1Maû 22 - ÎVUKU RÎA ÛVORO MWARO

¹ Mûthamaki Daudi nîwacokire akiuga atîrî, “Ava nîvo vagaatumwa hekarû ya Ngai-Mûnene, Ngai, na metha ya kîgongoona nîguo andû a Isiraeli mavîvagîrie matega vo.”

Kûvarîria gûtuma hekarû

² Daudi nîwavecanire watho atî ageni arîa onthe matûûraga vûrûrirî wa Isiraeli magomane vamwe. Nîwavere amwe wîra wa kumia mathiga ma gûtuma hekarû ya Ngai.

³ Daudi nîwarutire cuuma nyîngî mûno nîûndû wa kûrûtha mîcumarî na icûvî cia mîrango, na akîruta gîcango kîngî mûno gîtaarî kîthimi.

⁴ Mbaû cia mîtî ya mîtarakwe nyîngî mûno nîciareterwe Daudi nî andû a Sidoni na Turo.

⁵ Daudi nîwaugire atîrî, “hekarû îrîa mûvîcîwa Solomoni agaatumîra Ngai-Mûnene îkethîrwa îrî nene na nthaka na îkaagîa ngumo nthî yonthe. Nwatî ke nî mwîthî na tîmûmenyu maûndû marîa agîrîrwe nî kûmenya, kwoguo nînie ngûvarîria gûtumwa kwayo.” Nake Daudi nîwaûnganirie indo nyîngî mûno cia gûtuma hekarû mbere ya akua.

⁶ Mûthamaki Daudi nîwacokire agîîta Solomoni na akîmwîra atume hekarû ya Ngai-Mûnene, Ngai wa Isiraeli.

⁷ Daudi nîwerire Solomoni atîrî, “Mûvîcîwa nîrendete gûtuma hekarû ya kûgoocagîra Ngai-Mûnene, Ngai wakwa.

⁸ Nwatî Ngai-Mûnene aambîrire atî nînaûragire andû eengî mûno na nîndûîte mbaara nyîngî mûno. Kwoguo nîûndû wa nthakame îo nyîngî natûmire îtûrûrwa ndikaamûtumîra hekarû.

⁹ Ngai-Mûnene nîwambîrire atî, nîngaagîa na mwana wa kavîcî na akethîrwa arî mûndû wa thayû. Nîakaagîa na thayû kuuma kûrî nthû ciake cionthe irîa ikethîrwa imûthiûrûrûkîrîtie. Rîîtwa rîake ageetagwa Solomoni na nîakaava Isiraeli thayû rîrîa akethîrwa arî mûthamaki.

¹⁰ Nîakaandumîra hekarû. Nîagaatuîka mûvîcîwa nanie nduîke îthe. Nîngaatûma ûthamaki wake ûgîe na vinya na njiarwa ciake nîikaatha Isiraeli tene na tene.

¹¹ “Rîu mûvîcîwa, Ngai-Mûnene, Ngai waku nîekare nawe na arokûvotithia gûtuma hekarû yake wata ûrîa aakwîrîre.

¹² Arokûva ûûgî na ûmenyo nîguo rîrîa agaagûtua mûthamaki wa Isiraeli ûkaathana kûringana na watho wa Ngai-Mûnene, Ngai waku.

¹³ Ethîrwa nîûkaathîkîra mawatho monthe marîa Ngai-Mûnene aaveere Aisiraeli kûvîtûkîra Musa, maûndû maku nîmakaavua. Gîa na vinya, wîyûmîrîrie na ndûgetigîre kana ûgîa na guoya.

¹⁴ Nîmvotete gûcaria indo cia gûtuma hekarû ya Ngai-Mûnene na thîna mwîngî. Nîmbigithîtie makîria ma tani ngiri ithatû na magana mana cia thaavu (3,400), na tani ngiri mîrongo îthatû na inya (34,000) cia sîlûva, gîcango na cuuma itarî nthime nîûndû nî nyîngî mûno. Kûrî na mbaû na mathiga mbigîte, nwatî nwanginya ûgaaciongerera.

¹⁵ Ûrî na aruti wîra eengî. Kûrî na andû a kumia mathiga, mavundi ma mathiga, mavundi ma mbaû na andû eengî na marî ûûgî wa maûndû ma mbaû na andû eengî marî na ûûgî wa maûndû monthe a kûruta wîra

¹⁶ na thaavu, sîlûva, gîcango na cuuma. Ûkîra rîu wambîrîrie wîra, na Ngai-Mûnene ethagîrwe nawe!”

¹⁷ Daudi nîwathire atongoria onthe a Isiraeli matethie mûvîcî Solomoni. Aamerire atîrî,

¹⁸ “Ngai-Mûnene, Ngai wenyu ethîrîtwe namue na nîamûvete thayû mîena yonthe. Nîamvotithîtie kûvoota andû onthe arîa maatûûraga vûrûri ûyû, na rîu vûrûri ûyû ûrî njararî cia Ngai na cia andû ake.

¹⁹ Rîu tungatagîrani Ngai-Mûnene na ngoro yonthe na meciria menyu monthe. Ûkîrani rîu mûtume hekarû ya Ngai-Mûnene, Ngai wenyu, nîguo îthandûkû rîa kîrîkanîro Kîam Ngai-Mûnene na indo irîa ntheru cia Ngai iretwe nyombarî îtumîtwe nîûndû wa Ngai-Mûnene.”