na nîamenyaga meciria na mîvango yacio. Ûngîmûcaria, ke nîagûgwîtîkîra. Nwatî ûngîmûrega nîagûgûtiganîria nginya tene na tene.

¹⁰ Nwanginya ûmenya atî Ngai-Mûnene nî akûthuurîte ûmûtumîre hekarû ntheru. Gîa na vinya ûrute wîra ûcio.”

¹¹ Daudi nîwacokire akînengera mûvîcî Solomoni mûvano wa mwako wonthe wa hekarû, tûnyomba twayo, nyomba cia kwigwa indo, tûnyomba twa îgûrû, tûnyomba twa ndaarî na vandû varîa vatheru Mûno varîa andû mathiîcaga nîguo makarekerwe mevia mao.

¹² Nîwamûnengere mûvano wonthe ûrîa warî meciriarî make nîûndû wa ivaaro cia hekarû na tûnyomba tuonthe tûrîa twathiûrûrûkîrîtie hekarû, tûnyomba tûrîa twaigagwa indo cia hekarû na indo irîa ciamûrîrîtwe Ngai-Mûnene.

¹³ Nîwamûnengere mûvano wa ûrîa akaavanga athînjîri-Ngai na Alawi nîûndû wa wîra wa gûtungata hekarûrî na kûmenyerera indo cionthe cia hekarû ya Ngai-Mûnene.

¹⁴ Mûthamaki Daudi nîwavecanire mwîgana wa thaavu îrîa îkaavûthîka nîûndû wa indo cia thaavu na mwîgana wa sîlûva nîûndû wa indo mwanya mwanya cia sîlûva,

¹⁵ na wa thaavu ya vandû va kwigîrîrwa taa na mwîgana wa thaavu ya taa ciavo, mwîgana wa sîlûva ya vandû va kwigîrîrwa taa kûringana na ûrîa vandû vau vavûthîkaga.

¹⁶ Nîwamûnengere mwîgana wa thaavu ya gûtûmîrwa nîûndû wa metha ya kwigîrîrwa mûgate ûrîa wamûrîrîtwe Ngai-Mûnene na sîlûva ya kûrûtha metha cia sîlûva.

¹⁷ Nîwamwîrire mwîgana wa thaavu ntheri îrîa îgaatûmîrwa kûrûtha mînyoge, mbakûri, ikombe na mwîgana wa sîlûva ya kûrûtha karaî,

¹⁸ mwîgana wa thaavu ntheri nîûndû wa metha ya kîgongoona ya kûvîvîrua ûbani. Nîwanengere Solomoni mûvuanano wa gîkaari Kîam mbarathi kîrûthîtwe na thaavu Kîam Akerubi arîa maambararîtie mathagu mao magakunîkîra îthandûkû rîa kîrîkanîro Kîam Ngai-Mûnene.

¹⁹ Mûthamaki Daudi nîwaugire atîrî, “Maûndû mama monthe nînîmandîkîte nûmîrîrîte ûtaari kuuma kûrî Ngai-Mûnene ke mwene na nîwamvotithirie gûtaûkîrwa nî mûvano ûcio wonthe.”

²⁰ Nake mûthamaki nîwerire mûvîcî Solomoni atîrî, “Gîa na vinya na wîyûmîrîrie ûrute wîra ndûgetigîre kana ûreke ûndû wana ûrîkû ûkûgiria kûruta wîra, nîûndû Ngai-Mûnene, Ngai wakwa akethagîrwa arî vamwe nawe. Ndagaagûtiganîria, akethagîrwa arî nawe nginya rîrîa hekarû ya Ngai-Mûnene îkaarîka.

²¹ Athînjîri-Ngai na Alawi nîagaîre wîra wa gûtungata hekarûrî. Aruti wîra arîa marî na wara wa mawîra ma mîthemba yonthe nîmevarîrîtie gûgûtethia kûruta wîra. Anene na andû onthe magaakwathîkîra.”