1Maû 18 - ÎVUKU RÎA ÛVORO MWARO

Daudi nîwavootanire mbaararî

¹ Vuvarî mûthamaki Daudi nîwatharîkîre Afilisiti na akîmavoota. Nîwatavire îtûûra rîa Gathu na icagi irîa ciarîthiûrûrûkîrîtie.

² Nîwacokire akîvoota Amoabu na magîtuîka ndungata ciake na marîvage gooti yao kûrî mûthamaki Daudi.

³ Daudi nîwatharîkîre mûthamaki Hadadezeri wa Zoba vakuvî na vûrûri wa Hamathi. Vîndî îo Hadadezeri aageragia kûnenevia ûthamaki wake ûkinye mwena wa îgûrû wa rûnjî rwa Farati.

⁴ Daudi nîwatavire ikaari ciake cia mbaara ngiri îmwe (1,000), athigari ngiri mûgwanja (7,000) arîa maathiîcaga matwîte mbarathi na athigari ngiri mîrongo îîrî (20,000) arîa maathiîcaga na magûrû. Daudi nîwaigire mbarathi cia kwîgana gûkururia ikaari îgana rîmwe (100), nwatî nîwatinirie icio ciîngî mîkiva ya magûrû ma vuva.

⁵ Rîrîa athigari a Sîria a kuuma Damesiki maathiîre gûtethia mûthamaki Hadadezeri wa Zoba, Daudi nîwamatharîkîre na nîwaûragire athigari ngiri mîrongo îîrî na igîrî (22,000) a Sîria.

⁶ Mûthamaki Daudi nîwacokire akîamba magema ma athigari ake Sîria. Nao andû a Sîria nîmaatuîkire ndungata cia Daudi na nîmaarîvaga gooti kûrî ke. Nake Ngai-Mûnene nîwatûmire Daudi avootane kûrîa kuonthe aathiîcaga.

⁷ Daudi nîwatavire ngo cia thaavu cionthe irîa ciakuuagwa nî anene a Hadadezeri na nîwaivirire Jerusalemu.

⁸ Kuuma îtûûrarî rîa Tibuhathi na rîa Kuni, matûûra marîa maathagwa nî Hadadezeri, Daudi nîwatavire gîcango kîngî mûno. Gîcango kîu nîkîo Solomoni aavûthîre gûtuma îtangi (rîrîa rîetagwa Îria), itugî na indo cia hekarû.

⁹ Rîrîa Mûthamaki Tou wa Hamathi eegwire atî mûthamaki Daudi nîwavootete athigari onthe a Hadadezeri mûthamaki wa Zoba,

¹⁰ Tou nîwatûmire mûvîcî Hadoramu athiî kûrî Daudi amûvirîre ngethi na amûcokerie ngatho nîûndû wa kûvoota Hadadezeri. Mûthamaki Tou na Hadadezeri nîmaarûîte mbaara maita meengî. Kwoguo Tou nîwatûmanire Daudi avirîrwe indo nyîngî ciarûthîtwe na thaavu, sîlûva na gîcango.

¹¹ Mûthamaki Daudi nîwamûrire indo icio ituîke cia Ngai-Mûnene. Aaciamûrire irî vamwe na sîlûva na thaavu îrîa aarutîte mavûrûrirî marîa aavootete. Mavûrûri mau nî: Edomu, Moabu, Aamoni, Filisiti na Amaleki.

¹² Abishai mûvîcî wa Zeruia nîwavootire andû a Edomu na akîûraga athigari ngiri îkûmi na inyanya (18,000) marî Kîamndarî Kîam cumbî.

¹³ Mûthamaki Daudi nîwatumire ciîkaro cia athigari kûu Edomu na andû akuo onthe nîmaatuîkire ndungata ciake. Ngai-Mûnene nîwatûmaga Daudi avootane kûrîa kuonthe aathiîcaga.

¹⁴ Kwoguo Daudi aarî mûthamaki wa vûrûri wonthe wa Isiraeli na nîwathaga andû onthe waro na kîvooto.

¹⁵ Nake Joabu mûvîcî wa Zeruia nîke warî mûnene wa athigari a mbaara. Jehoshafati mûvîcî wa Ahiludi aarî mûmenyereri wa mandîko.

¹⁶ Zadoku mûvîcî wa Ahitubu na Ahimeleku mûvîcî wa Abiatha maarî athînjîri-Ngai, na Shavusha aarî karani wa gooti.

¹⁷ Benaia mûvîcî wa Jehoiada aarî mûnene wa Kerethi na Pelethi athigari arîa maarangagîra mûthamaki. Avîcî a Daudi maarî anene ûthamakirî wake.