1Maû 26 - ÎVUKU RÎA ÛVORO MWARO

Arangîri a hekarû

¹ Ûyû nîguo mûtaratara wa ûrîa wîra wa kûrangîra hekarû wagairwe. Kuuma mbarî ya Kora nîkwathuurirwe Meshelamia mûvîcî wa Kore ûrîa warî wa njiarwa cia Asafu.

² Meshelamia aarî na avîcî mûgwanja. Ûrîa warî îrikithathi aarî Zekaria, akîrûmîrîrwa nî Jediaeli, Zebadia, Jathinieli,

³ Elamu, Jehohanani, Eliehoenai.

⁴ Obedi-edomu nîwarathimirwe nî Ngai akîgîa na anake anana. Nao nî Shemaia arî îrikithathi, Jehozabadi, Joa, Sakaru, Nethanieli,

⁵ Amieli, Isakaru na Peulethai.

⁶ Shemaia, mûvîcî wa Obedi-edomu aarî na avîcî maarî atongoria a nyomba ciao nîûndû maarî andû marî na ûvoti.

⁷ Nao maarî: Othini, Refaeli, Obedi, Elizabadi na aa mûrwang'ina Elihu na Shemakia andû maarî na ûvoti.

⁸ Acio onthe maarî njiarwa cia Obedi-edomu. Ke vamwe na avîcî ake na andû ao maarî andû mîrongo îtandatû na aîrî (62) na maarî athomithie na makamenya wîra ûcio.

⁹ Meshelamia aarî na avîcî na aa mûrwang'ina îkûmi na anana andû maarî na ûvoti.

¹⁰ Hosa wa mbarî ya Merari aarî na avîcî ake ana. (Shimuri nîwatuîtwe mûtongoria nî îthe wana ethîrwa tîke warî îrikithathi rîake.)

¹¹ Hilikia nîke warî wa kaîrî, akîrûmîrîrwa nî Tebalia na Zekaria. Avîcî a Hosa na njiarwa ciao onthe maarî arûme îkûmi na athatû.

¹² Arangîri acio magaanîtue ikundi kûringana na nyomba ciao, na maagaîrîtwe wîra wa gûtungata wata ûrîa andû acio engî ao maarî na wîra wa gûtungata hekarûrî ya Ngai-Mûnene.

¹³ Nyomba cionthe, nene kana nini nîciaikirie mîtî nîguo imenye ivingo irîa ikaarangagîra.

¹⁴ Shelemia nîwaikîrue mîtî na nîwatuîkire wa kûrangîra kîvingo Kîam mwena wa îrathîro. Nake mûvîcî Zekaria, ûrîa warî mûndû mûûgî wa gûtaarana nîwatuîkire wa kûrangîra kîvingo Kîam mwena wa rûgûrû.

¹⁵ Obedi-edomu nîwagwîrîrwe nî mîtî ya kûrangîra kîvingo Kîam mwena wa îveti, nao avîcî ake nîmaatuîkire a kûrangîra nyomba irîa ciaigagwa indo.

¹⁶ Shupimu na Hosa maagaîrwe kûrangîra kîvingo Kîam mwena wa îthûîro na kîvingo Kîam Shalekethi njîrarî îrîa yaunûkîtie. Wîra wa kûrangîra wagaagwa andû aîrî kwa aîrî.

¹⁷ Mûthenya wa mûthenya kwethagîrwa kûrî na arangîri. Mwena wa îrathîro, wa mûthenya kwethagîrwa na arangîri atandatû (6), mwena wa rûgûrû arangîri ana (4), mwena wa îveti arangîri ana (4), nyombarî cia kwigwa indo kwarî na arangîri ana (4), wa nyomba îmwe arangîri aîrî (2) wa mûthenya.

¹⁸ Mwena wa îthûîro wa kîvaro, kwarî arangîri ana (4) njîrarî na arangîri aîrî (2) varîa vatûgîru.

¹⁹ Ûyû nîguo wîra ûrîa wagaîrîtwe arangîri a kuuma kûrî njiarwa cia Kora na Merari.

Mawîra mengî ma hekarû

²⁰ Alawi acio engî nîmaamenyagîrîra kîgîna Kîam hekarû na nyomba irîa ciaigagwa indo irîa ntheru.

²¹ Ladani, ûmwe wa avîcî a Gerishoni aarî îthe wa tene wa njiarwa nyîngî. Amwe ao maarî njiarwa cia mûvîcî Jehieli.

²² Avîcî a Jahieli, Zethamu na Joeli nîo maarî amenyereri a kîgîna na nyomba cia hekarû irîa ciaigagwa indo.

²³ Njiarwa cia Amuramu, Iziharu, Heburoni na Uzieli nîciagaîrwe mawîra.

²⁴ Shebueli mûvîcî wa Gerishomu, mwana wa Musa, nîke warî mûmenyereri mûnene wa kîgîna Kîam hekarû.

²⁵ Mûrwang'ina wa Gerishomu aarî Eliezeri. Eliezeri aarî îthe wa Rehabia, Rehabia aarî îthe wa Jeshaia, Jeshaia aarî îthe wa Joramu, Joramu aarî îthe wa Zikiri na Zikiri aarî îthe wa Shelomothi.

²⁶ Shelomothi na andû a mûciî wao nîo maarî amenyereri a indo cionthe irîa ciamûrîrîtwe hekarû nî mûthamaki Daudi, na atongoria a mîciî, anene a athigari ngiri îmwe (1,000) anene a athigari îgana rîmwe (100) na anene engî a athigari.

²⁷ Nîmoocire indo imwe cia irîa maatavîte mbaararî na magîciamûra nîûndû wa kûmenyerera hekarû ya Ngai-Mûnene.

²⁸ Shelomithi na andû ao nîo maamenyagîrîra indo cionthe irîa ciamûrîtwe cia gûtûmîrwa hekarûrî, wa vamwe na iveo irîa ciavecanîtwe nî mûrathi Samueli, Saûlo mûvîcî wa Kishu, Abuneri mûvîcî wa Neri na Joabu mûvîcî wa Zeruia.

Mawîra ma Alawi acio engî

²⁹ Kenania wa mbarî ya Iziharu na avîcî ake nîmaaveerwe wîra nja ya hekarû wa gûtongoria andû a Isiraeli na kûmatwithania maciira.

³⁰ Kuuma njiarwarî cia Heburoni, Hashabia na andû a mbarî yao ngiri îmwe na magana mûgwanja (1,700), andû maarî na ûvoti, nîmaatuirwe amenyereri a wîra wa Ngai-Mûnene na wa mûthamaki mwena wa îthûîro wa rûnjî rwa Jorodani.

³¹ Jeria nîke warî mûtongoria wa njiarwa cionthe cia Heburoni. Mwaka wa mîrongo îna wa ûthamaki Daudi, nîgwatuîrirue waro na nîkwamenyekire atî njiarwa cia Heburoni nîcio ciarî na arûme maarî na ûvoti mûnene na maatûûraga Jazeri vûrûrirî wa Gileadi.

³² Jeria aarî na andû ao ngiri igîrî na magana mûgwanja (2,700) maarî na ûvoti na maarî atongoria a mbarî cia methe mao. Mûthamaki Daudi nîwamatuire anene a andû a mûvîrîga wa Reubeni, Gadi, na nuthu ya mûvîrîga wa Manase îrîa îrî mwena wa îrathîro rîa rûnjî rwa Jorodani. Aamatwire anene maûndûrî megiî ûvoro wa Ngai na wa maûndû ma vûrûri.