1Maû 14 - ÎVUKU RÎA ÛVORO MWARO

Mawîra ma Daudi arî Jerusalemu

¹ Mûthamaki Hiramu wa Turo nîwatûmire anjaama kûrî Daudi, na agîtûma mîtî ya mîtarakwe, mavundi ma gûtuma na mathiga na mavundi ma mbaû nîguo magatumîre Daudi nyomba.

² Nake Daudi nîwamenyire atî Ngai-Mûnene nîwamûtuîte mûthamaki wa Isiraeli na ûthamaki wake nîwathiîcaga ûkînenevaga nîûndû Ngai-Mûnene nîwendete andû ake.

³ Daudi arî Jerusalemu nîwavikirie aka eengî na agîciara avîcî eengî na erîtu eengî.

⁴ Mama nîmo marîîtwa ma ciana irîa aaciarire arî kûu Jerusalemu: Shamua, Shobabu, Nathani, Solomoni,

⁵ Ibuhari, Elishua, Elipeleti,

⁶ Noga, Nefegi, Jafia

⁷ Elishama, Beeliada na Elifeleti

Daudi nîwavootire Afilisiti

⁸ Rîrîa Afilisiti meegwire atî Daudi nîwetîrîrîtue maguta na agîtuîka mûthamaki wa vûrûri wonthe wa Isiraeli, Afilisiti onthe nîmaathiîre kûmûcaria. Rîrîa Daudi eegwire ûguo nîwathiîre kûmatûnga nîguo marûe.

⁹ Afilisiti nîmaakinyire Kîamndarî Kîam Refaimu na nîmaambîrîrie gûcuuna andû indo ciao.

¹⁰ Nake Daudi nîwaûririe Ngai atîrî, “Nthiî ngarûe na Afilisiti? Nîûkûndethia kûmavoota?” Nake Ngai-Mûnene nîwamwîrire atîrî, “Thiî nîngûmanenganîra kûrî mue.”

¹¹ Kwoguo Daudi nîwathiîre Baali Perazimu akîmatharîkîra na akîmavoota. Nîwacokire akiuga atîrî, “Ngai nîavîtûkîrîrîte gatagatî ka nthû ciakwa na njîra ya njara yakwa ta ûrîa mwîcûro wa manjî ûthiîcaga na vinya.” Kwoguo vandû vau vetagwa Baali Perazimu.

¹² Andû a Afilisiti nîmaaûrire na magîtiga ngai ciao kûu, nake Daudi akîvecana watho ivîvue.

¹³ Kavinda kanini kathira Afilisiti nîmaacokire Kîamndarî na makîambîrîria gûcuuna andû indo rîngî.

¹⁴ Wa rîngî Daudi nîwaûririe ûtaaro kûrî Ngai, nake Ngai nîwamwîrire atîrî, “Ndûkatharîkîre Afilisiti kuuma ava. Thiûrûrûka ûkamatharîkîre na mwena ûrîa wîngî mîtîrî ya mîkûngûgû.

¹⁵ Rîrîa ûkegua mûgambo ta wa andû mathiîte marî îgûrû rîa mîtî ya mîkûngûgû ûkaamatharîkîra, nîûndû nî Nie Ngai ngethîrwa nthiîte mbere yenyu kûvoota athigari a Afilisiti.”

¹⁶ Daudi nîwekire wata ûrîa Ngai aamwathire eke. Nao nîmaavootire athigari a Afilisiti na makîmavinyûria kuuma Gibeoni nginya Gezeri.

¹⁷ Nayo ngumo ya Daudi nîyatambire vûrûrirî wonthe na Ngai-Mûnene agîtûma andû onthe mamwîtigîre.