1Maû 11 - ÎVUKU RÎA ÛVORO MWARO

Daudi nîwatuîkire Mûthamaki wa Isiraeli

¹ Andû onthe a Isiraeli nîmaagomanire vamwe kûu Heburoni kûrî Daudi na makîmwîra atîrî, “Tue nawe tûrî andû a nthakame îmwe.

² Mbererî wana rîrîa Saûlo aarî mûthamaki nîwatongoririe andû a Isiraeli makîthiî kûrûa. Nake Ngai-Mûnene, Ngai waku nîwakwîrire atî nîûgaatongoria andû ake na ûtuîke mûnene wao.”

³ Kwoguo athuuri onthe a Isiraeli nîmaathiîre kûrî mûthamaki Daudi kûu Heburoni. Nake Daudi nîwathondekire kîrîkanîro nao arî mbere ya Ngai-Mûnene. Nîmaacokire makîmwamûra na makîmûtua mûthamaki wa Isiraeli kûringana na ûrîa Ngai-Mûnene aarîtie kûvîtûkîra Samueli.

⁴ Mûthamaki Daudi na Aisiraeli onthe nîmaathiîre na makîtharîkîra îtûûra rîa Jerusalemu rîrîa vîndî îo rîetagwa Jebusi. Îtûûra rîu rîatûûragwa nî Ajebusi.

⁵ Nao andû a Jebusi nîmeerire Daudi atî ndangîtonya îtûûrarî rîu. Kûnarî ûguo mûthamaki Daudi nîwanyitire kûndû kûrîa kwarî kûgitîre mûno kûu Zayuni na gûgîcoka gwîtagwa, “Îtûûra rînene rîa Daudi.”

⁶ Daudi nîwaugire atîrî, “Mûndû ûrîa ûgaatongoria kûtharîkîra andû a Jebusi nîke ûgaatuîka mûnene wa athigari onthe a mbaara!” Joabu, mûvîcî wa Zeruia nîwamatongoririe, kwoguo nîwatuirwe mûnene wa athigari.

⁷ Daudi nîwacokire akîthiî gûtûûra kûndû kûrîa kwarî kûgitîre mûno, kwoguo nîgwacokire gwîtagwa “Îtûûra rîa Daudi.”

⁸ Nîwatumire îtûûra rîu ambîrîrîtie kûrîa kwarî gwîcûrie mûthetu na akîthiî rûthingorî rûrîa rwathiûrûrûkîrîtie îtûûra. Nake Joabu nîwatumire kûu kwîngî gwatigarîte gwa îtûûra.

⁹ Daudi nîwathiîre na mbere akîgîcaga na vinya mûno nîûndû Ngai-Mûnene mwene vinya wonthe nîwamûtethagia.

Athigari a Daudi arîa maarî njamba

¹⁰ Ûyû nîguo mûtaratara wa athigari a mbaara a Daudi arîa maarî atongoria. Atongoria aya vamwe na andû onthe a Isiraeli nîmaanyitire ûthamaki wa Daudi mbaru na makîmûtethia gûtuîka mûthamaki ûrî na vinya kûringana na ûrîa Ngai-Mûnene eeranîrîte.

¹¹ Athigari a Daudi arîa maarî njamba cia mbaara wa mbere aarî Jashobeamu kuuma mbarî ya Hakimoni. Jashobeamu aarî mûnene wa atongoria “Arîa athatû”. Nîwarûire na îtumû rîake na akîûraga andû magana mathatû (300) riita rîmwe mbaararî.

¹² Wa kaîrî gatagatîrî ka arîa athatû maarî njamba aarî Eleazaru mûvîcî wa Dodo kuuma mbarî ya Aho.

¹³ Eleazaru nîwarûire arî mwena wa Daudi mbaararî îrîa yarî Pasidamimu kûrîa Afilisiti maagomanîte nîguo marûe na Aisiraeli. Vau vaarî na mûgûnda wa cairi, nao Aisiraeli nîmaaûrire nî Afilisiti.

¹⁴ Nwatî Eleazaru nîwarûngamire mûgûndarî gatagatî marî na andû ake na nîmaaûgitîre na makîûraga Afilisiti. Ngai-Mûnene nîwavere Eleazaru na andû ake ûvootani mûnene.

¹⁵ Mûthenya ûmwe, atongoria athatû gatagatîrî ka arîa mîrongo îthatû nîmaathiîre kûrî Daudi varîa eekaraga îthigarî rînene ngurungarî ya Adulamu. Vîndî îo, athigari a mbaara a Afilisiti maambîte magema mao Kîamndarî Kîam Refaimu.

¹⁶ Daudi aarî kûndû kûrîa kwarî kûgitîre, nao athigari a mbaara a Afilisiti maarî Bethilehemu.

¹⁷ Daudi nîwanyondire mûno na akîenda kûnyua manjî. Kwoguo nîwaugire atîrî, “Nwa mende mûndû andetere manjî ma kûnyua kuuma kîthimarî kîrîa kîrî mwîrîgarî wa Bethilehemu!”

¹⁸ Athigari arîa athatû njamba nîmaavîtûkîrîre varîa athigari a Afilisiti maambîte magema mao, nîmaathiîre magîtava manjî na makîvirîra Daudi. Nwatî Daudi ndaanyua manjî mau, vandû va ûguo nîwametûrûrire nthî marî ta îtega kûrî Ngai-Mûnene

¹⁹ na akiuga atîrî, Ngai-Mûnene arongiria kûnyua manjî mama, nîûndû gwîka ûguo nîta kûnyua nthakame ya andû acio metonyirie thînarî wa kûragwa. Kwoguo nîwaregire kûnyua manjî mau. Mama nîmo maûndû marîa meekirwe nî njamba icio ithatû.

²⁰ Abishai, mûrwang'ina wa Joabu nîke warî mûtongoria wa athigari arîa njamba mîrongo îthatû. Nîwocire îtumû rîake na akîrûa na arûme magana mathatû na akîmaûraga onthe. Kwoguo nîwagîre îgweta wata acio athatû.

²¹ Nîwagîre îgweta înene gatagatîrî ka arîa mîrongo îthatû na nîwatuîkire mûtongoria wao, nwatî ndaanatuîka njamba ta acio athatû.

²² Benaia mûvîcî wa Jehoiada wa kuuma Kabuzeeli aarî mûthigari njamba. Benaia nîwekire maûndû manene mûno. Nîwaûragire athigari aîrî maarî aro mûno a Moabu. Vîndî îmwe, Benaia nîwatonyire îrimarî vîndî îrîa kwîthagîrwa kûrî na mbaravu na nîwaûragire mûnyambû.

²³ Nîwaûragire Mûmisiri warî na ûraca wa fiti mûgwanja na nuthu, mûndû warî mûnene. Wana ethîrwa Mûmisiri ûcio nîwanyitîte îtumû înene mûno na njara, Benaia nîwamûtharîkîre na njokoma, akîmûcuuna îtumû rîu rîake na akîmûraga narîo.

²⁴ Icio nîcio imwe cia ciîko cia mwanya irîa Benaia mûvîcî wa Jehoiada eekire. Nîwagîre îgweta gatagatî ka arîa athatû maarî njamba.

²⁵ Nîwavetwe gîtîîo mûno gatagatîrî ka athigari arîa mîrongo îthatû maarî njamba, nwatî ndaanatuîka ta arîa athatû. Daudi nîwamûtwire mûrûngamîrîri wa athigari arîa maamûgitagîra.

²⁶ Athigari engî arîa maarî njamba maarî: Asaheli mûrwang'ina na Joabu, Elihanani mûvîcî wa Dodo kuuma Bethilehemu,

²⁷ Shamothi kuuma Harodi, Helezi kuuma Peloti,

²⁸ Ira mûvîcî wa Ikeshi kuuma Tekoa, Abiezeri kuuma Anathothi,

²⁹ Sibekai kuuma Husha, Ilai wa kuuma Aho.

³⁰ Meharai kuuma Netofa, Heledi mûvîcî wa Baana kuuma Netofa,

³¹ Ithai mûvîcî wa Ribai kuuma Gibea ya Benjamini, Benaia kuuma Pirathoni,

³² Hurai kuuma ciandarî cia Gaashu, Abieli kuuma Ariba,

³³ Azimavethi kuuma Baharumu, Eliaba kuuma Sha-aliboni.

³⁴ Hashemu kuuma Gizoni, Jonathani mûvîcî wa Shagee kuuma Harari.

³⁵ Ahiamu mûvîcî wa Sakaru kuuma Harari, Elifali mûvîcî wa Uri,

³⁶ Heferi kuuma Mekera, Ahija kuuma Peloni,

³⁷ Hezironi kuuma Karimeli, Naarai mûvîcî wa Ezibai,

³⁸ Joeli mûrwang'ina na Nathani, Mibuhari mûvîcî wa Hagiri,

³⁹ Zeleki kuuma Aamoni, Naharai kuuma Be-erothi na nîke wakuuagîra Joabu indo ciake cia mbaara. Joabu aarî mûvîcî wa Zeruia,

⁴⁰ Ira na Garebu a kuuma Ithiri,

⁴¹ Uria kuuma Ahiti, Zabadi mûvîcî wa Ahilai,

⁴² Adina mûvîcî wa Shiza wa mûvîrîga wa Reubeni na aarî mûtongoria wa mûvîrîga wa Reubeni, na athigari ake mîrongo îthatû.

⁴³ Hanani mûvîcî wa Maaka, Joshafati kuuma Mithini,

⁴⁴ Uzia kuuma Ashitera, Shama na Jeieli avîcî a Hothamu kuuma Aroeri.

⁴⁵ Jediaeli mûvîcî wa Shimuri na mûrwang'ina Joha kuuma Tizi,

⁴⁶ Elieli kuuma Mahava, Jeribai na Joshavia avîcî a Elinaamu, na Ithuma kuuma Moabu,

⁴⁷ Elieli, Obedi na Jaasieli kuuma Zoba.