1Maû 12 - ÎVUKU RÎA ÛVORO MWARO

Arûmîrîri a Daudi a mbere kuuma mûvîrîgarî wa Benjamini

¹ Ûyû nî mûtaratara wa arûme arîa maathiîre Zikilagi kûrî Daudi kûrîa eethithîte nîûndû wa Saûlo mûvîcî wa Kishu. Maarî amwe a njamba cia mbaara irîa ciatethirie Daudi mbaararî.

² Nîmaicî gûtûmîra ûta na nîmangîakagia mîguî na magaikia mathiga na gîkûtha na njara ya ûrîo kana ya ûmotho. Arûme acio maarî a kuuma mûvîrîgarî wa Benjamini na maarî a mbarî ya Saûlo.

³ Mûtongoria wao etagwa Ahiezeri na aatethagîrîrua nî mûrwang'ina Joashi. Oîrî maarî avîcî a Shema kuuma Gibea. Jezieli na Peleti avîcî a Azimavethi, Beraka na Jehu kuuma Anathothi,

⁴ Ishumaia wa kuuma Gibeoni, njamba yarî vinya ya arîa mîrongo îthatû na warî mûtongoria wao, Jeremia, Jahazieli, Johanani, na Jozabadi kuuma Gedera,

⁵ Eluzai, Jerimothi, Bealia, Shemaria, Shefatia kuuma Harifu,

⁶ Elikana, Ishia, Azareli, Joezeri na Jashobeamu wa mûvîrîga wa Kora,

⁷ Joela na Zebadia avîcî a Jerohamu kuuma Gedori.

Arûmîrîri a Daudi kuuma mûvîrîgarî wa Gadi

⁸ Mûvîrîgarî wa Gadi nîkwaumire arûme njamba na maarî na ûûgî mwîngî wa mbaara na nîmaathiîre kûrî Daudi werûrî varîa varî vagitîre mûno. Andû acio nîmaaicî mûno gûtûmîra ngo na matumû. Maaganîte ta mînyambû na maarî îvenya ta nthiia irîmarî.

⁹ Maavangîtwe marûmanîrîrîte ta û: Ezeri, na nîke warî mûtongoria wao, Obadia, Eliabu,

¹⁰ Mishumana, Jeremia,

¹¹ Atai, Elieli,

¹² Johanani, Elizabadi,

¹³ Jeremia, na Makibanai.

¹⁴ Andû a kuuma mûvîrîgarî wa Gadi marî anene a mbaara. Ûrîa warî mûnini aarî mûnene wa athigari îgana, nake ûrîa warî mûnene mûno aarî mûnene wa athigari ngiri îmwe.

¹⁵ Mwerirî wa mbere wa mwaka, rîrîa rûnjî rwa Jorodani rwîcûraga andû aya nîmaaringire rûnjî na makîngata andû arîa maatûûraga ciandarî na andû acio makînyaganîria mîenarî ya îrathîro na îthûîro rîa rûnjî rwa Jorodani.

Arûmîrîri a Daudi kuuma mûvîrîgarî wa Benjamini na wa Juda

¹⁶ Vîndî îmwe arûme kuuma mûvîrîgarî wa Benjamini na wa Juda nîmaathiîre kûrî Daudi arî varîa vagitîre mûno.

¹⁷ Daudi nîwathiîre kûmatûnga na akîmera atîrî, “Ethîrwa mûkîte na thayû nîguo mûndethie, nîtûkûnyitanîra namue. Nwatî ethîrwa mûkîte mûngunyanîre kûrî nthû ciakwa na gûtirî mûndû wana ûrîkû nie mwene mbîkîte ûndû mûcûku, Ngai wa methe metû nîakûmwona na nîakûmûverithia.”

¹⁸ Roho wa Ngai nîwacokire ûgîtonya kûrî Amasai mûnene wa athigari arîa njamba mîrongo îthatû na akiuga atîrî, “Daudi tue tûrî aku, tûrî nawe mûvîcî wa Jesse! Thayû ûrogîa kûrî we, thayû ûrogîa kûrî arîa magûtethagia! Nîûndû Ngai waku nîagûtethagia.” Daudi nîwacokire akîmagwata ûgeni na akîmatua anene a athigari ake a mbaara.

Arûmîrîri a Daudi kuuma mûvîrîgarî wa Manase

¹⁹ Athigari amwe a mûvîrîga wa Manase nîmaaumire gîkundirî Kîamo na makîthiî kûrî Daudi. Meekire ûguo vîndî îrîa Daudi maathiîre na athigari a Afilisiti nîguo makarûe na Saûlo. Daudi na athigari ake matiatethia Afilisiti nîûndû rîrîa maranîrie, athigari a Afilisiti nîmeetigîre nîûndû meeciragia Daudi nwa amakunyanîre kûrî mwathi wake Saûlo. Kwoguo Daudi nîwerirwe acoke Zikilagi.

²⁰ Aya nîo athigari arîa maathiîre kûrî Daudi kuuma mûvîrîgarî wa Manase rîrîa aacokire Zikilagi: Adina, Jozabadi, Jediaeli, Mikaeli, Jozabadi, Elihu na Zilethai. Wa mûndû eethagîrwa arî mûnene wa athigari ngiri îmwe (1,000) mûvîrîgarî wa Manase.

²¹ Nîmaatethirie Daudi kûrûa na ikundi cia andû arîa maathiîcaga magîcuunaga andû indo ciao vûrûrirî ûcio. Maatethirie Daudi nîûndû maarî athigari arîa maarî aro na njamba na anene a athigari a mbaara.

²² Mûthenya wa mûthenya andû nîmaaûkaga kûrî Daudi nîguo mamûtethie, nginya gîkundi gîake Kîam athigari gîkîneneva mûno ta gîkundi Kîam athigari a Ngai.

Mûtaratara wa Athigari a Daudi

²³ Ino nîcio ikundi cia athigari a mbaara irîa ciathiîre kûrî Daudi arî Heburoni. Ciathiîre ikamûtethie kûgarûra ûthamaki wa Saûlo nîguo ûtuîke wa Daudi kûringana na ûrîa Ngai-Mûnene aaugîte.

²⁴ Kuuma Juda kwarî na athigari ngiri ithathatû na magana manana (6,800) marî na matumû na Ngo.

²⁵ Kuuma mûvîrîgarî wa Simeoni kwarî na athigari njamba na maarî aro ngiri mûgwanja na îgana rîmwe (7,100).

²⁶ Kuuma mûvîrîgarî wa Lawi kwarî na athigari ngiri inya na magana matandatû (4,600).

²⁷ Jehoiada, mûtongoria warî wa njiarwa cia Aroni aarî na athigari ngiri ithatû na magana mûgwanja (3,700).

²⁸ Zadoku aarî mûtongoria, mûndû mwîthî na njamba ya mbaara. Kuuma mûciî wao nîwathiîre na anene mîrongo îîrî na aîrî (22) a mbaara.

²⁹ Kuuma mûvîrîgarî wa Benjamini kwarî na athigari ngiri ithatû (3,000). Ûyû nîguo warî mûvîrîga wa mûthamaki Saûlo na andû eengî a mûvîrîga wa Benjamini maarî evokeku mûciîrî wa Saûlo.

³⁰ Kuuma mûvîrîgarî wa Efiraimu kwarî na athigari a mbaara ngiri mîrongo îîrî na magana manana (20,800), maarî aro na maarî njamba ciarî îgweta kwao mîciî.

³¹ Kuuma nuthu ya Manase kwarî na andû ngiri îkûmi na inyanya (18,000), maathuurîtwe nîguo mathiî magatue Daudi mûthamaki.

³² Kuuma mûvîrîgarî wa Isakaru kwarî na andû maarî na ûûgî wa kûmenya maûndû marîa magekîka na ûrîa andû a Isiraeli magîrîrwe nî gwîka. Andû acio maarî atongoria magana maîrî (200) vamwe na andû ao arîa maarî rungu rwao.

³³ Kuuma mûvîrîgarî wa Zebuluni kwarî na athigari ngiri mîrongo îtano (50,000). Maarî athigari maathomithîtue kûrûa mbaara makîvûthagîra indo cia mbaara cia mîthemba yonthe. Andû aya maarî evokeku kûrî Daudi.

³⁴ Kuuma mûvîrîgarî wa Nafutali kwarî na atongoria ngiri îmwe (1,000) vamwe na athigari ngiri mîrongo îthatû na mûgwanja (37,000) maarî na matumû na ngo.

³⁵ Kuuma mûvîrîgarî wa Dani kwarî na athigari a kûrûa mbaara ngiri mîrongo îîrî na inyanya na magana matandatû (28,600).

³⁶ Kuuma mûvîrîgarî wa Asheri kwarî na athigari ngiri mîrongo îna (40,000) maarî na ûûgî mwîngî wa kûrûa mbaara.

³⁷ Na kuuma mûvîrîgarî wa Reubeni, Gadi na nuthu ya Manase ya mwena wa îrathîro wa rûnjî rwa Jorodani kwarî na athigari ngiri îgana rîa mîrongo îîrî (120,000), maathomithîtue gûtûmîra indo cia mbaara cia mîthemba yonthe.

³⁸ Andû acio onthe nîmeerutire nîguo makarûe marî athigari a mbaara. Nîmaathiîre kûrî Daudi arî Heburoni marî na wendi wa kûmûtua mûthamaki wa andû onthe a Isiraeli. Nao andû onthe a Isiraeli nîmeetîkîrîte gûtua Daudi mûthamaki.

³⁹ Nîmeekarire na Daudi kûu Heburoni vandû va mîthenya îthatû makîrîcaga na makînyunyaga, nîûndû andû ao nîmaamavarîrîtie irio.

⁴⁰ Andû arîa maariganîtie nao, kuuma Isakaru, Zebuluni na Nafutali nîmaaûkire makuuîte irio na mvunda ciao, ngamîîra, nyûmbû na ndegwa. Irio icio ciarî: mûtu, tûmîgate twa ngûyû, thavibu, ndivei na maguta. Nîmaacokire makîvira ndegwa na ng'ondu, nîûndû kûu Isiraeli kuonthe kwarî na gîkeno.