1Maû 15 - ÎVUKU RÎA ÛVORO MWARO

Îthandûkû rîa kîrîkanîro nîrîavirirwe Jerusalemu

¹ Daudi nîwatumire nyomba ciake îtûûrarî rîa Daudi. Nîwacokire akîrûtha vandû va kwiga îthandûkû rîa kîrîkanîro Kîam Ngai na agîtuma îgema rîarîo.

² Nake nîwaugire atîrî, “Gûtirî andû engî metîkîrîtue gûkuua îthandûkû rîa kîrîkanîro tiga Alawi onga, nîûndû nîo Ngai-Mûnene aathuurire marîkuage na mamûtungatagîre tene na tene.”

³ Daudi nîwagomanirie andû onthe a Isiraeli kûu Jerusalemu nîguo mavire îthandûkû rîa kîrîkanîro Kîam Ngai-Mûnene varîa aarîtumîrîte.

⁴ Nîwacokire akîgomanithia vamwe njiarwa cia Aroni na cia Alawi.

⁵ Kuuma mbarî ya Kohathu nîmaagomanire andû îgana rîa mîrongo îîrî (120), na Urieli nîke warî mûnene wao.

⁶ Kuuma mbarî ya Merari nîmaagomanire andû magana maîrî ma mîrongo îîrî (220), na Asaia nîke warî mûnene wao.

⁷ Kuuma mbarî ya Gerishomu nîmaagomanire andû îgana rîa mîrongo îthatû (130), na Joeli nîke warî mûnene wao.

⁸ Kuuma mbarî ya Elizafani nîmaagomanire andû magana maîrî (200), Shemaia nîke warî mûnene wao.

⁹ Kuuma mbarî ya Heburoni nîmaagomanire andû mîrongo înana (80), Elieli nîke warî mûnene wao.

¹⁰ Kuuma mbarî ya Uzieli, nîmaagomanire andû îgana rîa îkûmi na aîrî (112), Aminadabu nîke warî mûnene wao.

¹¹ Daudi nîwacokire agîtûmanîra athînjîri-Ngai Zadoku na Abiatha, na Alawi atandatû: Urieli, Asaia, Joeli, Shemaia, Elieli, na Aminadabu.

¹² Nake nîwamerire atîrî, “Mue mûrî anene a mbarî cia Alawi. Îtherieni na mûtherie andû enyu nîguo mûvote kûreta îthandûkû rîa kîrîkanîro Kîam Ngai-Mûnene, Ngai wa Isiraeli rîvirwe vandû varîa nîrîvarîrîtie.

¹³ Ngai-Mûnene, Ngai wetû nîwatûverithirie nîûndû tûtiarîkuua vîndî ya mbere na tûtiarîmenyarera ta ûrîa aathanîte.”

¹⁴ Kwoguo athînjîri-Ngai na Alawi nîmeetheririe nîguo makuue îthandûkû rîa kîrîkanîro Kîam Ngai-Mûnene, Ngai wa Isiraeli.

¹⁵ Alawi nîmaakuuire îthandûkû rîa kîrîkanîro Kîam Ngai. Maavûthîre mîtî kûrîkuua na ituro wata ûrîa Ngai-Mûnene aathanîte na njîra ya Musa.

¹⁶ Nîwathire anene a Alawi mathuure andû amwe ao a kwina makîvûraga indo ta ngita na ithaani irîa iringithanagua nîguo maine nyîmbo na gîkeno maugîrîrîtie.

¹⁷ Kwoguo Alawi nîmaathuurire Hemani mûvîcî wa Joeli, na andû ao Asafu mûvîcî wa Berekia, na Ethani mûvîcî wa Kushaia a kuuma mûvîrîgarî wa Merari.

¹⁸ Kwarî na gîkundi gîa kaîrî Kîam Alawi, nao nî: Zekaria, Jaazieli, Shamiramothi, Jehieli, Uni, Eliabu, Benaia, Maaseia, Matithia, Elifelehu, Mikineia na arangîri a ivingo, Obedi-edomu na Jeieli.

¹⁹ Aini ta Hemani, Asafu na Ethani maarî a kûgambithia ithaani irîa iringithanagua cia gîcango.

²⁰ Zekaria, Azieli, Shemiramothi, Jehieli, Uni, Eliabu, Maaseia, na Benaia maavûraga ngita irîa irî mûgambo wa Aramothi.

²¹ Nwatî Matithia, Elifelehu, Mikineia, Azazia, Obedi-edomu, na Jeieli maavûraga ngita irîa irî mûgambo Sheminithi.

²² Kenania, mûnene wa Alawi nîwathuurirwe atuîke mûtongoria wa nyîmbo nîûndû ke nîwaicî ûvoro wîgiî nyîmbo.

²³ Berekia, Elikana, marî vamwe na Obedi-edomu na Jehia, maarî arangîri a îthandûkû rîa Kîrîkanîro.

²⁴ Nao athînjîri-Ngai, Shebania, Joshafati, Nethanieli, Amasai, Zekaria, Benaia na Eliezeri nîmaathuurirwe matuîke a kûvuva tûrumbeta marî mbere ya îthandûkû rîa kîrîkanîro. Obedi-edomu na Jehia wanao maarî arangîri a îthandûkû rîa kîrîkanîro.

Îthandûkû rîa kîrîkanîro nîrîavirirwe Jerusalemu

²⁵ Mûthamaki Daudi, atongoria a Isiraeli na anene a athigari a mbaara nîmaathiîre makenete nyomba kwa Obedi-edomu kûgîra îthandûkû rîa kîrîkanîro Kîam Ngai-Mûnene.

²⁶ Nao nîmaarutire îgongoona rîa ndegwa mûgwanja na ndûrûme nîûndû Ngai nîwatethirie Alawi arîa maakuuire îthandûkû rîa kîrîkanîro Kîam Ngai-Mûnene.

²⁷ Daudi nîwekîrîte nguo ndaca yatumîtwe na gîtambaa Kîamro na agekîra efodi ya gîtambaa Kîamro. Aini a nyîmbo na Kenania mûtongoria wao wanao nîmeekîrîte nguo ndaca ciatumîtwe na gîtambaa Kîamro.

²⁸ Kwoguo andû onthe a Isiraeli nîmaavirire îthandûkû rîa kîrîkanîro Kîam Ngai-Mûnene Jerusalemu. Maathiîre makiugagîrîria nîûndû wa gîkeno na nîmaavuvaga tûrumbeta, coro, makîringithanagia ithaani, makinaga nyîmbo na ngita.

²⁹ Rîrîa îthandûkû rîa kîrîkanîro Kîam Ngai-Mûnene rîatonyaga îtûûrarî rînene rîa Daudi, Mikali mwarî wa Saûlo nîwaroretie arî ndiricarî ya nyomba. Rîrîa oonire mûthamaki Daudi akîinia arî na gîkeno nîwamûnyararire.