1Maû 20 - ÎVUKU RÎA ÛVORO MWARO

Daudi nîwatavire Raba

¹ Kîambîrîria Kîam mwaka mavinda marîa athamaki maamenyerete kûthiî mbaararî, Joabu nîwatongoririe athigari a mbaara na makîthiî vûrûrirî wa Aamoni na makîûgwata. Nîmaarigicîrie îtûûra rîa Raba makîrîtharîkîra na makîrîcûkangia. Nwatî mûthamaki Daudi eekarîte Jerusalemu.

² Daudi nîwocire ngovia ya ûthamaki kuuma kîongorî Kîam ngai ya Milikomu na nîwamenyire atî ngovia îo yarî ya ûrito ta wa kilo mîrongo îthatû na inya (34). Ngoviarî îo nîkwarî na îthiga rîa thaavu na nîrîekîrirwe ngoviarî ya mûthamaki Daudi. Kuuma îtûûrarî rîu rîa Raba nîmaakuire indo nyîngî mûno irîa maatavire.

³ Nao andû arîa maarutirwe îtûûrarî rîu nîmaatuirwe a kûruta wîra wa mîcumano, macembe, mathanwa na cuuma. Ûguo nwaguo eekire na andû a matûûra mau mengî ma Aamoni. Daudi na andû ake onthe nîmaacokire makîthiî Jerusalemu.

Mbaara gatagatî ka Afilisiti arîa maarî anene mûno

⁴ Vuvarî nîkwagîre mbaara Gazeri gatagatî ka Isiraeli na Afilisiti. Nake Sibekai ûrîa warî kuuma Husha nîwaûragire Sipai, ûmwe wa andû arîa maarî anene mûno a Filisiti. Nao Afilisiti nîmaavootirwe.

⁵ Nîkwagîre mbaara rîngî na Afilisiti. Nake Elihanani mûvîcî wa Jairi nîwaûragire Lahimi mûrwang'ina na Goliathu ûrîa warî wa kuuma Gathu. Mûtî wa îtumû rîa Goliathu wegana ta mûtî mûtungu ûrîa wovagîrîrwa ndigi cia gûtuma nguo.

⁶ Mbaara îngî nîyagîre kuo Gathu vîndî kwarî na mûndû mûnene mûno warî na njara yarî na ciara ithathatû wa njara. Namo magûrû, wa kûgûrû kwarî na ciara ithathatû. Cionthe ciarî ciara mîrongo îîrî na inya (24) na aarî wa njiarwa cia andû a tene arîa maarî anene mûno.

⁷ Rîrîa aaririe ûndû ûtaarî mwaro wîgiî andû a Isiraeli, Jonathani mûvîcî wa Shimea mûrwang'ina na Daudi nîwamûragire.

⁸ Andû acio maarî njiarwa cia andû arîa maarî anene mûno a kuuma Gathu, maaûragirwe nî Daudi na ndungata ciake.