1Maû 16 - ÎVUKU RÎA ÛVORO MWARO

¹ Andû arîa maakuuîte îthandûkû rîa kîrîkanîro Kîam Ngai-Mûnene, nîmaarîtonyirie îgemarî rîrîa Daudi aarîtumîrîte. Nîmaacokire makîrutîra Ngai matega ma kûvîvua na matega ma thayû.

² Rîrîa Daudi aarîkirie kûruta matega ma kûvîvua na matega ma thayû, nîwarathimire andû rîîtwarî rîa Ngai-Mûnene

³ na nîwagaîre andû onthe a Isiraeli aka na arûme, wa mûndû mûgate, gîcunjî Kîam nyama îrî mbokie na tûmîgate twa thavibu.

⁴ Daudi nîwathuurire Alawi amwe na akîmava wîra wa gûtongoria kûgooca Ngai-Mûnene, gûcokia ngatho na kwina nyîmbo cia gûkumia Ngai-Mûnene, Ngai wa Isiraeli marî mbere ya îthandûkû rîa kîrîkanîro.

⁵ Asafu ûrîa waringithanagia ithaani irîa igambaga nîke wathuurirwe arî mûtongoria, nake Zekaria nîke wamûtethagia. Nao Jeieli, Shemirathothi, Jehieli, Matithia, Eliabu, Benaia, Obedi-edomu na Jeieli nîo maavûraga ngita na mîtûrirû.

⁶ Athînjîri-Ngai aîrî, Benaia na Jahazieli nîo maarî a kûvuva tûrumbeta vîndî cionthe marî mbere ya îthandûkû rîa kîrîkanîro Kîam Ngai.

⁷ Vîndî îo nîrîo Daudi aathuurire Asafu na andû ao na akîmava wîra wa kwina nyîmbo cia gûkumia Ngai-Mûnene.

Rwîmbo rwa gûkumia Ngai-Mûnene

⁸ Cokiani ngatho kûrî Ngai-Mûnene, mwanîrîre ûnene wake, menyithiani andû maûndû marîa ekîte.

⁹ Inani nyîmbo cia gûkumia Ngai-Mûnene, menyithaniani maûndû make ma magegania!

¹⁰ Kenani nîûndû mûrî ake, arîa onthe mamûgoocaga nîmacanjamûke!

¹¹ Cariani Ngai-Mûnene nîguo amûtethie, na mûmûgoocage vîndî cionthe!

¹² Ririkanani maûndû ma magegania marîa ekîte, na ûvoro wake wa gûtucanîra ciira.

¹³ Mue njiarwa cia Iburahimu ndungata yake, avîcî a Jakovu arîa Ngai aathuurire.

¹⁴ Ngai-Mûnene nîke Ngai wetû, maathani make mecûrîte nthî yonthe.

¹⁵ Nîaririkanaga kîrîkanîro gîake tene na tene, kîrîa aathanire kûrî njiarwa na njiarwa.

¹⁶ Kîrîkanîro kîrîa aarîkanîre na Iburahimu, kîîranîro kîrîa erîîre Isaka na mwîvîtwa.

¹⁷ Ngai-Mûnene nîwarûthire kîrîkanîro na Jakovu, nîwarûthire kîrîkanîro gîa gûtûûra tene na tene.

¹⁸ Aaugire atîrî, “We nîngaakûva vûrûri wa Kanaani, vûrûri ûcio nîûgaatuîka îgai rîaku.”

¹⁹ Vîndî îo andû a Ngai matiarî eengî, maarî ageni vûrûrirî wa Kanaani.

²⁰ Maaûrûraga kuuma vûrûrirî ûmwe kûthiî wîngî, kuuma ûthamakirî ûmwe kûthiî ûrîa wîngî.

²¹ Nwatî Ngai ndetîkîria wana ûrîkû amavinyîrîrie, nîwakaanirie athamaki matikameke ûndû.

²² Aamerire atîrî, “Mûtikavutie andû aya nînîmathurîte mûtigeke arathi akwa ûndû mûcûku!”

²³ Nthî yonthe inîrani Ngai-Mûnene! Mîthenya yonthe aragiani ûvoro wa ûvonokania wake.

²⁴ Anîrîrani ûvoro wa riiri wake kûrî ndûrîrî cionthe, andû onthe nîmerwe maûndû make ma magegania!

²⁵ Ngai-Mûnene nî mûnene na nîwagîrîrwe nî gûkumua mûno, nîwagîrîrwe nî kûvewa gîtîîo gûkîra ngai cionthe.

²⁶ Nîûndû ngai cia ndûrîrî icio ciîngî nî mîvuanano, nwatî Ngai-Mûnene nîke waûmbire îgûrû.

²⁷ Ngumo na ûnene nîimûthiûrûrûkîrîtie, vinya na gîkeno ciîcûrîte hekarûrî yake.

²⁸ Kumiani Ngai-Mûnene andû onthe a nthî, kumiani riiri na ûvoti wake.

²⁹ Kumiani rîîtwa rîa Ngai-Mûnene rîrîa rîrî riiri, reteni matega na mûke mbere yake. Goocani Ngai-Mûnene arî varîa vatheru.

³⁰ Andû onthe a nthî nîmainaine marî mbere yake! Aigîte nthî vandû vekindîru na ndînginaina.

³¹ Îgûrû nîrîkene na nthî îcanjamûke! Îrani ndûrîrî atî Ngai-Mûnene nî mûthamaki.

³² Îria na indo cionthe irîa itûûraga kuo nîirurume, mîgûnda na indo cionthe irîa irî kuo nîicanjamûke!

³³ Mîtî ya kîthaka nîkaaina îcanjamûke îrî mbere ya Ngai-Mûnene, nîûndû Ngai-Mûnene nî agaaûka gûtuîra nthî ciira.

³⁴ Cokeriani Ngai-Mûnene ngatho nîûndû ke nî mwaro, wendo wake ûtathiraga ûtûûraga tene na tene.

³⁵ Mwîreni, “Tûvonokie we Ngai wa ûvonokio wetû, tûgomanie vamwe na ûtûvonokie kuuma kûrî ndûrîrî, nîguo tûvote gûcokeria rîîtwa rîaku rîtheru ngatho tûkenete.

³⁶ Ngai-Mûnene, Ngai wa Isiraeli, Nîakumue! Nîakumue nginya tene na tene.” Andû onthe nîmaacokire makiuga, “Ameni,” na nîmaakumirie Ngai-Mûnene.

Andû nîmaagoocire Ngai marî Jerusalemu na Gibeoni

³⁷ Mûthamaki Daudi nîwatwire Asafu na andû ao Alawi a kûmenyagîrîra wa mûthenya wa mûthenya ûgooci Ngai mbere ya îthandûkû rîa kîrîkanîro Kîam Ngai-Mûnene ta ûrîa kwagîrîrîte,

³⁸ magîtethagîrîrua nî Obedi-edomu na Alawi engî mîrongo îtandatû na anana (68) a mbarî yao. Nake Obedi-edomu mûvîcî wa Jeduthuni, na Hosa nîo maarî arangîri.

³⁹ Daudi nîwatigire Zadoku mûthînjîri-Ngai na athînjîri-Ngai acio engî matungatagîre Ngai-Mûnene kûu Gibeoni varîa Ngai-Mûnene aagoocagîrwa.

⁴⁰ Mûthenya wa mûthenya nîmaarutaga matega ma kûvîvua, na kîraûko na kîvwaî nîmaavîvagîria matega mau metharî ya kîgongoona wata ûrîa kwandîkîtwe wathorî wa Ngai-Mûnene ûrîa aathire andû a Isiraeli.

⁴¹ Maarî vamwe na Hemani, Jeduthuni na andû engî arîa maathuurîtwe marî a kwina nyîmbo cia gûkumia Ngai-Mûnene nîûndû wendo wake ûtathiraga nîûtûûra tene na tene.

⁴² Hemani na Jeduthuni maarî na wîra wa kûvuva tûrumbeta, kûringithania ithaani, na indo ciîngî irîa ciavûthagîrwa vîndî ya kwina nyîmbo cia gûkumia Ngai-Mûnene. Avîcî a Jeduthuni nîmaathuurirwe matuîke arangîri.

⁴³ Andû onthe nîmaacokire makînûka wa mûndû gwake mûciî wana Daudi nîwenûkire gwake mûciî nîguo akarathime andû a nyomba yake.