1Maû 27 - ÎVUKU RÎA ÛVORO MWARO

Mûvango wa mûtûûrîre wa andû na athigari

¹ Ûyû nîguo mûtaratara wa andû a Isiraeli, atongoria a mîciî, anene a athigari ngiri a mbaara na a magana, na anene arîa maatungataga mûthamaki. Wa mweri, gîkundi Kîam andû ngiri mîrongo îîrî na inya (24,000) nîkîethagîrwa gîgîtungata kîrî rungu rwa mûnene ûrîa wathuurîtwe mweri ûcio.

² Jashobeamu mûvîcî wa Zabudieli nîke warî mûnene wa gîkundi Kîam mbere, mweri wa mbere kîrî na andû ngiri mîrongo îîrî na inya (24,000).

³ Ke aarî wa rûciaro rwa Perezi, na nîke warî mûnene wa anene acio engî a athigari a mbaara mweri wa mbere.

⁴ Mweri wa kaîrî Dodai wa rûciaro rwa Ahohi nîke warî mûnene wa gîkundi kîu Kîam athigari ngiri mîrongo îîrî na inya (24,000) na mûnini wake aarî Mikilothi.

⁵ Mweri wa kathatû, Benaia nîke warî mûnene wa gîkundi Kîam athigari ngiri mîrongo îîrî na inya (24,000). Benaia aarî mûvîcî wa Jehoiada mûthînjîri-Ngai.

⁶ Benaia nîke warî na vinya gîkundirî Kîam andû arîa mîrongo îthatû na nîke warî mûnene wao. Nake mûvîcî Amizabadi nîke warî mûnene wa gîkundi gîake.

⁷ Mweri wa kana, Asaheli mûrwang'ina na Joabu nîke warî mûnene wa kana wa gîkundi Kîam athigari 24,000. Zebadia mûvîcî wa Asaheli nîwacokire agîtuîka mûnene vuva wa îthe.

⁸ Mweri wa gatano, Shamuhuthi wa rûciaro rwa Iziharu nîke watuîkire mûnene wa gîkundi Kîam athigari ngiri mîrongo îîrî na inya (24,000).

⁹ Mweri wa gatandatû, Ira mûvîcî wa Ikeshi wa kuuma Tekoa nîke watuîkire mûnene wa gatandatû, arî na gîkundi Kîam athigari ngiri mîrongo îîrî na inya (24,000).

¹⁰ Mweri wa mûgwanja, Helezi wa rûciaro rwa Efiraimu kuuma Peloni nîke watuîkire mûnene wa mûgwanja, arî na gîkundi Kîam athigari ngiri mîrongo îîrî na inya (24,000).

¹¹ Mweri wa kanana, Sibekai wa kuuma Husha nîke watuîkire mûnene wa kanana, arî na gîkundi Kîam athigari ngiri mîrongo îîrî na inya (24,000). Sibekai aarî wa mbarî ya Zera.

¹² Mweri wa kenda Abiezeri kuuma Anathothi nîke warî mûnene wa kenda, arî na gîkundi Kîam athigari ngiri mîrongo îîrî na inya (24,000). Abiezeri aarî wa mûvîrîga wa Benjamini.

¹³ Mweri wa îkûmi, Maharai wa kuuma Netofa nîke watuîkire mûnene wa gîkundi Kîam athigari ngiri mîrongo îîrî na inya (24,000). Maharai aarî wa mbarî ya Zera.

¹⁴ Mweri wa îkûmi na ûmwe, Benaia wa kuuma Pirathoni nîke watuîkire mûnene wa gîkundi Kîam athigari ngiri mîrongo îîrî na inya (24,000). Benaia aarî wa mûvîrîgarî wa Efiraimu.

¹⁵ Mweri wa îkûmi na îîrî, Helidai kuuma Netofa nîke watuîkire mûnene wa îkûmi na kaîrî arî na gîkundi Kîam athigari ngiri mîrongo îîrî na inya (24,000). Helidai aarî wa mbarî ya Othinieli.

Ûtongoria wa Mîvîrîga ya Isiraeli

¹⁶ Ûyû nîguo mûtaratara wa atongoria a mîvîrîga ya Isiraeli: Eliezeri mûvîcî wa Zikiri aarî mûtongoria wa mûvîrîga wa Reubeni. Shefatia mûvîcî wa Maaka aarî mûtongoria wa Mûvîrîga wa Simeoni.

¹⁷ Hashabia mûvîcî wa Kemueli aarî mûtongoria wa mûvîrîga wa Lawi. Zadoku aarî mûtongoria wa mûvîrîga wa Aroni.

¹⁸ Elihu ûmwe wa aa mûrwang'ina na mûthamaki Daudi aarî mûtongoria wa mûvîrîga wa Juda. Omuri mûvîcî wa Mikaeli aarî mûtongoria wa Mûvîrîga wa Isakaru.

¹⁹ Ishumaia mûvîcî wa Obadia nîke warî mûtongoria wa mûvîrîga wa Zebuluni. Jeremothi mûvîcî wa Azirieli nîke warî mûtongoria wa mûvîrîga wa Nafutali.

²⁰ Hoshea mûvîcî wa Azazia aarî mûtongoria wa mûvîrîga wa Efiraimu. Joeli mûvîcî wa Pedaia aarî mûtongoria wa nuthu îmwe ya mûvîrîga wa Manase ya mwena wa îthûîro.

²¹ Ido mûvîcî wa Zekaria aarî mûtongoria wa nuthu îo îngî ya mûvîrîga wa Manase ya mwena wa îrathîro Jaasieli mûvîcî wa Abuneri aarî mûtongoria wa mûvîrîga wa Benjamini.

²² Azareli mûvîcî wa Jerohamu aarî mûtongoria wa mûvîrîga wa Dani. Aya nîo maarî atongoria a mîvîrîga ya Isiraeli.

²³ Mûthamaki Daudi ndaanatara andû arîa maarî na ûkûrû wa nthî ya mîaka mîrongo îîrî, nîûndû Ngai-Mûnene nîwerîrîte andû a Isiraeli atî nîagaatûma mengîve wata njata cia îgûrû.

²⁴ Joabu mûvîcî wa Zeruia nîwambîrîrie gûtara andû a Isiraeli, nwatî ndaanarîkia wîra wa kûmatara. Isiraeli nîmaaverithirue nî Ngai nîûndû wa ûtarani ûcio, kwoguo mwîgana wa andû ndwandîkwa kûrîa kwandîkagwa maûndû ma mûthamaki Daudi.

Anene a maûndû ma mûthamaki

²⁵ Mama marûmîrîrîte nî marîîtwa ma andû arîa maamenyagîrîra ûtonga wa mûthamaki: Azamavethi mûvîcî wa Adieli aarî mûnene wa nyomba irîa ciaigagwa indo cia mûthamaki. Jonathani mûvîcî wa Uzia aarî mûnene wa nyomba cia kwigwa indo vûrûrirî, matûûrarî, icagirî na nyomba cia îgûrû.

²⁶ Eziri mûvîcî wa Kelubu aarî mûnene wa andû arîa maarutaga wîra mîgûndarî ya vûrûri.

²⁷ Shimei wa kuuma Rama nîke warî mûnene wa mîgûnda ya mîthavibu. Zabudi kuuma Shafamu aarî mûnene wa kwiga ndivei îrîa yaumaga mîgûndarî ya mîthavibu.

²⁸ Baali Hanani kuuma Gederi aarî mûnene wa mîtî ya mîtamaiyû na mîtî ya mîkûyû îrîa îrî Shefela. Joashi nîke warî mûnene wa kûrîa kwaigagwa maguta ma mîtamaiyû.

²⁹ Shitirai wa kuuma Sharoni aarî mûnene wa ûrîthi ûrîa warîthagua Sharoni. Nake Shafati mûvîcî wa Adilai aarî mûnene wa ûrîthi ûrîa warîthagua ciandarî.

³⁰ Obili Mûshumaeli aarî mûnene wa ûrîthi wa ngamîîra. Jehideia kuuma Meronothi aarî mûnene wa ûrîthi wa mvunda. Nake Jazizi, kuuma Hagari aarî mûnene wa ûrîthi wa mbûri na ng'ondu.

³¹ Aya onthe maarî amenyereri a indo cia mûthamaki Daudi.

Arîa maataaraga mûthamaki Daudi

³² Jonathani, îthe mûnini wa mûthamaki Daudi aarî mûndû warî na ûûgî wa gûtaarana na mûndû warî mûthomu. Ke na Jehieli mûvîcî wa Hakimoni nîo maarî amenyereri a avîcî a mûthamaki.

³³ Ahithofeli nîke wataaraga mûthamaki. Nake Hushai wa kuuma Ariki aarî mûrata wa mûthamaki.

³⁴ Ahithofeli akua, Jehoiada mûvîcî wa Benaia marî na Abiatha nîo maatuîkire ataari a mûthamaki. Nake Joabu nîke warî mûnene wa athigari a mûthamaki.