1Maû 17 - ÎVUKU RÎA ÛVORO MWARO

Ndûmîrîri ya Nathani kûrî Daudi

¹ Mûthamaki Daudi arî gwake nyomba nîwerire mûrathi Nathani atîrî, “Taroria, nie ndûûraga nyomba îtumîtwe na mîtarakwe, nwatî îthandûkû rîa kîrîkanîro Kîam Ngai-Mûnene rigîtwe îgemarî.”

² Nake Nathani nîwerire Daudi atîrî, “Rûtha ûrîa wonthe ûrî ngororî yaku, nîûndû Ngai arî vamwe nawe.”

³ Nwatî ûtukû wa mûthenya ûcio Ngai-Mûnene nîwerire Nathani atîrî,

⁴ “Thiî kûrî ndungata yakwa Daudi ûmwîre atîrî, ‘We tîwe ûkûndumîra hekarû îrîa ngatûûraga.

⁵ Kuuma kavinda karîa naarutire andû a Isiraeli Misiri nginya ûmûnthî, ndianatûûra nyombarî îtumîtwe na mîtarakwe. Mbîthîrîtwe ngîthama kuuma îgemarî rîmwe kûthiî rîngî. Na kuuma gîkaro kîmwe kûthiî kîngî.

⁶ Kûndû kûu kuonthe mbîthîrîtwe ngîthiîcania na andû a Isiraeli ndianaûria mûtongoria wanarî ûmwe wa arîa nathuurire nîndûî Kîamgiririe mandumîra nyomba ya mîtarakwe.’

⁷ “Kwoguo îra ndungata yakwa Daudi atî, Nie Ngai-Mûnene mwene vinya wonthe nakûrutire kûrîa warîthagia ng'ondu mîgûndarî na ngîgûtua wa kwatha andû akwa a Isiraeli.

⁸ Nîrethagîrwa nawe kûrîa kuonthe ûrathiîcaga na nîravootaga nthû ciaku cionthe wa ûrîa ûrathiîcaga na mbere, na nîngaagûtua mûndû ûrî na îgweta wata atongoria arîa anene a nthî.

⁹ Nîngaathuurîra andû akwa a Isiraeli kûndû na nîngaatûma matûûrage kuo kûrî kwao, marî na thayû na matakûvinyîrîrua nî mûndû rîngî ta ûrîa matûûraga mbererî.

¹⁰ Kuuma kavinda karîa naathuurire atirîrîri vûrûri a gûtongoria andû akwa a Isiraeli nîneranîre nîngavoota nthû cienyu cionthe na nîngaava njiarwa cienyu kûndû gwa gûtûûra.

¹¹ Rîrîa mûgaakua na mûthikwe, nîngaatua ûmwe wa avîcî aku mûthamaki na ndûme ûthamaki wake ûgîe vinya.

¹² Nîke ûkaandumîra hekarû na nîngaatûma ûthamaki wake ûtûûre tene na tene.

¹³ Nîngaatuîka îthe, nake atuîke mûvîcîwa. Ndikaathiria wendo wakwa ûtathiraga kûrî ke ta ûrîa nekire kûrî ûrîa warî mbere yaku.

¹⁴ Nîngaamûtua mûrûngamîrîri wa nyomba yakwa na mûrûngamîrîri wa ûthamaki wakwa nginya tene na tene na ûthamaki wake ndûkaathira.”

¹⁵ Nake Nathani nîwerire Daudi maûndû monthe wata ûrîa oonirue kîoneki nî Ngai.

Îvoya rîa Daudi rîa gûcokia Ngatho

¹⁶ Mûthamaki Daudi nîwacokire akîthiî îgemarî rîa Ngai-Mûnene, agîkara nthî na akiuga atîrî, “Nie nîrî û Ngai-Mûnene, Ngai. Mûciî wakwa nî ndûî nîguo ûnginyîrie maûndû mama monthe?

¹⁷ Makîria ma ûguo nîûmbîkîte maûndû manene makîria, nîûndû nîwîrîrîte njiarwa ciakwa maûndû ma mîaka îrîa îgaaûka. We Ngai-Mûnene Ngai nîûnduîte ta mûndû ûrî na vata mûno.

¹⁸ Nie Daudi ndungata yaku nîngiuga atîa makîria. We nîûmbicî na nîûmvete gîtîîo.

¹⁹ We Ngai-Mûnene, wîkîte ndungata yaku maûndû mama monthe kûringana na wendi waku we mwene, nîguo maûndû mau monthe mamenyekane.

²⁰ Ngai-Mûnene, gûtirî wîngî tawe na nîtwîguîte na matû metû na tûkamenya gûtirî Ngai wîngî tiga we.

²¹ Nî rûrîrî rwîngî rûrîkû nthî yonthe rûngîringithanua na andû a Isiraeli, arîa Ngai aathiîre gûkûûra nîguo matuîke andû ake? Maûndû manene na magegania marîa wamarûthîre nîmaatûmire ûgîa na rîîtwa rîrî na îgweta, rîrîa wavinyûririe ndûrîrî irîa ciarî mbere ya andû aku arîa warutire Misiri.

²² Ngai-Mûnene, we nîûtuîte Isiraeli andû aku tene na tene na nîûtuîkîte Ngai wao.

²³ “Ngai-Mûnene tûma maûndû marîa waririe megiî ndungata yaku na megiî nyomba yake mavinge tene na tene, na wîke wata ûrîa waugire nî ûgeeka.

²⁴ Ngumo yaku îkeethîrwa îrî nene na andû nîmagaatûûra tene na tene makiugaga, ‘Ngai-Mûnene mwene vinya wonthe, nîke Ngai wa Isiraeli.’ Nayo nyomba ya ndungata yaku Daudi nîîtûûra îîvandîte tene na tene.

²⁵ Ngai wakwa, nîûmenyithîtie nie ndungata yaku atî nîûgaatûma andû a nyomba yakwa matuîke athamaki. Kwoguo nîrî na ûmîrîru wa gûkûvoya nîrî mbere yaku.

²⁶ Ngai-Mûnene, we nîwe Ngai na nîwîrîrîte ndungata yaku ûndû ûyû mwaro.

²⁷ Kwoguo nîngûkûria ûrathime andû a nyomba ya ndungata yaku nîguo matûûre mbere yaku tene na tene, nîûndû we Ngai-Mûnene arîa magûkenagia kîrathimo gîaku gîtûûraga kûrî o tene na tene.”