1Maû 13 - ÎVUKU RÎA ÛVORO MWARO

Îthandûkû rîa kîrîkanîro nîrîarutirwe Kiriathi-jearimu

¹ Daudi nîwaranîrie na anene a athigari ngiri, îgana na mûndû wa wonthe warî mûtongoria.

² Nîwacokire akîra andû onthe a Isiraeli arîa maagomanîte atîrî, “Ethîrwa nîmûkwona kwagîrîrîte na wîthîrwe nîguo wendi wa Ngai-Mûnene, Ngai wetû, tigani tûtûme anjaama kûrî andû etû arîa engî marî vûrûrirî wonthe wa Isiraeli. Na tûtûme anjaama kûrî athînjîri-Ngai na Alawi arîa marî matûûrarî marîa marî na kûndû gwa kûrîthua tûgomane vamwe.

³ Tûcoke tûthiî tûgîre îthandûkû rîa kîrîkanîro Kîam Ngai wetû rîcoke kûrî tue. Nîûndû nîtwarîtiganîrie vîndî îrîa Saûlo aarî mûthamaki.”

⁴ Andû onthe nîmeetîkanirie na Daudi nîûndû nîmoonire ûguo arî guo kwagîrîrîte.

⁵ Kwoguo Daudi nîwagomanirie andû onthe a Isiraeli kuuma Shihori mûvakarî wa Misiri nginya mwanyarî wa Hamathi. Andû acio maagomire nîguo mathiî magîre îthandûkû rîa kîrîkanîro Kîam Ngai kuuma Kiriathi-jearimu.

⁶ Daudi na andû onthe a Isiraeli nîmaaunûkirie na makîthiî Baala na nîkuo Kiriathi-jearimu vûrûrirî wa Juda nîguo magîre îthandûkû rîa kîrîkanîro Kîam Ngai. Îthandûkû rîu nîrîo rîrî na rîîtwa rîa Ngai-Mûnene ûrîa wîkaragîra gîtî Kîam Ûthamaki na arî mûnene kûrî Akerubi.

⁷ Nao nîmaakuire îthandûkû rîa kîrîkanîro Kîam Ngai na gîkaari Kîam ng'ombe kuuma nyombarî ya Abinadabu. Uza na Ahio nîo maatwarithagia gîkaari.

⁸ Daudi na andû onthe nîmeinagia na vinya wao wonthe magîkumagia Ngai. Nîmaainaga makîvûraga indo cia kwina ta ngita, ndarama, ithaani irîa iringithanagua na tûrumbeta.

⁹ Vîndî îrîa maakinyire varîa vaavûragîrwa ngano kûu Kidoni, ndegwa nîciavîngirwe. Uza nîwakûnjûrire njara yake na akînyitîrîra îthandûkû rîa kîrîkanîro.

¹⁰ Wa rîmwe Ngai-Mûnene nîwarakarire nî Uza nîûndû nîwanyitire îthandûkû rîa kîrîkanîro. Kwoguo Ngai-Mûnene nîwamûragire na agîkua arî vau mbere yake.

¹¹ Daudi nîwarakarire nîûndû Ngai-Mûnene nîwaverithirie Uza na marakara. Vandû vau vetagwa Perezi-uza nginya ûmûnthî.

¹² Mûthenya ûcio Daudi nîwetigîre Ngai na akiuga atîrî, “Nîngîthiî na îthandûkû rîa kîrîkanîro Kîam Ngai gwakwa mûciî atîa?”

¹³ Kwoguo Daudi ndaavira îthandûkû rîa kîrîkanîro îtûûrarî rîa Daudi. Vandû va ûguo, aarîvirire nyomba kwa Obed-edomu mûndû wa kuuma Gathu.

¹⁴ Îthandûkû rîu rîa kîrîkanîro nîrîekarire mûciî kwa Obedi-edomu îvinda rîa mîeri îthatû. Nake Ngai-Mûnene nîwarathimire mûciî wake vamwe na indo ciake cionthe.