1Maû 21 - ÎVUKU RÎA ÛVORO MWARO

Daudi nîwatarire Aisiraeli

¹ Caitani nîwavangire kûretera andû a Isiraeli thîna na nîwatûmire Daudi atare andû a Isiraeli.

² Kwoguo Daudi nîwerire Joabu na anene acio engî atîrî, “Thiîni mûgatare Aisiraeli, kuuma Beeri-shiba nginya Dani nîûndû nîngwenda kûmenya ûrîa megana.”

³ Nwatî Joabu nîwaugire atîrî, “Ngai-Mûnene arotûma andû a vûrûri ûyû mongerereke maita îgana gûkîra ûrîa megana rîu! Mwathi wakwa mûthamaki, onthe nî ndungata ciaku. Nîkwa ûrenda gwîka ûndû ûyû nîkî mwathi wakwa? Ndûgûtûma andû a Isiraeli mevie?”

⁴ Nwatî mûthamaki Daudi nîwaringîrîrie Joabu eke ûguo aamwathire. Joabu nîwathiîre vûrûri wonthe wa Isiraeli, na arîkia nîwacokire Jerusalemu.

⁵ Joabu nîwanengere Daudi mwîgana wa andû onthe a Isiraeli. Nao maarî: arûme arîa mangîatuîkire athigari a mbaara milioni îmwe na ngiri îgana rîmwe (1,100,000). Nakuo Juda kwarî na arûme ngiri magana mana ma mîrongo mûgwanja (470,000).

⁶ Nwatî Joabu ndaatara andû a mûvîrîga wa Lawi na wa Benjamini nîûndû ndaakena nî ûguo mûthamaki Daudi aamwathîte.

⁷ Nwatî Ngai nîwarakarirue nî ûndû ûcio wekirwe na nîwaverithirie andû a Isiraeli.

⁸ Nake Daudi nîwerire Ngai atîrî, “Nînjîvîtie mûno nîûndû wa ûndû ûyû mbîkîte! Nakûthaitha ûnjovere, nie ndungata yaku nîûndû mbîkîte ûguo nîûndû wa ûrimû.”

⁹ Nake Ngai-Mûnene nîwerire Gadi, mûrathi wa mûthamaki Daudi atîrî,

¹⁰ “Thiî ûkere Daudi atî, nîrî na maûndû mathatû ngûmûva athuure ûmwe gatagatî ka mo na ngeka ûrîa akathuura.”

¹¹ Kwoguo Gadi nîwathiîre kûrî Daudi na nîwamwîrire atîrî, “Ngai-Mûnene augîte wîthuurîre ûndû ûmwe gatagatî ka mama:

¹² mîaka îthatû ya yûra, kana mîeri îthatû ya gûcûkangua nî nthû ciaku kana mîthenya îthatû ya îverithia rîa Ngai-Mûnene na agûtûmîre mîrimû vûrûrirî wonthe na mûraika wa Ngai-Mûnene athiî agîcûkangagia andû vûrûrirî wonthe wa Isiraeli. Rîu mbîra ûrîa ngûcokeria ûrîa ûndûmîte.”

¹³ Daudi nîwacokire akîra Gadi atîrî, “Nie nîrî na thîna mûnene mûno. Nî kava kûverithua nî Ngai-Mûnene nîûndû Ngai-Mûnene arî ntha nyîngî mûno gûkîra kûverithua nî andû.”

¹⁴ Ngai-Mûnene nîwatûmire mûrimû vûrûrirî wa Isiraeli na arûme ngiri mîrongo mûgwanja (70,000) nîmaakwire.

¹⁵ Ngai-Mûnene nîwacokire agîtûma mûraika athiî agacûkangie Jerusalemu. Nwatî nîwericûkirwe na nîwerire mûraika ûrîa wacûkangagia Isiraeli atîrî, “Tiga! Cokia njara yaku!” Mûraika wa Ngai-Mûnene aarûngamîte îtîrirî rîa Orinani ûrîa warî wa kuuma Jebusi.

¹⁶ Daudi nîwonire mûraika wa Ngai-Mûnene arûngamîte rîerarî gatagatî ka nthî na îgûrû agwete rûviû na njara rûrî rûcomore njûrarî na rûkîrîrîtue îgûrû rîa Jerusalemu. Daudi na athuuri, mekîrîte nguo cia macakaya nîmegwîthirie na magîturumithia mothiû mao nthî.

¹⁷ Daudi nîwavoire Ngai akiugaga atîrî, “Nînie naathanire andû magatarwe, nînie nevirie. Andû aya matiîkîte ûndû mûcûku maarûmîrîre ûrîa naugire. Ngai-Mûnene, Ngai wakwa nakûthaitha ûmverithie arî nie vamwe na mûciî wa vava, nwatî ndûkaverithie andû aya.”

¹⁸ Mûraika wa Ngai-Mûnene, nîwacokire akîra Gadi eere Daudi atî nwanginya athiî agatumîre Ngai-Mûnene metha ya kîgongoona îtîrirî rîa Orinani ûrîa wa kuuma Jebusi.

¹⁹ Daudi nîwathîkîre ûrîa Ngai-Mûnene aathire Gadi amwîre.

²⁰ Orinani nîmaavûraga ngano arî na avîcî ake ana vau îtîrirî. Rîrîa anake acio ana moonire mûraika, nîmethithire.

²¹ Orinani ona mûthamaki Daudi aûkîte, nîwaumire vau îtîrirî na nîwenamîrîrie na agîturumithia ûthiû wake nthî vau mbere ya Daudi.

²² Daudi nîwerire Orinani atîrî, “Menderia îtîri rîîrî rîaku nîguo ndumîre Ngai-Mûnene metha ya kîgongoona vo nîguo tûtige kûthirua nî mûrimû na ngakûrîva thogora wonthe.”

²³ Orinani nîwacokire akîra Daudi atîrî, “Oca îtîri rîu na mwathi wakwa mûthamaki eke ûrîa ekwona kwagîrîrîte. Nîngûvecana ndegwa nîûndû wa matega ma kûvîvua na mbaû cia îtîri ituîke ngû. Wana nîngûvecana ngano nîûndû wa matega ma irio. Nîngûkûva cionthe.”

²⁴ Nwatî mûthamaki Daudi nîwerire Orinani atîrî, “Naarî, nîngûkûrîva thogora wonthe. Tîndutîra Ngai-Mûnene matega ma indo ciaku kana matega ma kûvîvua ma indo ndagûrîte.”

²⁵ Mûthamaki Daudi nîwagûrire îtîri rîu kuuma kûrî Orinani na nîwamûnengere mbia cia thaavu magana matandatû (600).

²⁶ Daudi nîwatumire metha ya kîgongoona ya Ngai-Mûnene vau na nîwarutire matega ma kûvîvua na matega ma thayû. Nîwavoire na Ngai-Mûnene nîwamûcokerie mavoya make na njîra ya gûtûma mwaki kuuma îgûrû na ûkînyûrûrûka ûkîvîvia matega mau.

²⁷ Ngai-Mûnene nîwacokire akîatha mûraika acokie rûviû rwake njûrarî, nake nîwathîkire.

²⁸ Rîrîa Daudi oonire atî Ngai-Mûnene nîwacokirie mavoya marîa aavoire arî vau îtîrirî rîa Orinani ûcio Mûjebusi, nîwarutire îgongoona arî vau,

²⁹ nîûndû îgema rîa Ngai-Mûnene, rîrîa rîatumirwe nî Musa arî werûrî wa Gibeoni na metha ya kîgongoona îrîa yavîvagîrua matega yarî Gibeoni kavinda kau.

³⁰ Nwatî Daudi ndangîavotire kûthiî kûvoya Ngai arî îgemarî rîa Ngai-Mûnene, nîûndû nîwetigagîra mûraika wa Ngai-Mûnene na rûviû rwake rwa njûra.