1Maû 23 - ÎVUKU RÎA ÛVORO MWARO

¹ Daudi akûra mûno nîwatuire mûvîcî Solomoni mûthamaki wa Isiraeli.

Wîra wa Alawi

² Mûthamaki Daudi nîwagomanirie atongoria onthe a Isiraeli vamwe, athînjîri-Ngai na Alawi.

³ Alawi arîa maarî na ûkûrû wa kuuma mîaka mîrongo îthatû (30) na makîria nîmaatarirwe. Nao onthe maarî ngiri mîrongo îthatû na inyanya (38,000).

⁴ Daudi nîwamagaîre wîra. Alawi ngiri mîrongo îîrî na inya (24,000) makaarutaga wîra wa hekarû. Alawi ngiri ithathatû (6,000) marî akwigaga mûtaratara wa maûndû na gûtuithania maciira,

⁵ nao Alawi ngiri inya (4,000) marî arangîri, na engî ngiri inya (4,000) agûkumagia Ngai-Mûnene makîvûthagîra indo cia kwina nyîmbo irîa naarûthire nîûndû wa ûndû ûcio.

⁶ Mûthamaki Daudi nîwagaanirie Alawi ikundi ithatû kûringana na mbarî ciao: mbarî ya Gerishoni, Kohathu na Merari.

⁷ Avîcî a Gerishoni maarî: Ladani na Shimei.

⁸ Avîcî a Ladani maarî athatû (3): Jehieli na nîke warî mûtongoria, Zethamu na Joeli.

⁹ Avîcî a Shimei maarî athatû (3): Shelomothi, Hazieli na Harani. Acio nîo maarî atongoria a mbarî cia njiarwa cia Ladani.

¹⁰ Avîcî a Shimei maarî ana (4): Jahathi, Zina Jeushi na Beria.

¹¹ Jahathi nîke warî wa mbere nake Zina wa kaîrî, nwatî Jeushi na Beria matiarî na avîcî eengî. Kwoguo nîmaatarirwe marî a mbarî îmwe.

¹² Avîcî a Kohathu maarî ana: Amuramu, Iziharu, Heburoni na Uzieli.

¹³ Avîcî a Amuramu maarî: Aroni na Musa. Aroni na njiarwa ciake nîmaathuurirwe matuîke andû amûre tene na tene. Maathuurirwe nîguo mamenyagîrîre indo irîa nyamûre na mavîvagie ûbani nîûndû wa kûgooca Ngai-Mûnene, kûmûtungatîra na kûrathimanaga vîndî cionthe.

¹⁴ Nwatî Avîcî a Musa mûndû wa Ngai, maataranîrue vamwe na andû a mûvîrîga wa Lawi.

¹⁵ Avîcî a Musa maarî: Gerishomu na Eliezeri.

¹⁶ Shebueli nîke warî mûtongoria wa ciana cia wa Gerishomu.

¹⁷ Eliezeri aarî na mwanake ûmwe wetagwa Rehabia, nwatî Rehabia aarî na njiarwa nyîngî.

¹⁸ Iziharu aarî na mûvîcî wetagwa Shelomithi na aarî mûtongoria wa mbarî yao.

¹⁹ Avîcî a Heburoni maarî ana: Jeria, Amaria, Jahazieli na Jekameamu.

²⁰ Avîcî a Uzieli maarî: Mika arî mûtongoria na Ishia.

²¹ Avîcî a Merari maarî aîrî: Mahili na Mushi. Avîcî a Mahili wanao maarî aîrî: Eleazaru na Kishu.

²² Eleazaru aakwire atagîte na anake nwa erîtu atheri. Erîtu ake maavikirue nî aa mûrwethe, avîcî a Kishu.

²³ Mushi, mûvîcî wa kaîrî wa Merari aarî na avîcî athatû: Mahili, Ederi, na Jeremothi.

²⁴ Ino nîcio njiarwa cia Lawi ta ûrîa maandîkirwe marîîtwa mao kûringana na nyomba ciao na mbarî ciao. Nao maarî atongoria a mbarî ciao. Maandîkirwe andû arîa maarî na ûkûrû wa mîaka mîrongo îîrî na makîria, na maarî na wîra wa gûtungata hekarûrî ya Ngai-Mûnene.

²⁵ Mûthamaki Daudi nîwaugire atîrî, “Ngai-Mûnene, Ngai wa Isiraeli nîavete andû ake thayû, na nîagûtûûra Jerusalemu tene na tene.

²⁶ Kwoguo Alawi tîmacoka gûkuua rîngî îgema rîa Ngai-Mûnene kana kîndû wa kîonthe gîa gûtûmîrwa vîndî ya kûgooca.”

²⁷ Kûringana na ûtaari wa Daudi wa mûthiia, Alawi maataragwa arîa maakinyîtie ûkûrû wa kuuma mîaka mîrongo îîrî na makîria.

²⁸ Wîra wao warî wa gûtethereria njiarwa cia Aroni wîrarî wa ûtungata hekarûrî ya Ngai-Mûnene, kûmenyerera kîvaro Kîam hekarû na tûnyomba tûrîa twethagîrwa tûrî hekarûrî na kûmenyerera indo irîa nyamûre cia hekarû ciîkarage irî ntheru wa vamwe na kûruta mawîra mengî ma hekarû.

²⁹ Alawi acio nîmaaveetwe wîra wa kwigagîrîra mûgate ûrîa mwamûre metharî, mûtu wa matega ma irio, mîgate îrîa îtekîrîtwe ndawa ya kwimbia, gûtukania mûtu na maguta ma mûtamaiyû na kûrûtha mîgate ya matega, kûthima ithimi irîa ciagîrîrîte,

³⁰ wîra wa gûkumia Ngai-Mûnene na kûmûva riiri vîndî cionthe, kîraûko na kîvwaî.

³¹ Alawi nîmaarutaga matega ma kûvîvua ma Ngai-Mûnene mîthenya ya thavatû, ciathî cia mweri wacicûka na mîthenya îrîa îngî ya ciathî. Kwarî na mawatho marîa maarûmagîrîrwa ma kwonania Alawi arîa maagîrîrwe nî gûtungata kavinda gwa kavinda marî hekarûrî.

³² Nîmaaveetwe wîra wa kûmenyerera îgema rîa Ngai-Mûnene na hekarû, na gûtethia athînjîri-Ngai arîa maarî njiarwa cia Aroni wîrarî wa hekarû.